સોના-ચાંદીના ભાવમાં કડાકો: સપ્તાહના અંતે MCX પર ગોલ્ડ-સિલ્વર ફ્યુચર્સ ગગડ્યા, જાણો ઘટાડા પાછળનું મોટું કારણ

સપ્તાહના અંતિમ કારોબારી દિવસે કોમોડિટી એક્સચેન્જ પર સોના અને ચાંદીના રોકાણકારોને નિરાશા સાંપડી છે. 4 સપ્ટેમ્બરના રોજ બંને કિંમતી ધાતુઓના ભાવમાં ઘટાડો જોવા મળ્યો હતો. સાંજે 4:15 વાગ્યાના આંકડા મુજબ, ગોલ્ડ ફ્યુચર્સ 0.34 ટકા (એટલે કે 531 રૂપિયા) ના ઘટાડા સાથે 10 ગ્રામ દીઠ 1,55,244 રૂપિયા પર ટ્રેડ થઈ રહ્યું હતું. બીજી તરફ, સિલ્વર ફ્યુચર્સ પણ 0.31 ટકા (એટલે કે 734 રૂપિયા) તૂટીને 2,35,320 રૂપિયાના સ્તરે પહોંચી ગયું હતું.

આંતરરાષ્ટ્રીય બજારમાં પણ સુસ્તી

માત્ર ભારતીય બજાર જ નહીં, પરંતુ વિદેશી બજારોમાં પણ સોના-ચાંદીની ચમક ફીકી પડી છે. આંતરરાષ્ટ્રીય માર્કેટમાં સોનું 0.02 ટકાના સામાન્ય ઘટાડા સાથે 4,472.12 ડોલર પ્રતિ ઔંસ પર આવી ગયું હતું. જ્યારે ચાંદી 0.22 ટકાની નબળાઈ સાથે 66.80 ડોલર પ્રતિ ઔંસ પર ટ્રેડ થઈ રહી હતી.

ભાવ કેમ ઘટી રહ્યા છે? જાણો મુખ્ય કારણો

કોમોડિટી માર્કેટના નિષ્ણાતોના મતે, આ ઘટાડા પાછળ કેટલાક મુખ્ય પરિબળો જવાબદાર છે. અમેરિકામાં ટૂંક સમયમાં નોન-ફોર્મ પેરોલ્સનો ડેટા આવવાનો છે. આ ડેટા પહેલા રોકાણકારો ખૂબ જ સાવચેતીપૂર્વક આગળ વધી રહ્યા છે. ભારતીય રૂપિયામાં આવેલી મજબૂતીની સીધી અસર ગોલ્ડ અને સિલ્વર ફ્યુચર્સ પર પડી છે. 3 સપ્ટેમ્બરે રૂપિયો 0.5 ટકા મજબૂત થઈને ડોલર સામે 94.48 ના સ્તર પર બંધ થયો હતો. ક્રૂડ ઓઇલના ઊંચા ભાવોએ બુલિયન માર્કેટ પર દબાણ વધાર્યું છે. બ્રેન્ટ ક્રૂડ 95 ડોલર અને WTI ક્રૂડ 90 ડોલર પ્રતિ બેરલની પાર પહોંચી ગયું છે. આ સપ્તાહે ક્રૂડમાં 10 ટકાનો ઉછાળો આવ્યો છે. ક્રૂડ મોંઘુ થવાથી મોંઘવારી વધવાનો ડર રહે છે.

નિષ્ણાતોનો મત

આનંદ રાઠી શેર એન્ડ સ્ટોક બ્રોકર્સના રિસર્ચ એનાલિસ્ટ વેદિકા નાર્વેકરના જણાવ્યા અનુસાર, આ અસ્થિર સપ્તાહમાં સોનું 4,480 ડોલરની આસપાસ ટકી રહ્યું છે. યુએસ ફેડરલ રિઝર્વના કડક વલણ વચ્ચે, ડોલરની નબળાઈએ સોનાને થોડો ટેકો આપ્યો છે. ગ્લોબલ મની મેનેજરો હજુ પણ ગોલ્ડ અને ગોલ્ડ ETF માં રસ દાખવી રહ્યા છે.