Gold-Silver Price: સોના-ચાંદીના ભાવમાં ભૂકંપ! ક્રેશ થયા બાદ સીધો 21,000 રૂપિયાનો ઉછાળો, જાણો આજના લેટેસ્ટ ભાવ

Gold-Silver Price Update: છેલ્લા થોડા દિવસોથી સોના-ચાંદીના ભાવમાં જે ઉથલ-પાથલ ચાલી રહી છે, તેણે રોકાણકારો અને ગ્રાહકો બંનેના શ્વાસ અધ્ધર કરી દીધા છે. હવે કિંમતી ધાતુઓમાં પણ શેર બજાર જેવી વોલેટિલિટી (અસ્થિરતા) જોવા મળી રહી છે. ક્યારેક ભાવ આસમાને પહોંચે છે તો ક્યારેક અચાનક ધડામ દઈને નીચે પટકાય છે. ગયા અઠવાડિયે આપણે જોયું કે સોના અને ચાંદીના ભાવમાં મોટો ઘટાડો નોંધાયો હતો, પરંતુ આજે મંગળવારે ફરી એકવાર બજારમાં જોરદાર રિકવરી જોવા મળી છે.

ખાસ કરીને ચાંદીના ભાવમાં તોફાની તેજી જોવા મળી છે. એક સમયે 4 લાખને પાર પહોંચેલી ચાંદી ક્રેશ થયા બાદ, આજે ફરી એકવાર મોટા ઉછાળા સાથે ટ્રેડ થઈ રહી છે.

ચાંદીના ભાવમાં 21,000 રૂપિયાનો તોતિંગ વધારો

આજે એટલે કે મંગળવારે (3 ફેબ્રુઆરી), વાયદા બજાર (MCX) ખુલતાની સાથે જ ચાંદી ચમકી ઉઠી હતી. સોમવારે ચાંદીના ભાવ ઘટીને 2.25 લાખ રૂપિયાની આસપાસ પહોંચી ગયા હતા. પરંતુ આજે માર્કેટ ઓપન થતાની સાથે જ તેમાં સીધો 21,000 રૂપિયાનો વધારો જોવા મળ્યો છે.

આજના લેટેસ્ટ ભાવની વાત કરીએ તો, 1 કિલો ચાંદીની કિંમત ઉછળીને 2,57,480 રૂપિયા પર પહોંચી ગઈ છે. અત્રે ઉલ્લેખનીય છે કે, હજુ થોડા દિવસ પહેલા એટલે કે 29 જાન્યુઆરીએ ચાંદીએ ઈતિહાસ રચ્યો હતો અને ભાવ પહેલીવાર 4 લાખ રૂપિયાને પાર ગયો હતો.

સોનાના ભાવમાં પણ ચમકારો: 5000થી વધુનો ઉછાળો

માત્ર ચાંદી જ નહીં, સોનાના ભાવમાં પણ આજે તેજી જોવા મળી છે. સોમવારે (2 ફેબ્રુઆરી) MCX પર 10 ગ્રામ સોનાનો ભાવ 1,43,991 રૂપિયા પર બંધ રહ્યો હતો. આજે માર્કેટ ખુલતાની સાથે જ સોનામાં 5,494 રૂપિયાનો ઉછાળો આવ્યો છે.