Gold-silver Price Today: વૈશ્વિક તણાવ ઘટતા સોના-ચાંદીના ભાવમાં નરમાશ, જાણો રોકાણકારો માટે શું છે એક્સપર્ટની સલાહ

Gold-silver Price Today: વૈશ્વિક સ્તરે ભૌગોલિક રાજકીય તણાવમાં થોડો ઘટાડો થતા સોના અને ચાંદીના ભાવમાં નરમાશ જોવા મળી રહી છે. અમેરિકા અને ઈરાન વચ્ચેના યુદ્ધવિરામને લંબાવવાના સમાચારને કારણે રોકાણકારોમાં સુરક્ષિત રોકાણ તરીકે સોનાની માગ ઘટી છે. 23 એપ્રિલના રોજ શરૂઆતી કારોબારમાં કિંમતી ધાતુઓના ભાવ નીચે આવ્યા છે, જોકે બજારમાં હજુ પણ અનિશ્ચિતતાનો માહોલ હોવાથી આ ઘટાડો મર્યાદિત રહ્યો છે.

વૈશ્વિક બજારમાં સોના-ચાંદીની સ્થિતિ

આંતરરાષ્ટ્રીય બજાર COMEX પર સોનાનો વાયદો 0.06% ઘટીને 4,750 ડોલર પ્રતિ ઔંસ પર જોવા મળ્યો હતો. બીજી તરફ ચાંદીના વાયદામાં 0.39% નો ઘટાડો નોંધાયો છે અને તે 77.66 ડોલર પ્રતિ ઔંસ પર ટ્રેડ કરી રહ્યો હતો. અમેરિકી રાષ્ટ્રપતિ ડોનાલ્ડ ટ્રમ્પના નિર્ણય બાદ શેરબજારોમાં તેજી આવી છે, જેના કારણે રોકાણકારોનું ધ્યાન સોના પરથી હટીને જોખમી એસેટ્સ તરફ વળ્યું છે. જાપાન અને દક્ષિણ કોરિયાના બજારોમાં પણ આજે રેકોર્ડ સ્તર જોવા મળ્યું છે.

તણાવ હજુ પૂરો થયો નથી

ભાવમાં ઘટાડો તો થયો છે, પણ હોર્મુઝ સ્ટ્રેટ આસપાસ ચાલી રહેલી તણાવભરી સ્થિતિ અને એનર્જી માર્કેટની અસ્થિરતાને કારણે સોનામાં બહુ મોટો કડાકો જોવા મળ્યો નથી. સોનું હજુ પણ ફુગાવા અને અનિશ્ચિતતા સામે રક્ષણ આપતા સાધન તરીકે કેન્દ્રીય બેંકોની પસંદગી બની રહ્યું છે. એશિયાઈ દેશોની સેન્ટ્રલ બેંકો દ્વારા સોનાની સતત ખરીદી તેને સપોર્ટ કરી રહી છે.

સોના-ચાંદીની ભવિષ્યની ચાલ

LKP સિક્યોરિટીઝના એનાલિસ્ટ જતીન ત્રિવેદીના મતે, હવે બજારનું સંપૂર્ણ ધ્યાન 29 એપ્રિલના રોજ આવનારી અમેરિકી ફેડરલ રિઝર્વની પોલિસી પર રહેશે. આ પોલિસી બજારને નવી દિશા આપશે. ત્યાં સુધી સોનું એક મર્યાદિત રેન્જમાં રહેશે તેવી શક્યતા છે.