Gold-Silver Price Today: સોનાના ભાવમાં કડાકો તો ચાંદીમાં તેજીનો ચમકારો; જાણો આજના લેટેસ્ટ રેટ્સ

Gold and Silver Price Today, February 24: અઠવાડિયાના પહેલા દિવસે સોના અને ચાંદીના ભાવમાં મિશ્ર સંકેતો જોવા મળી રહ્યા છે. જો તમે આજે સોનું કે ચાંદી ખરીદવાનું વિચારી રહ્યા હોવ અથવા કોમોડિટી માર્કેટમાં રોકાણ કરતા હોવ, તો આ સમાચાર તમારા માટે મહત્વના છે. ઘરેલુ બજારમાં આજે સોનાના ભાવ દબાણ હેઠળ જોવા મળ્યા છે, જ્યારે ચાંદીમાં તેજીનો માહોલ છે.

મલ્ટી કોમોડિટી એક્સચેન્જ (MCX) પર આજે સોનાના વાયદાના ભાવ નરમાઈ સાથે ટ્રેડ થઈ રહ્યા છે. જ્યારે બીજી તરફ, ચાંદીના વાયદાના ભાવમાં મજબૂતી જોવા મળી છે. આંતરરાષ્ટ્રીય બજારમાં પણ સોનું નરમ અને ચાંદી તેજી સાથે આગળ વધી રહી છે.

MCX પર સોનાના ભાવમાં ઘટાડો

આજે બજાર ખુલતાની સાથે જ સોનાના ભાવમાં ઘટાડો જોવા મળ્યો હતો. MCX પર સોનાનો બેન્ચમાર્ક એપ્રિલ કોન્ટ્રાક્ટ આજે શરૂઆતમાં 829 રૂપિયા તૂટીને 1,60,769 રૂપિયાના સ્તરે ખુલ્યો હતો. નોંધનીય છે કે ગત સત્રમાં સોનું 1,61,598 રૂપિયા પર બંધ થયું હતું.

સમાચાર લખાઈ રહ્યા છે ત્યારે સોનાનો વાયદાનો ભાવ 551 રૂપિયાના ઘટાડા સાથે 1,61,047 રૂપિયા પર ટ્રેડ કરી રહ્યો હતો. આજના ટ્રેડિંગ સેશન દરમિયાન સોનાએ 1,61,171 રૂપિયાનો હાઈ અને 1,60,615 રૂપિયાનો લો (Low) બનાવ્યો હતો. ઉલ્લેખનીય છે કે આ વર્ષે સોનાના વાયદાના ભાવે 1,80,779 રૂપિયાની સર્વોચ્ચ સપાટી પણ સ્પર્શ કરી છે.

ચાંદીમાં તેજીનો કરંટ

સોનાથી વિપરીત, ચાંદીના ભાવમાં આજે શરૂઆતથી જ તેજી જોવા મળી હતી. MCX પર ચાંદીનો માર્ચ કોન્ટ્રાક્ટ આજે 1,888 રૂપિયાના ઉછાળા સાથે 2,67,221 રૂપિયા પર ખુલ્યો હતો. પાછલા સત્રમાં ચાંદીનો બંધ ભાવ 2,65,333 રૂપિયા હતો.