ભારતીય રૂપિયામાં ઐતિહાસિક ઘટાડો: પહેલીવાર 1 ડૉલરનો ભાવ 92 રૂપિયાને પાર, જાણો કડાકાના 4 મોટા કારણો

Rupee hits record low: બુધવાર, 4 માર્ચનો દિવસ ભારતીય કરન્સી માટે ખરાબ સાબિત થયો છે. યુએસ ડૉલર (US Dollar) સામે ભારતીય રૂપિયો ઐતિહાસિક નીચલી સપાટીએ પહોંચી ગયો છે. ટ્રેડિંગની શરૂઆતમાં જ રૂપિયો 55 પૈસા તૂટ્યો અને ઇતિહાસમાં પહેલીવાર 92 ના આંકડાને પાર કરીને 92.02 ના લેવલ પર ખુલ્યો.

અગાઉ સોમવારે, 2 માર્ચના રોજ રૂપિયો 91.47 પર બંધ થયો હતો (મંગળવારે બજારમાં રજા હતી). આ પહેલા રૂપિયાની સૌથી નીચલી સપાટી જાન્યુઆરી મહિનામાં 91.9875 નોંધાઈ હતી. પરંતુ હવે ગ્લોબલ માર્કેટમાં ચાલી રહેલા ઉથલપાથલના કારણે રૂપિયાએ પોતાના તમામ જૂના રેકોર્ડ તોડી નાખ્યા છે.

રૂપિયામાં આટલો મોટો ઘટાડો કેમ આવ્યો? જાણો 4 મોટા કારણો:

ભડકે બળતા ક્રૂડ ઓઇલના ભાવ: ઈરાન અને ઈઝરાયેલ વચ્ચે ચાલી રહેલા યુદ્ધના તણાવને કારણે આંતરરાષ્ટ્રીય બજારમાં કાચા તેલ (Crude Oil) ના ભાવમાં ભડકો થયો છે. બુધવારે (4 માર્ચ) બ્રેન્ટ ક્રૂડ 1% વધીને 82.32 ડોલર પ્રતિ બેરલ થઈ ગયું હતું. છેલ્લા બે દિવસમાં તેમાં 11% થી વધુનો ઉછાળો આવ્યો છે. મંગળવારે તો ભાવ 85 ડોલરને પણ પાર કરી ગયા હતા.

હોર્મુઝ સ્ટ્રેટનો ડર: વિશ્લેષકોને ડર છે કે મિડલ ઈસ્ટમાં સંઘર્ષ વધવાથી હોર્મુઝ સ્ટ્રેટ (Hormuz Strait) માંથી થતા ઓઇલ સપ્લાયમાં અડચણ આવી શકે છે. દુનિયાનું લગભગ 20% (પાંચમો ભાગ) તેલ અને LNG સપ્લાય આ જ રસ્તેથી થાય છે.

વિદેશી રોકાણકારો દ્વારા નાણાં પાછા ખેંચવા: સોમવારે (2 માર્ચ) જ વિદેશી રોકાણકારોએ ભારતીય શેરબજારમાંથી 350 મિલિયન ડૉલરથી વધુની રકમ પાછી ખેંચી લીધી છે. વિદેશી ફંડના બહાર જવાના કારણે રૂપિયા પર ભારે દબાણ આવ્યું છે.

ડૉલર ઇન્ડેક્સમાં મજબૂતી: ગ્લોબલ માર્કેટમાં ડૉલર ઇન્ડેક્સ ત્રણ મહિનાની સૌથી ઊંચી સપાટી 98.41 પર પહોંચી ગયો છે. જ્યારે દુનિયામાં યુદ્ધ કે સંકટ જેવી સ્થિતિ હોય ત્યારે રોકાણકારો ડૉલર જેવી સુરક્ષિત સંપત્તિ (Safe-haven assets) તરફ વળતા હોય છે, જેનાથી ડૉલરની માંગ વધી છે.