Rupee hits all time low: વૈશ્વિક બજારમાં ચાલી રહેલા ટેન્શન અને કાચા તેલ (Crude Oil)ની વધતી કિંમતોની સીધી અસર ભારતીય ચલણ પર જોવા મળી રહી છે. મંગળવારે (12 મે) ભારતીય રૂપિયો અમેરિકી ડૉલર સામે 95.50ના ઐતિહાસિક નીચલા સ્તરે (Record Low) પહોંચી ગયો છે. આ સાથે જ 10 વર્ષના ભારતીય સરકારી બોન્ડની યીલ્ડ પણ ઉછળીને 7%ની સપાટી વટાવી ગઈ છે.
રૂપિયામાં ઐતિહાસિક કડાકો: ડૉલર સામે 95.50ના રેકોર્ડ નીચલા સ્તરે પહોંચ્યો, બોન્ડ યીલ્ડ 7%ને પાર
Rupee hits all time low: ભારતીય રૂપિયામાં મોટો કડાકો જોવા મળ્યો છે. અમેરિકા-ઈરાન ટેન્શન અને કાચા તેલના વધતા ભાવને કારણે ડૉલર સામે રૂપિયો 95.50ના રેકોર્ડ લો પર પહોંચ્યો છે.
MoneyControl Newsઅપડેટેડ May 12, 2026 પર 10:04 AM
રૂપિયો કેમ ગગડ્યો?
સોમવારે (11 મે) રૂપિયો 95.31ના સ્તર પર બંધ થયો હતો. પરંતુ ગ્લોબલ માર્કેટમાં જોખમ ટાળવાના (રિસ્ક-ઓફ) સેન્ટિમેન્ટને કારણે મંગળવારે રૂપિયો નબળો પડીને 95.50 પર ખુલ્યો હતો. ફેબ્રુઆરીના અંતમાં ઈરાન સાથેનો વિવાદ વધ્યા પછી રૂપિયા પર સતત દબાણ જોવા મળી રહ્યું છે. જોકે, રિઝર્વ બેંક ઓફ ઇન્ડિયા (RBI) વચ્ચે-વચ્ચે બજારમાં દખલ કરીને રૂપિયાની વધઘટ કંટ્રોલ કરવાનો પ્રયાસ કરી રહી છે, છતાં વેપારીઓનું માનવું છે કે રૂપિયાને લઈને માહોલ હજુ પણ ખૂબ જ નાજુક છે.
અમેરિકા અને ઈરાન વચ્ચે તણાવ વધ્યો
સોમવારે અમેરિકાના રાષ્ટ્રપતિ ડોનાલ્ડ ટ્રમ્પે મોટું નિવેદન આપતા કહ્યું હતું કે વોશિંગ્ટન અને તેહરાન વચ્ચેનું યુદ્ધવિરામ (સીઝફાયર) હવે "લાઈફ સપોર્ટ પર" છે. ટ્રમ્પે અમેરિકી નેવી પરનો પ્રતિબંધ હટાવવા, ઈરાનના તેલની નિકાસ ફરી શરૂ કરવા અને યુદ્ધના નુકસાનના વળતર જેવા મુદ્દાઓ પર અસહમતિ દર્શાવી છે. આ નિવેદનથી તેલ ઉત્પાદનના મુખ્ય કેન્દ્ર સમાન ફારસની ખાડીમાં લાંબા સમય સુધી સપ્લાય ખોરવાઈ જવાનો ડર વધી ગયો છે.
મોંઘું ક્રૂડ ઓઇલ અને ભારતની ચિંતા
ING બેંકે પોતાની એક નોટમાં જણાવ્યું છે કે ઈરાનની આસપાસની ગતિવિધિઓને કારણે ક્રૂડ ઓઇલના ભાવ ખૂબ સેન્સિટિવ થઈ ગયા છે. બ્રેન્ટ ક્રૂડ 1% વધીને 105.22 ડૉલર પ્રતિ બેરલ થઈ ગયું છે. જ્યારથી બંને દેશો વચ્ચે સંઘર્ષ શરૂ થયો છે ત્યારથી ક્રૂડમાં લગભગ 46% નો ઉછાળો આવ્યો છે.
ભારત પોતાની જરૂરિયાતનું મોટાભાગનું તેલ આયાત કરે છે, તેથી આ વધારાએ દેશ માટે ચિંતા ઉભી કરી છે. મોંઘા તેલને કારણે ભારતની આયાતી મોંઘવારી અને કરંટ એકાઉન્ટ ડેફિસિટ (CAD) વધવાની ભીતિ છે, જેની સીધી અસર રૂપિયા પર પડે છે.
વધતી મુશ્કેલીઓ વચ્ચે વડાપ્રધાન નરેન્દ્ર મોદીએ રવિવારે ઈંધણનો વપરાશ ઘટાડવા માટે અપીલ કરી હતી. તેમણે વર્ક-ફ્રોમ-હોમ (Work from Home)ને પ્રોત્સાહન આપવા અને બિનજરૂરી મુસાફરી તથા આયાત ટાળવા પર ભાર મૂક્યો હતો. આ વાતોની રોકાણકારોના સેન્ટિમેન્ટ પર વધુ અસર પડી છે.
10 વર્ષના બોન્ડ યીલ્ડ 7%ને પાર
ગ્લોબલ જિયોપોલિટિકલ ટેન્શન અને સતત વધતી મોંઘવારીની ચિંતાના કારણે સ્થાનિક ડેટ માર્કેટ પર દબાણ આવ્યું છે. પરિણામે, ભારતના 10 વર્ષના સરકારી બોન્ડની યીલ્ડ 7%નો આંકડો પાર કરીને 7.031% પર પહોંચી ગઈ છે, જે 0.047 બેસિસ પોઈન્ટ અથવા 0.67%નો વધારો દર્શાવે છે.
બેંક ઓફ બરોડાના એક રિપોર્ટ મુજબ, આ મહિનાના બાકીના સમયમાં 10 વર્ષની યીલ્ડ 6.9% અને 7.1%ની વચ્ચે રહેવાની શક્યતા છે. રિપોર્ટમાં જણાવાયું છે કે ન્યૂ GS2036 માટે 6.94% નો કટ-ઓફ પણ એ જ ઇશારો કરે છે કે યીલ્ડ 6.9% થી વધુ નીચે જવાની આશા નથી.
(નોંધ: સરકારી બોન્ડ જેને G-Secs કહેવાય છે, તે ઓછું રિસ્ક ધરાવતી સિક્યોરિટી છે જે સરકાર ફંડ ભેગું કરવા માટે બહાર પાડે છે. બોન્ડ પર મળતા વળતરને ‘યીલ્ડ’ કહે છે, જે હંમેશા બોન્ડની કિંમતથી ઊલટી દિશામાં ચાલે છે.)
આંતરરાષ્ટ્રીય સ્તરે ચાલી રહેલી ઉથલપાથલ, ક્રૂડ ઓઇલના ભડકે બળતા ભાવ અને વિદેશી બજારોમાં રહેલી અનિશ્ચિતતાની સીધી અસર ભારતના અર્થતંત્ર પર પડી રહી છે. આગામી દિવસોમાં RBI ના પગલાં અને અમેરિકા-ઈરાનના વલણ પર બજારની નજર રહેશે.
Disclaimer: મનીકંટ્રોલ.કોમ પર આપવામાં આવેલી સલાહ કે વિચારો એક્સપર્ટ/બ્રોકરેજ ફર્મના અંગત મંતવ્યો છે. વેબસાઇટ કે તેનું મેનેજમેન્ટ તેના માટે જવાબદાર નથી. યુઝર્સને મનીકંટ્રોલ દ્વારા સલાહ આપવામાં આવે છે કે કોઈપણ રોકાણનો નિર્ણય લેતા પહેલા હંમેશા પ્રમાણિત નિષ્ણાતની સલાહ લેવી.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.