ચાંદીની ઐતિહાસિક તેજી: ગ્લોબલ માર્કેટમાં ભાવ 83 ડોલરને પાર કરી નવો રેકોર્ડ બનાવ્યો, ત્યારબાદ 8%નો કડાકો

Silver Price: ગ્લોબલ માર્કેટમાં કિંમતી ધાતુઓમાં ભારે ઉથલપાથલ જોવા મળી છે, જેમાં ચાંદીએ તમામ રેકોર્ડ તોડી નાખ્યા છે. ચાંદીએ ટ્રેડિંગ દરમિયાન એક નવો ઐતિહાસિક રેકોર્ડ બનાવ્યો છે, જોકે આ ઉછાળો લાંબો સમય ટકી શક્યો નહીં અને કિંમતો પોતાના ઇન્ટ્રાડે હાઈ લેવલથી લગભગ 8% જેટલી નીચે આવી ગઈ હતી. માર્ચના ફ્યુચર કોન્ટ્રાક્ટ્સમાં શરૂઆતી ટ્રેડિંગ દરમિયાન જબરદસ્ત તેજી જોવા મળી હતી, જેમાં 7%ના વધારા સાથે ભાવ 82.67 ડોલર પ્રતિ ઔંસના ઇન્ટ્રાડે હાઈ પર પહોંચ્યા હતા. ત્યારબાદ તેમાં ઘટાડો નોંધાયો હતો. આ દરમિયાન, સિલ્વર ફ્યુચર્સે ઓક્ટોબર મહિનાના ઐતિહાસિક શોર્ટ-સ્ક્વિઝને પણ પાછળ છોડી દીધો છે.

સ્પોટ સિલ્વરના પ્રદર્શન પર નજર

સ્પોટ સિલ્વરના પ્રદર્શન પર નજર કરીએ તો, રોયટર્સના ડેટા મુજબ ભાવ ઉછળીને 83.62 ડોલર પ્રતિ ઔંસના નવા રેકોર્ડ હાઈ સુધી પહોંચી ગયા હતા. જોકે, આ સપાટી પર પહોંચ્યા બાદ તેમાં 1.3%નો ઘટાડો જોવા મળ્યો હતો. ચાંદીના આ પ્રદર્શનને જોતા 2025નું વર્ષ ચાંદી માટે સુવર્ણ વર્ષ સાબિત થઈ રહ્યું છે. અત્યાર સુધીમાં એટલે કે વર્ષ 2025માં ચાંદીના ભાવમાં 180% સુધીનો તોતિંગ ઉછાળો આવ્યો છે. વર્ષ પૂરું થવામાં હજુ 3 સેશન બાકી છે, ત્યારે એવું લાગી રહ્યું છે કે 1979 બાદ ચાંદી કોઈ કેલેન્ડર વર્ષમાં સૌથી શ્રેષ્ઠ રિટર્ન આપવાની રાહ પર છે. અત્રે ઉલ્લેખનીય છે કે 1979માં ચાંદીના ભાવ 200%થી વધુ ઉછળ્યા હતા.

ચાંદીના ભાવમાં વધારા પાછળ કયા કારણ?

ચાંદીના ભાવમાં આવેલા આ ઐતિહાસિક ઉછાળા પાછળ મુખ્યત્વે ઔદ્યોગિક માંગમાં થયેલો વધારો જવાબદાર છે. આ ઉપરાંત સુરક્ષિત રોકાણ (Safe Haven) તરીકે ચાંદીની ખરીદી અને ગ્લોબલ સપ્લાયમાં સતત થઈ રહેલો ઘટાડો પણ ભાવને ઉપર લઈ જઈ રહ્યો છે. માર્કેટ એનાલિસ્ટ્સના મતે, મોટા બુલિયન બેંકોની હાલત કફોડી થઈ છે કારણ કે તેમને તેમના 'પેપર સિલ્વર' (કાગળ પરના સોદા)ને કવર કરવા માટે 'ફિઝિકલ સિલ્વર' (અસલી ચાંદી) ખરીદવી પડી રહી છે અને બજારમાં ફિઝિકલ સિલ્વર પર્યાપ્ત માત્રામાં ઉપલબ્ધ નથી. આ અછતને કારણે પણ કિંમતો આસમાને પહોંચી છે.

અમેરિકાના કેન્દ્રીય બેંક ફેડરલ રિઝર્વ દ્વારા વ્યાજદરમાં ઘટાડાની શક્યતાઓ પણ આ તેજીને બળ આપી રહી છે. ફેડરલ ઓપન માર્કેટ કમિટીની આગામી મીટિંગ 27-28 જાન્યુઆરી, 2026 ના રોજ યોજાવાની છે. ટ્રેડર્સ એવી અપેક્ષા રાખી રહ્યા છે કે પ્રમુખ વ્યાજ દરોમાં 350-375 બેસિસ પોઈન્ટ્સનો મોટો ઘટાડો થઈ શકે છે. જો રેટ કટ થશે તો સોના અને ચાંદી જેવા સુરક્ષિત એસેટ્સમાં રોકાણ વધશે અને ભાવમાં વધુ ઉછાળો આવી શકે છે. અગાઉ ડિસેમ્બરની મીટિંગમાં ફેડ દ્વારા વ્યાજદરમાં 0.25% નો ઘટાડો કરવામાં આવ્યો હતો.

હવે ચાંદી માત્ર એક કિંમતી ધાતુ નથી રહી, પરંતુ તે દુનિયાની મોટી કંપનીઓને પણ વેલ્યુએશનમાં ટક્કર આપી રહી છે. ચાંદી હવે NVIDIA Corporationને પછાડીને દુનિયાની બીજી સૌથી વેલ્યુએબલ એસેટ બનવાની દિશામાં આગળ વધી રહી છે. દુનિયાની સૌથી વેલ્યુએબલ એસેટ હાલમાં સોનું છે. companiesmarketcap.com ના ડેટા અનુસાર, અત્યારે ચાંદીનું માર્કેટ કેપિટલાઇઝેશન 4.220 લાખ કરોડ ડોલર પર પહોંચ્યું છે. આ આંકડો NVIDIAના માર્કેટ કેપ 4.592 લાખ કરોડ ડોલરથી માત્ર 8.1% જ ઓછો છે. શુક્રવાર, 26 ડિસેમ્બર 2025 સુધીના આંકડા મુજબ સોનાનું માર્કેટ કેપિટલાઇઝેશન 31.598 લાખ કરોડ ડોલર નોંધાયું હતું. આમ, ચાંદી હવે ટેકનોલોજી કંપનીઓને પણ પાછળ છોડવાની તૈયારીમાં છે.