US Iran talks: અમેરિકા અને ઈરાન વચ્ચે સ્વિટ્ઝરલેન્ડમાં વાતચીત સફળ, હોર્મુઝ સ્ટ્રેટ અને લેબનોન મુદ્દે ઐતિહાસિક નિર્ણયો, જાણો ડીલની તમામ વિગતો

US Iran talks: સ્વિટ્ઝરલેન્ડના બર્ગનસ્ટોક (લેક લ્યુસર્ન) ખાતે અમેરિકા અને ઈરાન વચ્ચે ચાલી રહેલી ઉચ્ચ સ્તરીય વાતચીતનો પ્રથમ તબક્કો ખૂબ જ સકારાત્મક અને સૌહાર્દપૂર્ણ માહોલમાં પૂર્ણ થયો છે. પાકિસ્તાન અને કતારની મધ્યસ્થી હેઠળ થયેલી આ મંત્રણામાં દાયકાઓ જૂના વિવાદો ઉકેલવા તરફ એક મોટું પગલું ભરવામાં આવ્યું છે. ઇસ્લામાબાદ મેમોરેન્ડમ ઓફ અન્ડરસ્ટેન્ડિંગ (MoU) હેઠળ થયેલી આ સમિટમાં હોર્મુઝ સ્ટ્રેટની સુરક્ષાથી લઈને લેબનોન યુદ્ધ સુધીના ઘણા મહત્વના નિર્ણયો લેવાયા છે.

ઈરાન માટે મોટા રાહતના સમાચાર: વિદેશ મંત્રીનો મોટો દાવો

આ મંત્રણા બાદ ઈરાનના વર્તમાન વિદેશ મંત્રી સૈયદ અબ્બાસ અરાઘચીએ સોશિયલ મીડિયા પ્લેટફોર્મ X પર એક મોટી જાહેરાત કરી છે. તેમણે જણાવ્યું કે પાકિસ્તાન અને કતારની સતત મહેનત અને મધ્યસ્થીના કારણે લેબનોન યુદ્ધ ખતમ કરવાની દિશામાં જબરદસ્ત પ્રગતિ થઈ છે.

તેમણે દાવો કર્યો છે કે ઈરાનના તેલ (Oil) અને પેટ્રોકેમિકલ એક્સપોર્ટ પર લાગેલો પ્રતિબંધ હટાવી લેવામાં આવ્યો છે. લાંબા સમયથી ચાલી રહેલી નાકાબંધી પૂર્ણ કરવામાં આવી છે. વિદેશમાં ફ્રીઝ કરવામાં આવેલી ઈરાનની કેટલીક સંપત્તિ પણ રિલીઝ કરી દેવાઈ છે. દેશમાં મોટા પાયે પુનર્નિર્માણ અને વિકાસ યોજનાઓ શરૂ કરવાની મંજૂરી મળી ગઈ છે.

હોર્મુઝ સ્ટ્રેટ માટે ‘ડાયરેક્ટ કમ્યુનિકેશન લાઈન'

વિશ્વના વેપાર માટે અત્યંત મહત્વના ગણાતા હોર્મુઝ જળડમરુમધ્ય (Strait of Hormuz) માં વારંવાર સર્જાતી તંગદિલી ટાળવા માટે એક મોટો નિર્ણય લેવાયો છે. MoU ના પેરેગ્રાફ 5 મુજબ, અમેરિકા અને ઈરાન વચ્ચે એક ડાયરેક્ટ કમ્યુનિકેશન લાઈન ઉભી કરવામાં આવી છે. આનો મુખ્ય હેતુ બંને દેશો વચ્ચે કોઈપણ પ્રકારની ગેરસમજ ટાળવાનો અને કોમર્શિયલ જહાજોની સુરક્ષિત અવરજવર સુનિશ્ચિત કરવાનો છે.