શેરબજારમાં ભયંકર કડાકો: ક્રૂડ ઓઇલ $110ને પાર, સેન્સેક્સ 1800 પોઇન્ટ તૂટ્યો, રોકાણકારોના 9 લાખ કરોડ ડૂબ્યા

Share Market Crash: વૈશ્વિક બજારમાં ચાલી રહેલા હાહાકારની વચ્ચે ભારતીય શેરબજારમાં પણ જાણે ભૂકંપ આવી ગયો છે. કાચા તેલ (Crude Oil)ની કિંમતોમાં અચાનક આવેલી તેજીના કારણે માર્કેટ ખુલતાની સાથે જ રોકાણકારોના અંદાજે 9 લાખ કરોડ ડૂબી ગયા છે. ઘરેલુ ઈક્વિટી બેન્ચમાર્ક ઈન્ડેક્સ સેન્સેક્સ અને નિફ્ટી 50 માં ભારે કડાકો જોવા મળ્યો છે.

શા માટે આવ્યો શેરબજારમાં કડાકો?

આ મોટા ઘટાડા પાછળનું મુખ્ય કારણ અમેરિકા અને ઈરાન વચ્ચે ઘેરો બની રહેલો યુદ્ધનો ખતરો છે. હોર્મુઝ સ્ટ્રેટ (Hormuz Strait) બંધ થવાના ડરથી ગલ્ફ દેશોએ કાચા તેલનું ઉત્પાદન ઘટાડી દીધું છે. જેના પરિણામે ક્રૂડ ઓઈલના ભાવ ભડકે બળ્યા છે અને તે પ્રતિ બેરલ $110ની સપાટી વટાવી ચૂક્યું છે. આ વૈશ્વિક ટેન્શનની સીધી અસર દુનિયાભરના શેરબજારો પર પડી રહી છે અને ભારતીય બજાર પણ તેમાંથી બાકાત નથી રહ્યું.

સેન્સેક્સ અને નિફ્ટીની હાલની સ્થિતિ

ભારતીય શેરબજારમાં આજે ચારેતરફ વેચવાલીનો માહોલ છે. નિફ્ટીના તમામ સેક્ટરના ઈન્ડેક્સ લાલ નિશાનમાં ટ્રેડ થઈ રહ્યા છે. મોટા શેરોની સાથે સાથે મિડકેપ અને સ્મોલકેપ શેરોમાં પણ ભારે વેચવાલીનું દબાણ છે.

BSE સેન્સેક્સ: હાલમાં 1836.80 પોઇન્ટ (એટલે કે 2.33%) ના મોટા ઘટાડા સાથે 77,082.10 ના સ્તર પર પહોંચી ગયો છે.

નિફ્ટી 50: 551.85 પોઇન્ટ (એટલે કે 2.26%) ના ઘટાડા સાથે 23,898.60ના આંકડા પર ટ્રેડ કરી રહ્યો છે.