Crude Oil Price: મિડલ ઈસ્ટમાં યુદ્ધનો ભડકો, કાચા તેલના ભાવ ઉછળીને 97 ડોલરને પાર, જાણો બજારની સ્થિતિ

Crude Oil Price: પશ્ચિમ એશિયામાં ફરી એકવાર યુદ્ધના વાદળો ઘેરાયા છે, જેની સીધી અને ગંભીર અસર ગ્લોબલ માર્કેટ પર પડી રહી છે. યુદ્ધની સ્થિતિને કારણે દુનિયાભરમાં કાચા તેલના સપ્લાયને લઈને ચિંતા વધી ગઈ છે, જેના પરિણામે કાચા તેલના ભાવમાં જોરદાર ભડકો જોવા મળ્યો છે.

સતત ત્રીજા દિવસે ક્રૂડના ભાવમાં ઉછાળો

મિડલ ઈસ્ટમાં તણાવ વધવાથી નિરાશાનો માહોલ છે, અને આ કારણે સતત ત્રીજા દિવસે ક્રૂડ ઓઈલ મોંઘુ થયું છે. અગાઉના બે ટ્રેડિંગ સેશનમાં પણ તેલની કિંમતોમાં 7% થી વધુનો મોટો ઉછાળો આવ્યો હતો. આજના લેટેસ્ટ આંકડા પર નજર કરીએ તો:

બ્રેન્ટ ક્રૂડ : કિંમતમાં 1.13% નો વધારો થયો છે, જેનાથી ભાવ $97.08 પ્રતિ બેરલ પર પહોંચી ગયો છે.

WTI ક્રૂડ : કિંમતમાં 1.24% નો ઉછાળો નોંધાયો છે, અને ભાવ $94.92 પ્રતિ બેરલ થઈ ગયો છે.

ઈઝરાયેલ, લેબનોન અને ઈરાન વચ્ચે ઘર્ષણ

હાલમાં ઈઝરાયેલ દ્વારા લેબનોન પર સતત હુમલાઓ ચાલુ છે. આ કારણે અમેરિકા અને ઈરાનવચ્ચે ચાલી રહેલી શાંતિ વાટાઘાટો ખતરામાં મુકાઈ ગઈ છે. બીજી તરફ, સોશિયલ મીડિયા પ્લેટફોર્મ 'X' પર યુએસ સેન્ટ્રલ કમાન્ડએ માહિતી આપી છે કે ઈરાને કુવૈત અને બહેરીન પર બેલિસ્ટિક મિસાઈલો છોડી હતી, જોકે તેને રસ્તામાં જ તોડી પાડવામાં આવી છે. આના જવાબમાં અમેરિકી સેનાએ ઈરાનના કેશમ આઈલેન્ડ પર જવાબી હુમલા કર્યા છે.