સોના-ચાંદીના ભાવમાં ઘટાડો ચાલુ રહેશે કે આવશે તેજી? જાણો અમેરિકા-ઈરાન તણાવ વચ્ચે શું કહે છે માર્કેટ એક્સપર્ટ્સ

પશ્ચિમ એશિયામાં ફરી એકવાર યુદ્ધનો માહોલ ગરમાયો છે. અમેરિકા અને ઈરાન વચ્ચે ચાલી રહેલા સંઘર્ષ, ક્રૂડ ઓઈલના ભાવમાં થતી વધઘટ અને મોંઘવારીના આંકડાઓ પર રોકાણકારોની સીધી નજર છે. આ તમામ ગ્લોબલ પરિબળોની વચ્ચે આગામી સપ્તાહે સોના અને ચાંદીના ભાવમાં ભારે ઉતાર-ચઢાવ જોવા મળી શકે છે. માર્કેટ એક્સપર્ટ્સનું માનવું છે કે કિંમતી ધાતુઓમાં હાલ પૂરતો ઘટાડાનો ટ્રેન્ડ જળવાઈ રહી શકે છે. વ્યાજદરો અંગે લેવાતા નિર્ણયો પણ બજારની દિશા નક્કી કરશે.

અમેરિકા અને ઈરાન વચ્ચેના સંઘર્ષની બજાર પર અસર

પશ્ચિમ એશિયામાં બગડતી સ્થિતિએ ગ્લોબલ માર્કેટની ચિંતામાં મોટો વધારો કર્યો છે. થોડા દિવસો પહેલા ઈરાને મંજૂરી વગર પસાર થતા એક જહાજ પર હુમલો કર્યો હતો અને ત્યારબાદ 'સ્ટ્રેટ ઓફ હોર્મુઝ' બંધ કરવાની જાહેરાત કરી દીધી હતી. આના જવાબમાં અમેરિકન સેનાએ ઈરાન પર હુમલા કર્યા. જેનો વળતો પ્રહાર કરતા ઈરાને સંયુક્ત આરબ અમીરાત, કુવૈત અને બહેરીનમાં આવેલા અમેરિકન સૈન્ય મથકોને નિશાન બનાવ્યા. આ યુદ્ધની સ્થિતિએ રોકાણકારોને સાવચેત કરી દીધા છે.

માર્કેટ એક્સપર્ટ્સ શું આગાહી કરે છે?

જેએમ ફાઇનાન્સિયલ સર્વિસિસના સિનિયર વાઇસ પ્રેસિડેન્ટ પ્રણવ મેરના જણાવ્યા મુજબ, અત્યારે સોના અને ચાંદીમાં ઘટાડો અને 'કરેક્શન' નો તબક્કો ચાલી રહ્યો છે. બજારનું પૂરું ધ્યાન અમેરિકા-ઈરાન યુદ્ધ પર કેન્દ્રિત છે. જો આ તણાવ હજુ વધશે તો ક્રૂડ ઓઈલ વધુ મોંઘુ થશે. આવી સ્થિતિમાં રોકાણકારો સુરક્ષિત રોકાણ તરીકે અમેરિકન ડોલર અને યુએસ બોન્ડ યીલ્ડ તરફ વળશે, જેનાથી તે મજબૂત બનશે. આ ઉપરાંત ભારત, યુરોપિયન યુનિયન અને અમેરિકાના મોંઘવારીના આંકડા પણ સેન્ટ્રલ બેન્કોની નાણાકીય નીતિ નક્કી કરવામાં અગત્યનો ભાગ ભજવશે.

સોના-ચાંદીના ભાવમાં નોંધાયો મોટો કડાકો

ગયા સપ્તાહે સ્થાનિક બજારમાં મલ્ટી કોમોડિટી એક્સચેન્જ પર સોના અને ચાંદી બંનેમાં ભારે વેચવાલી જોવા મળી હતી.