શું ડોલર સામે રૂપિયો ગગડીને 100 પર પહોંચી જશે? જાણો માર્કેટ એક્સપર્ટ્સની ચોંકાવનારી આગાહી

છેલ્લા કેટલાક અઠવાડિયાથી ડોલર સામે રૂપિયામાં સતત મોટો ઘટાડો જોવા મળી રહ્યો છે. ખાસ કરીને અમેરિકા-ઇઝરાયેલ અને ઈરાન વચ્ચે યુદ્ધ શરૂ થયા બાદ રૂપિયા પર દબાણ ખૂબ જ વધી ગયું છે. એક તરફ ડોલર મજબૂત થઈ રહ્યો છે અને બીજી તરફ રૂપિયો નબળો પડી રહ્યો છે. ત્યારે રોકાણકારો અને સામાન્ય માણસના મનમાં એક જ સવાલ છે કે, શું રૂપિયો ગગડીને 100 ના લેવલ પર પહોંચી જશે?

એક વર્ષમાં રૂપિયામાં 10% નો મોટો કડાકો

છેલ્લા એક વર્ષની વાત કરીએ તો રૂપિયો લગભગ 10% ગગડ્યો છે. એશિયામાં છેલ્લા કેટલાક મહિનાઓથી સૌથી ખરાબ પ્રદર્શન કરનારી કરન્સીમાં રૂપિયો સામેલ થઈ ગયો છે. આમ તો રૂપિયો પહેલાથી જ નબળો પડી રહ્યો હતો, પરંતુ મધ્ય પૂર્વમાં ચાલી રહેલા યુદ્ધે બળતામાં ઘી હોમવાનું કામ કર્યું છે. વેલ્સ ફાર્ગો અને વેનએકના એનાલિસ્ટ્સનું માનવું છે કે જો ક્રૂડના ભાવ વધવાનું ચાલુ રહેશે, તો રૂપિયાની સ્થિતિ હજુ વધુ બગડશે.

શું રૂપિયો 100 ના લેવલ પર પહોંચશે?

બ્લૂમબર્ગના રિપોર્ટ અને ગ્લોબલ એનાલિસ્ટ્સના જણાવ્યા અનુસાર, ડોલર સામે રૂપિયામાં નબળાઈ હજુ વધી શકે છે. જો ઈરાન સાથેનું યુદ્ધ લાંબુ ચાલશે, તો રૂપિયો 100 ના સ્તર તરફ આગળ વધી શકે તેવી પૂરી શક્યતા છે.

મોંઘા ક્રૂડ ઓઈલનો સીધો માર

ભારત પોતાની ક્રૂડ ઓઈલની જરૂરિયાત પૂરી કરવા માટે મોટાભાગે વિદેશી આયાત પર નિર્ભર છે. ક્રૂડ મોંઘુ થાય એટલે દેશનું ઈમ્પોર્ટ બિલ વધે છે. જેનાથી કરંટ એકાઉન્ટ ડેફિસિટ અને દેશમાં મોંઘવારી બંને વધે છે. અને આ જ કારણોસર રૂપિયો નબળો પડે છે. પશ્ચિમ એશિયામાં યુદ્ધ શરૂ થયા પછી ક્રૂડના ભાવમાં 44% નો ઉછાળો આવ્યો છે અને એક સમયે તે 119.50 ડોલર પ્રતિ બેરલની સપાટી સુધી પહોંચી ગયું હતું.