Ajit Pawar Death: મહારાષ્ટ્રના 'દાદા'નું નિધન! વિમાન દુર્ઘટનામાં ગુમાવ્યો જીવ, જ્યાંથી રાજકારણ શરૂ કર્યું ત્યાં જ લીધા અંતિમ શ્વાસ

Ajit Pawar Plane Crash Maharashtra Deputy CM: મહારાષ્ટ્રના રાજકારણમાંથી આજે સૌથી મોટા અને દુઃખદ સમાચાર સામે આવ્યા છે. મહારાષ્ટ્રના નાયબ મુખ્યમંત્રી (Deputy CM) અને એનસીપીના કદાવર નેતા અજિત પવાર હવે આપણી વચ્ચે રહ્યા નથી. એક વિમાન દુર્ઘટનામાં તેમનું આકસ્મિક નિધન થયું છે. આ સમાચાર આવતા જ મહારાષ્ટ્ર સહિત દેશભરના રાજકીય વર્તુળોમાં શોકનું મોજું ફરી વળ્યું છે.

બારામતીમાં સર્જાયો ગમખ્વાર અકસ્માત

મળતી માહિતી મુજબ, આ ઘટના અજિત પવારના ગઢ ગણાતા બારામતીમાં જ બની હતી. તેમનું વિમાન બારામતી વિસ્તારમાં દુર્ઘટનાનો શિકાર બન્યું હતું. અકસ્માત બાદ અજિત પવાર ગંભીર રીતે ઘાયલ થયા હતા. તેમને તાત્કાલિક સારવાર માટે સ્થાનિક મેડિકલ કોલેજમાં ખસેડવામાં આવ્યા હતા. ત્યાં ડૉક્ટરોની ટીમે તેમને બચાવવા માટે તમામ પ્રયાસો કર્યા, પરંતુ કમનસીબે તેમનો જીવ બચાવી શકાયો નહીં.

અહેવાલો અનુસાર, આ ભયાનક દુર્ઘટનામાં કુલ 5 લોકોના મોત થયા છે. જેમાં અજિત પવારની સાથે તેમના પીએસઓ (PSO) અને વિમાનના બે ક્રૂ મેમ્બર્સનો પણ સમાવેશ થાય છે.

કુદરતનો ખેલ જુઓ કે અજિત પવારે જ્યાંથી પોતાની રાજકીય સફર શરૂ કરી હતી, ત્યાં જ તેમણે પોતાના અંતિમ શ્વાસ લીધા. બારામતી તેમનો સૌથી મજબૂત રાજકીય ગઢ હતો. તેઓ અહીંથી સતત 7 વખત ધારાસભ્ય તરીકે ચૂંટાઈ આવ્યા હતા. ઉલ્લેખનીય છે કે, 2025ની વિધાનસભા ચૂંટણીમાં પણ તેમણે આ જ બેઠક પરથી પોતાના ભત્રીજા યુગેન્દ્ર પવારને હરાવીને શાનદાર જીત મેળવી હતી.

સત્તાના શિખર પર રહેનાર નેતા

મહારાષ્ટ્રના રાજકારણમાં અજિત પવારની ઓળખ એક એવા નેતા તરીકે હતી જે હંમેશા સત્તાના કેન્દ્રમાં રહ્યા. તેમનો જન્મ 22 જુલાઈ 1959ના રોજ થયો હતો. માત્ર 23 વર્ષની નાની ઉંમરે તેઓ એક સહકારી સુગર ફેક્ટરીના બોર્ડમાં જોડાઈને સક્રિય રાજકારણમાં આવ્યા હતા.

તેમની કારકિર્દી પર નજર કરીએ તો:-

* તેઓ 1991માં બારામતીથી સાંસદ બન્યા હતા.

* 1995થી લઈને અત્યાર સુધી તેઓ સતત વિધાનસભા ચૂંટણી જીતતા આવ્યા હતા.

* તેમણે મહારાષ્ટ્રના નાયબ મુખ્યમંત્રી તરીકે 6 વખત શપથ લીધા હતા, જે એક રેકોર્ડ છે.

* તેમણે સિંચાઈ, જળ સંસાધન અને ગ્રામીણ વિકાસ જેવા મહત્વના ખાતાઓ સંભાળ્યા હતા.

શરદ પવારના વારસદાર તરીકેની ઓળખ

અજિત પવાર પોતાની મહેનત અને આક્રમક શૈલીને કારણે કાકા શરદ પવારના રાજકીય વારસદાર તરીકે ઉભરી આવ્યા હતા. 1995માં પુણે જિલ્લાની બારામતી બેઠક પરથી તેઓ પહેલીવાર ધારાસભ્ય બન્યા અને ત્યારથી મહારાષ્ટ્રના રાજકારણ પર મજબૂત પકડ જમાવી રાખી. 1995, 1999, 2004, 2009, 2014, 2019 અને 2024ની ટર્મમાં તેઓ સતત જીતતા રહ્યા હતા.

આજના આ અકસ્માતથી મહારાષ્ટ્રના રાજકારણના એક પ્રભાવશાળી અધ્યાયનો અકાળે અંત આવ્યો છે. અજિત પવારની વિદાયથી રાજ્યને એક કદી ન પુરાય તેવી ખોટ પડી છે.

આ પણ વાંચો - મહારાષ્ટ્રના દિગ્ગજ નેતા અજિત પવારનું અકાળે નિધન: PM મોદીએ પાઠવી શ્રદ્ધાંજલિ, કહ્યું- ‘આપણે એક લોકપ્રિય નેતા ગુમાવ્યા’