નેપાળમાં જળપ્રલયનો કહેર: હાઇડ્રો પ્રોજેક્ટની ટનલમાં 900થી વધુ ફસાયા, 903ના મોત, જાણો રેસ્ક્યૂ ઓપરેશનની લેટેસ્ટ અપડેટ

Nepal Rescue Operation: નેપાળ પૂર અપડેટ: પડોશી દેશ નેપાળમાં આવેલા વિનાશક પૂર અને હિમસ્ખલને ભારે તારાજી સર્જી છે. તિબેટ બોર્ડર પાસે 26 ઓગસ્ટના રોજ આવેલા આ જળપ્રલયે ઉત્તર અને મધ્ય નેપાળના ગામડાઓનો નકશો બદલી નાખ્યો છે. પૂર અને કાટમાળના કારણે પરિસ્થિતિ એટલી ગંભીર છે કે હાઇડ્રોપાવર પ્રોજેક્ટ્સમાં કામ કરતા સેંકડો મજૂરો અને કર્મચારીઓનો કોઈ અતોપતો નથી. નેપાળ પ્રશાસન અને સેના દ્વારા યુદ્ધના ધોરણે બચાવ કામગીરી ચાલી રહી છે.

હાઇડ્રો પ્રોજેક્ટની ટનલમાં જિંદગીની શોધ

આ હોનારતમાં સૌથી વધુ નુકસાન હાઇડ્રોપાવર સેક્ટરને થયું છે. પ્રાપ્ત આંકડા મુજબ, વિવિધ હાઇડ્રો પ્રોજેક્ટ્સમાંથી કુલ 933 લોકો લાપતા છે. આમાંથી 537 લોકો તો માત્ર 9 પ્રોજેક્ટના જ કર્મચારીઓ છે. બચાવ કામગીરી દરમિયાન સેનાને ‘અપર ત્રિશુલી-3A' હાઇડ્રોપાવર પ્રોજેક્ટની એક ટનલનો છેડો મળ્યો છે. નેપાળી સેનાના પ્રવક્તાના જણાવ્યા અનુસાર, નિષ્ણાતોની ટીમને ટનલના ઉપરના ભાગે 2x3 ફૂટનું એક કાણું મળ્યું છે. સેનાના એક્સપર્ટ્સ ઓક્સિજન સિલિન્ડર સાથે આ સાંકડી જગ્યામાંથી અંદર જઈને ફસાયેલા લોકોને શોધવાનો પ્રયાસ કરી રહ્યા છે. હાલમાં ટનલનો રસ્તો પહોળો કરવાનું કામ ચાલુ છે, જેથી વધુ એક્સપર્ટ્સ અંદર જઈ શકે. જોકે, હજુ સુધી અંદરથી કોઈના જીવંત હોવાના સંકેત મળ્યા નથી.

નેશનલ ડિઝાસ્ટર રિસ્ક રિડક્શન એન્ડ મેનેજમેન્ટ ઓથોરિટીના 31 ઓગસ્ટના રિપોર્ટ મુજબ, આ કુદરતી આફતમાં મૃત્યુઆંક વધીને 903 થઈ ગયો છે. આશ્ચર્યની વાત એ છે કે હજુ પણ 4,247 લોકો લાપતા છે, જેમાં 85 સુરક્ષાકર્મીઓ અને 320 વિદેશી નાગરિકોનો પણ સમાવેશ થાય છે.

કયા જિલ્લામાંથી કેટલા મૃતદેહ મળ્યા?

* ચિતવન: 272

* નવલપરાસી પૂર્વ: 207

* નવલપરાસી પશ્ચિમ: 151

* નુવાકોટ: 95

* ગોરખા: 62

* ધાદિંગ: 55

* તનહું: 37

* રસુવા: 24

ઓળખ માટે DNA અને સ્કૂલ ટાઈનો સહારો

આફતની ભયાનકતાનો અંદાજ એ વાત પરથી લગાવી શકાય કે શબઘરોમાં જગ્યા ખૂટી પડી છે. મળેલા 900થી વધુ મૃતદેહોમાંથી માત્ર 29 ની જ ઓળખ થઈ શકી છે. મોટાભાગના મૃતદેહો ઓળખી ન શકાય તેવી હાલતમાં છે. આથી પ્રશાસન અજ્ઞાત મૃતદેહોના DNA સેમ્પલ લઈને, તેમના શરીર પરના ટેટૂ, ઘરેણાં અને સ્કૂલની ટાઈ જેવા પુરાવાઓનું ટેગ લગાવીને તેમને કામચલાઉ ધોરણે દફનાવી રહ્યું છે, જેથી ભવિષ્યમાં પરિજનો તેમની ઓળખ કરી શકે.

ભારતીય નાગરિકોની શું છે સ્થિતિ?

નેપાળ સ્થિત ભારતીય દૂતાવાસે જણાવ્યું છે કે અત્યાર સુધીમાં 149 ભારતીય નાગરિકોને સુરક્ષિત રીતે બહાર કાઢવામાં આવ્યા છે. અગાઉ 275 ભારતીયો લાપતા હોવાની માહિતી હતી, જેમાંથી હજુ પણ 128 લોકો સાથે કોઈ સંપર્ક થઈ શક્યો નથી. જોકે, રાહતની વાત એ છે કે ભારત સરકાર દ્વારા હજુ સુધી કોઈ ભારતીય નાગરિકના મોતના સત્તાવાર અહેવાલ અપાયા નથી.

પરિજનોની આંખમાં આશા અને આંસુ

ખરાબ હવામાન અને સતત વરસાદ છતાં નેપાળી સેના બુલડોઝર અને હેલિકોપ્ટરની મદદથી કાટમાળ હટાવી રહી છે. બીજી તરફ, કાઠમંડુની ત્રિભુવન યુનિવર્સિટી ટીચિંગ હોસ્પિટલની બહાર હજારો લોકો પોતાના સ્વજનોની તસવીરો લઈને ઊભા છે. સંપર્ક વ્યવસ્થા ખોરવાઈ જવાને કારણે રાહત એજન્સીઓ માટે લાપતા લોકો સુધી પહોંચવું એ સૌથી મોટો પડકાર બની ગયો છે. હાલમાં તમામનું ધ્યાન ટનલ અને હાઇડ્રો પ્રોજેક્ટના વિસ્તારોમાં ફસાયેલા લોકોને બચાવવા પર કેન્દ્રિત છે.

આ પણ વાંચો- RBI Plastic Notes: કાગળની નોટો ભૂતકાળ બની જશે! RBI લાવી રહ્યું છે 10 અને 20 ની નવી પ્લાસ્ટિક નોટો, જાણો શું છે ખાસિયત