IPL વિવાદ: બાંગ્લાદેશી ખેલાડીને KKRમાં લેતા શાહરુખ ખાન પર ભડક્યા સાધુ-સંતો, ગણાવ્યો 'દેશદ્રોહી', જાણો વિગતવાર

KKR Controversy: IPL 2026 ની હરાજી તો પૂરી થઈ ગઈ છે, પરંતુ તેનો વિવાદ હજુ શમવાનું નામ નથી લઈ રહ્યો. બોલિવૂડ સુપરસ્ટાર અને કોલકાતા નાઈટ રાઈડર્સ (KKR) ના માલિક શાહરુખ ખાન હાલ ચારેતરફથી ટીકાઓનો સામનો કરી રહ્યા છે. આ વિવાદનું મૂળ કારણ છે તેમની ટીમમાં એક બાંગ્લાદેશી ખેલાડીનો સમાવેશ. ભાજપના નેતાઓ બાદ હવે દેશના મોટા ધર્મગુરુઓ અને સાધુ-સંતો પણ શાહરુખ ખાનની સામે મેદાનમાં ઉતર્યા છે.

શાહરુખ પર ભડક્યા જગતગુરુ રામભદ્રાચાર્ય

નાગપુરમાં એક કાર્યક્રમ દરમિયાન પ્રખ્યાત આધ્યાત્મિક ગુરુ જગતગુરુ રામભદ્રાચાર્યે શાહરુખ ખાન વિરુદ્ધ આકરા પ્રહારો કર્યા હતા. KKR દ્વારા બાંગ્લાદેશી બોલર મુસ્તફિઝુર રહેમાનને ટીમમાં લેવાના નિર્ણય પર નારાજગી વ્યક્ત કરતા તેમણે કહ્યું કે, "આ ખૂબ જ દુર્ભાગ્યપૂર્ણ બાબત છે. શાહરુખ ખાનનું વલણ હંમેશા એક 'દેશદ્રોહી' જેવું જ રહ્યું છે."

રામભદ્રાચાર્યે બાંગ્લાદેશમાં હિન્દુ લઘુમતીઓ પર થઈ રહેલા અત્યાચારોનો મુદ્દો ઉઠાવ્યો હતો. તેમણે સ્પષ્ટ શબ્દોમાં કહ્યું કે ભારત સરકારે આવી ઘટનાઓને બિલકુલ સાંખી ન લેવી જોઈએ. તેમનો આક્રોશ એ વાત પર હતો કે જ્યારે પાડોશી દેશમાં હિન્દુઓ પીડાઈ રહ્યા છે, ત્યારે આપણે ત્યાંના ખેલાડીઓને આવકારી રહ્યા છીએ.

બીજી તરફ, મુંબઈમાં ચાલી રહેલી શ્રીમદ્ ભાગવત કથા દરમિયાન જાણીતા કથાવાચક દેવકીનંદન ઠાકુરે પણ આ મુદ્દે અવાજ ઉઠાવ્યો હતો. તેમણે શાહરુખ ખાનને ચેતવણી આપતા સૂરમાં કહ્યું હતું કે, "તમે એ ન ભૂલતા કે તમને હીરો બનાવનારા આ ભારતીયો જ છે. જે પ્રજા તમને હીરો બનાવી શકે છે, તે તમને ઝીરો પણ બનાવી શકે છે."

દેવકીનંદન ઠાકુરનું કહેવું છે કે જ્યારે બાંગ્લાદેશમાં હિન્દુઓ સાથે હિંસક વ્યવહાર થઈ રહ્યો હોય, ત્યારે ત્યાંના ખેલાડીને ટીમમાં લઈને શાહરુખ ખાને સમાજમાં ખોટો સંદેશો મોકલ્યો છે.

રાજકીય અને સામાજિક આગેવાનો પણ વિરોધમાં

માત્ર હિન્દુ ધર્મગુરુઓ જ નહીં, પરંતુ મુસ્લિમ આગેવાનો અને રાજકીય નેતાઓ પણ આ નિર્ણયનો વિરોધ કરી રહ્યા છે.

મૌલાના ઈફરાહીમ હુસૈન: અલીગઢના શાહી ચીફ મુફ્તીએ કહ્યું કે બાંગ્લાદેશી ખેલાડીને લેવો એ માનવતાને શર્મસાર કરવા સમાન છે. કોઈ પણ બિઝનેસ નૈતિકતાથી ઉપર ન હોવો જોઈએ.

સંગીત સોમ: ભાજપના પૂર્વ ધારાસભ્ય સંગીત સોમે તો બુધવારે શાહરુખ ખાનને સીધા જ 'ગદ્દાર' કહી દીધા હતા.

પ્યારે ખાન: મહારાષ્ટ્ર લઘુમતી આયોગના અધ્યક્ષે પણ કેન્દ્ર સરકારને અપીલ કરી છે કે જ્યા સુધી બાંગ્લાદેશમાં સ્થિતિ સુધરે નહીં, ત્યાં સુધી તેમના ખેલાડીઓ પર પ્રતિબંધ મૂકવો જોઈએ જેથી કડક સંદેશ જાય.

કેમ થયો છે આટલો મોટો હોબાળો?

આ સમગ્ર વિવાદના કેન્દ્રમાં બાંગ્લાદેશનો ફાસ્ટ બોલર મુસ્તફિઝુર રહેમાન છે. IPL 2026 માટે યોજાયેલી હરાજીમાં KKR એ તેને 9 કરોડ રૂપિયા જેવી મોટી રકમ આપીને ખરીદ્યો છે. વિરોધ કરી રહેલા લોકોની દલીલ છે કે બાંગ્લાદેશમાં હાલ હિન્દુઓ અને લઘુમતીઓ પર હુમલાઓ થઈ રહ્યા છે. આવા સંવેદનશીલ સમયે તે દેશના ખેલાડીને કરોડો રૂપિયા આપીને ભારત લાવવો એ રાષ્ટ્રહિત અને લોકોની ભાવનાઓની વિરુદ્ધ છે.

આ પણ વાંચો- BSNL યુઝર્સ માટે ખુશખબર: હવે સિગ્નલ વિના પણ થશે વાત! 1 જાન્યુઆરીથી શરૂ થઈ દમદાર VoWiFi સર્વિસ, જાણો એક્ટિવ કરવાની રીત