World's Richest: લેરી એલિસન બન્યા વિશ્વના સૌથી ધનિક વ્યક્તિ, એક જ દિવસમાં 101 બિલિયન ડોલરનો ઉછાળો

World's Richest: અમેરિકન સોફ્ટવેર કંપની ઓરેકલના સહ-સ્થાપક લેરી એલિસનએ ટેસ્લાના સીઈઓ ઇલોન મસ્કને પછાડીને વિશ્વના સૌથી ધનિક વ્યક્તિનું સ્થાન હાંસલ કર્યું છે. બ્લૂમબર્ગ બિલિયનિયર્સ ઇન્ડેક્સ અનુસાર, ઓરેકલના શેરોમાં બુધવારે 41%નો ઉછાળો નોંધાયો, જેના કારણે એલિસનની નેટ વર્થ 101 બિલિયન ડોલરના વધારા સાથે 393 બિલિયન ડોલરે પહોંચી ગઈ. આ સમયે ઇલોન મસ્કની કુલ સંપત્તિ 385 બિલિયન ડોલર છે. આ એક દિવસમાં નોંધાયેલી સૌથી મોટી વૃદ્ધિ છે.

ઓરેકલના શેરોમાં 41%નો ઉછાળો

81 વર્ષના લેરી એલિસન, જેઓ ઓરેકલના ચેરમેન અને ચીફ ટેક્નોલોજી ઓફિસર છે, તેમની કંપનીના શેરોમાં આ વર્ષે અત્યાર સુધીમાં 45%ની વૃદ્ધિ થઈ ચૂકી હતી. બુધવારે ઓરેકલે અપેક્ષા કરતાં વધુ સારા ત્રિમાસિક પરિણામો જાહેર કર્યા અને ક્લાઉડ ઇન્ફ્રાસ્ટ્રક્ચર બિઝનેસમાં આગળ વધવાની આક્રમક યોજના રજૂ કરી, જેના પરિણામે શેરોમાં 41%નો ચમત્કારિક ઉછાળો નોંધાયો. આ કંપનીના ઇતિહાસમાં એક દિવસની સૌથી મોટી વૃદ્ધિ છે.

ઇલોન મસ્કની ટ્રિલિયન ડોલરની રેસ

બીજી તરફ, ટેસ્લાના શેરોમાં આ વર્ષે 13%નો ઘટાડો થયો છે. જોકે, ટેસ્લાના બોર્ડે ઇલોન મસ્ક માટે 1 ટ્રિલિયન ડોલરનું વેતન પેકેજ પ્રસ્તાવિત કર્યું છે. જો મસ્ક તેમના મહત્વાકાંક્ષી લક્ષ્યોને પૂર્ણ કરે, તો તેઓ વિશ્વના પ્રથમ ટ્રિલિયન ડોલરના ધનિક બની શકે છે. નોંધનીય છે કે, મસ્ક 2021માં પ્રથમ વખત વિશ્વના સૌથી ધનિક બન્યા હતા, પરંતુ પછીથી તેઓ જેફ બેઝોસ અને બર્નાર્ડ આર્નોલ્ટથી પાછળ રહી ગયા હતા. જોકે, ગયા વર્ષે તેમણે ફરી ટોચનું સ્થાન મેળવ્યું હતું.

આ પણ વાંચો- નેતન્યાહુની કતરને ખુલ્લી ચેતવણી: હમાસને ખતમ કરો અથવા અમે ન્યાય કરીશું!