શિલ્પા શેટ્ટી અને રાજ કુંદ્રા વિરુદ્ધ લુકઆઉટ નોટિસ, 60 કરોડની છેતરપિંડીનો આરોપ

મુંબઈ પોલીસે બોલિવૂડ અભિનેત્રી શિલ્પા શેટ્ટી અને તેમના પતિ રાજ કુંદ્રા વિરુદ્ધ 60 કરોડ રૂપિયાની છેતરપિંડીના કેસમાં લુકઆઉટ સર્ક્યુલર જારી કર્યું છે. આરોપ છે કે આ સેલિબ્રિટી દંપતીએ તેમની બંધ થઈ ગયેલી કંપની બેસ્ટ ડીલ ટીવી પ્રાઈવેટ લિમિટેડના રોકાણ સોદા સંબંધિત એક કેસમાં બિઝનેસમેન દીપક કોઠારી પાસેથી 60 કરોડ રૂપિયાની છેતરપિંડી કરી.

દીપક કોઠારીનો આરોપ છે કે 2015થી 2023 દરમિયાન શિલ્પા અને રાજે બિઝનેસ વિસ્તરણના નામે તેમની પાસેથી 60 કરોડ રૂપિયા લીધા, પરંતુ આ રકમનો ઉપયોગ તેમણે અંગત ખર્ચ માટે કર્યો. કોઠારીના જણાવ્યા પ્રમાણે, આ રકમ લોન તરીકે લેવામાં આવી હતી, પરંતુ બાદમાં ટેક્સ બચાવવાના નામે તેને રોકાણ તરીકે દર્શાવવામાં આવી. તેમને ખાતરી આપવામાં આવી હતી કે તેમના પૈસા નિશ્ચિત સમયમાં 12% વાર્ષિક વ્યાજ સાથે પરત કરવામાં આવશે. શિલ્પા શેટ્ટીએ એપ્રિલ 2016માં લેખિતમાં પર્સનલ ગેરંટી પણ આપી હતી, પરંતુ થોડા મહિનામાં જ તેમણે કંપનીના ડિરેક્ટર પદ પરથી રાજીનામું આપી દીધું.

કોઠારીએ દાવો કર્યો કે તેમને બાદમાં જાણ થઈ કે કંપની સામે 1.28 કરોડ રૂપિયાનો દિવાળિયાપણાનો કેસ પણ ચાલી રહ્યો છે, જેની જાણકારી તેમને અગાઉ આપવામાં આવી ન હતી. મુંબઈ પોલીસની આર્થિક અપરાધ શાખા (EOW) હવે શિલ્પા અને રાજના ટ્રાવેલ રેકોર્ડની તપાસ કરી રહી છે. કંપનીના ઓડિટરને પણ પૂછપરછ માટે બોલાવવામાં આવ્યા છે.

શિલ્પા અને રાજનો આરોપોનો ઇનકાર

શિલ્પા શેટ્ટી અને રાજ કુંદ્રા તે સમયે બેસ્ટ ડીલ ટીવી પ્રાઈવેટ લિમિટેડના ડિરેક્ટર હતા, જે હોમ શોપિંગ અને ઓનલાઈન રિટેલ પ્લેટફોર્મ હતું. ફરિયાદ મુજબ, તેમણે આર્યા મારફતે 75 કરોડ રૂપિયાની લોન માગી હતી, પરંતુ ઊંચા ટેક્સથી બચવા માટે તેને રોકાણ તરીકે દર્શાવ્યું હતું.

જોકે, શિલ્પા અને રાજના વકીલ પ્રશાંત પાટીલે આ આરોપોને નકારી કાઢ્યા છે. તેમણે જણાવ્યું, “આ બધા આરોપો ખોટા છે. તેમાં કોઈ સત્ય નથી.” તેમણે ઉમેર્યું કે તેમને હજુ સુધી FIRની કૉપી મળી નથી, અને જ્યારે તે મળશે ત્યારે આરોપોની સાચી માહિતી મળશે. તેમણે કહ્યું, “આ લેનદેન 7-8 વર્ષ જૂનું છે. જો કોઈને લાગે કે તેની સાથે અન્યાય થયો છે, તો તે 8-10 વર્ષ સુધી ફરિયાદ કરવાની રાહ નથી જોતું. દરેક બાબતના દસ્તાવેજી પુરાવા ઉપલબ્ધ છે.” તેમણે વધુમાં જણાવ્યું કે તેઓ તપાસ એજન્સીઓ સમક્ષ પોતાનું સત્ય રજૂ કરશે અને સત્ય બહાર આવશે.

આ પણ વાંચો- શેર બજારમાં ભારે ઉથલપાથલ: સેન્સેક્સ ટોપથી 715 પોઈન્ટ તૂટ્યો, આ 4 કારણો જવાબદાર