દિલ્હીમાં મહાવિનાશક અગ્નિકાંડ: ફ્લોરિશ સ્ટે હોટલમાં ભીષણ આગથી 21 લોકોના મોત, મૃતકોમાં મોટાભાગના વિદેશી નાગરિકો

દિલ્હીના માલવીય નગર વિસ્તારમાંથી એક અત્યંત હૃદયદ્રાવક અને કંપાવનારી દુર્ઘટના સામે આવી છે. હૌઝ રાની વિસ્તારમાં આવેલી એક પ્રખ્યાત હોટલમાં આજે સવારે અચાનક ભીષણ આગ ફાટી નીકળી હતી. આ ગોઝારી ઘટનામાં અત્યાર સુધીમાં 21 લોકોના કમકમાટીભર્યા મોત નિપજ્યા છે. સૌથી ચોંકાવનારી વાત એ છે કે જીવ ગુમાવનારાઓમાં મોટાભાગના વિદેશી નાગરિકો છે.

ક્યાં અને કેવી રીતે લાગી આગ?

આ દુર્ઘટના પાંચ માળની બિલ્ડિંગમાં આવેલી ફ્લોરિશ સ્ટે હોટલમાં બની છે. બિલ્ડિંગના બેઝમેન્ટમાં 'લેમન ગ્રીન રેસ્ટોરન્ટ' આવેલું છે. સવારે આશરે 8:50 વાગ્યાની આસપાસ આ રેસ્ટોરન્ટમાંથી આગ શરૂ થઈ હતી અને જોતજોતામાં જ આગની જ્વાળાઓએ આખી હોટલને પોતાની લપેટમાં લઈ લીધી હતી.

37 લોકોનું સફળ રેસ્ક્યૂ, 21 ના મોત

VIDEO | Death toll in fire in restaurant in south Delhi's Malviya Nagar goes up to 18, many of those killed are foreigners: officials. Latest visuals from the spot as relief and rescue operations continue.#DelhiNews #MalviyaNagarFire (Full video available on PTI Videos -… pic.twitter.com/entmWpFjw0

— Press Trust of India (@PTI_News) June 3, 2026

રસોઈયાની આંખે દેખી આપવીતી

હોટલના રેસ્ટોરન્ટમાં કામ કરતા મુખ્ય રસોઈયા કેસર સિંહે આ ભયાનક દ્રશ્ય અંગે માહિતી આપતા જણાવ્યું કે, "સવારે આશરે 8:00 વાગ્યે મેં કામ શરૂ કરવા માટે ઈલેક્ટ્રિક સ્ટવ ચાલુ કરવાનો પ્રયાસ કર્યો હતો. બસ એ જ વખતે અચાનક આગ ભભૂકી ઉઠી હતી. મેં તરત જ મારા આસિસ્ટન્ટને બૂમ પાડી અને અમે જેમ-તેમ કરીને હોટલની બહાર દોડી જઈને અમારો જીવ બચાવ્યો."

ફાયર વિભાગની 10 ગાડીઓ કામે લાગી

આગની ગંભીરતાને ધ્યાનમાં રાખીને સવારે 9:00 વાગ્યે કોલ મળતા જ ફાયર બ્રિગેડની 10 ગાડીઓ ઘટનાસ્થળે પહોંચી ગઈ હતી. દિલ્હી ફાયર સર્વિસના અધિકારી મુજબ, શરૂઆતમાં જ બે વોટર ટેન્ડર, બે વોટર બોઝર અને એક ક્વિક રિસ્પોન્સ વ્હીકલ તૈનાત કરી દેવાયા હતા.

તંત્ર દોડતું થયું, ધારાસભ્ય પહોંચ્યા ઘટનાસ્થળે

આ ઘટનાની જાણ થતા જ માલવીય નગરના ધારાસભ્ય સતીશ ઉપાધ્યાય ઘટનાસ્થળે દોડી ગયા હતા. તેમણે જણાવ્યું કે, પરિસ્થિતિ જોતા જ અમે ડિઝાસ્ટર મેનેજમેન્ટ ટીમ, જિલ્લા મેજિસ્ટ્રેટ, SDM અને MCDના ડેપ્યુટી કમિશનરને જાણ કરી દીધી હતી. સ્થાનિક લોકોએ પણ બચાવ કામગીરીમાં ખૂબ મોટી મદદ કરી છે.

બીજી તરફ, સાઉથ દિલ્હીના SDM અને DDMA અધિકારી જીતેન્દ્ર કુમારે કહ્યું કે, માહિતી મળતા જ DDMA સેલ સક્રિય કરાયો હતો. પ્રાથમિક તપાસમાં આગ રેસ્ટોરન્ટમાંથી જ શરૂ થઈ હોવાનું જાણવા મળ્યું છે.

આ પણ વાંચો-પટનામાં ખાન સરના કોચિંગ સેન્ટર બહાર અંધાધૂંધ ફાયરિંગ, સિક્યુરિટી ગાર્ડ ઘાયલ, ખાન સરે માંગી સુરક્ષા