ગુજરાતમાં મેઘતાંડવનું સંકટ! હવામાન વિભાગનું ભયંકર રેડ એલર્ટ, જાણો અમદાવાદથી સુરત સુધી આગામી 5 દિવસ કેવો પડશે વરસાદ

Gujarat weather forecast: છેલ્લા 2 દિવસથી ગુજરાતમાં મેઘરાજાએ જાણે રૌદ્ર સ્વરૂપ ધારણ કર્યું છે. સતત વરસી રહેલા મુશળધાર વરસાદને કારણે જનજીવન સંપૂર્ણપણે અસ્તવ્યસ્ત થઈ ગયું છે. ખાસ કરીને દક્ષિણ અને મધ્ય ગુજરાતના અનેક વિસ્તારોમાં જળબંબાકાર અને પૂર જેવી ભયાનક સ્થિતિ સર્જાઈ છે. જો તમે એવું વિચારતા હોવ કે હવે વરસાદથી રાહત મળશે, તો હજુ સાવધાન રહેવાની જરૂર છે! ભારતીય હવામાન વિભાગ એ આગામી 29 જુલાઈ સુધી રાજ્યમાં ભારેથી અતિભારે વરસાદની ચેતવણી આપી છે.

હવામાન વિભાગના લેટેસ્ટ અપડેટ મુજબ, અરબી સમુદ્ર અને બંગાળની ખાડીમાં એકસાથે અનેક સિસ્ટમ સક્રિય થવાને કારણે ગુજરાત પર મોટી આફત તોળાઈ રહી છે. ચાલો જાણીએ આગામી દિવસોમાં કયા જિલ્લામાં કેવો વરસાદ પડશે.

24 થી 29 જુલાઈ સુધીની તારીખવાર વરસાદની આગાહી:

24 જુલાઈ (શુક્રવાર): પંચમહાલ, દાહોદ અને મહીસાગર જિલ્લામાં અત્યંત ભારે વરસાદનું 'રેડ એલર્ટ' આપવામાં આવ્યું છે. જ્યારે અમદાવાદ, સુરત, ગાંધીનગર, સાબરકાંઠા, અરવલ્લી, ખેડા, આણંદ, વડોદરા, છોટાઉદેપુર, ભરૂચ, નવસારી, વલસાડ, દમણ, દાદરા નગર હવેલી અને સુરેન્દ્રનગરમાં 'ઓરેન્જ એલર્ટ' જાહેર કરાયું છે. ઉત્તર ગુજરાત અને સૌરાષ્ટ્રના બાકીના વિસ્તારોમાં યલો એલર્ટ છે.

26 જુલાઈ (રવિવાર): સાબરકાંઠા અને બનાસકાંઠામાં વરસાદનું જોર યથાવત રહેશે અને ત્યાં 'ઓરેન્જ એલર્ટ' અપાયું છે. બાકીના તમામ જિલ્લાઓમાં ગાજવીજ અને પવન સાથે હળવાથી મધ્યમ વરસાદ પડી શકે છે.

27 જુલાઈ (સોમવાર): ઉત્તર ગુજરાતના બનાસકાંઠા, વાવ-થરાદ, પાટણ, મહેસાણા અને સાબરકાંઠામાં ભારે વરસાદ પડવાની સંભાવના છે (યલો એલર્ટ). જ્યારે બાકીના ગુજરાતમાં માત્ર હળવા વરસાદી ઝાપટાં જ પડશે.

28 અને 29 જુલાઈ (મંગળ-બુધ): રાહતના સમાચાર એ છે કે 28 તારીખથી વરસાદનું જોર ઘટવા લાગશે. 28 જુલાઈએ માત્ર બનાસકાંઠા, પાટણ, મહેસાણા, સાબરકાંઠા અને વાવ-થરાદમાં યલો એલર્ટ રહેશે. ત્યારબાદ 29 જુલાઈથી સમગ્ર ગુજરાતમાં ભારે વરસાદની કોઈ ચેતવણી નથી, માત્ર હળવાથી મધ્યમ વરસાદની જ સંભાવના છે.

ગુજરાતમાં અચાનક આટલો ભારે વરસાદ કેમ વરસી રહ્યો છે?

હવામાન નિષ્ણાતોના જણાવ્યા અનુસાર, હાલમાં ગુજરાત અને તેની આસપાસ એક સાથે 3 થી 4 જેટલી મજબૂત હવામાન સિસ્ટમ્સ (Weather Systems) સક્રિય થઈ છે:

મોન્સૂન ટ્રફ (Monsoon Trough): દરિયાઈ સપાટી પર બનેલી આ સિસ્ટમ જેસલમેર અને કોટાથી લઈને છેક ઉત્તર-પૂર્વ બંગાળની ખાડી સુધી લંબાયેલી છે.

ઈસ્ટ-વેસ્ટ શીયર ઝોન (Shear Zone): અરબ સાગરથી મણિપુર સુધીનો એક પટ્ટો દક્ષિણ ગુજરાત અને મધ્ય પ્રદેશ પરથી પસાર થઈ રહ્યો છે, જેમાં સાયક્લોનિક સરક્યુલેશન પણ ભળી ગયું છે.

વેસ્ટર્ન ડિસ્ટર્બન્સ: જમ્મુ પર વેસ્ટર્ન ડિસ્ટર્બન્સ અને રાજસ્થાન પર અપર એર સાયક્લોનિક સરક્યુલેશન સક્રિય છે.

આ તમામ સિસ્ટમ્સ ભેગી મળીને પશ્ચિમી પવનો દ્વારા ગુજરાત તરફ મોટા પ્રમાણમાં ભેજ ખેંચી રહી છે, જેના કારણે રાજ્યમાં આવો મેઘતાંડવ જોવા મળી રહ્યો છે. નાગરિકોને નદી-નાળાથી દૂર રહેવા અને વહીવટી તંત્રની સૂચનાઓનું પાલન કરવા અપીલ કરવામાં આવી છે.

આ પણ વાંચો- શેરબજારમાં મોટો કડાકો: સેન્સેક્સ 700 પોઈન્ટ તૂટ્યો, નિફ્ટી 23700ની નીચે, જાણો કેમ બગડ્યો માર્કેટનો મૂડ?