નીતિ આયોગનો મોટો પ્રસ્તાવ: ચીની રોકાણ પરનો પ્રતિબંધ હળવો કરવાની ભલામણ

NITI Aayog Chinese investment: ભારતની ટોચની નીતિ નિર્માણ સંસ્થા નીતિ આયોગે ચીની રોકાણો પરના કડક નિયમોને હળવા કરવાનો મહત્વપૂર્ણ પ્રસ્તાવ આગળ ધર્યો છે. આ પ્રસ્તાવ મુજબ, ચીની કંપનીઓને ભારતીય કંપનીઓમાં 24% સુધીનો હિસ્સો ખરીદવા માટે સુરક્ષા મંજૂરીની જરૂર નહીં પડે. આ પગલું ભારતમાં ઘટી રહેલા ફોરેન ડાયરેક્ટ ઇન્વેસ્ટમેન્ટ (FDI)ને વધારવા અને અર્થતંત્રને ગતિ આપવાના હેતુથી લેવામાં આવ્યું છે.

2020માં ગલવાન ખીણમાં ભારત-ચીન સૈન્ય અથડામણ બાદ ભારતે સરહદી દેશોમાંથી આવતા રોકાણો માટે કડક નિયમો લાગુ કર્યા હતા. આ નિયમો હેઠળ ચીની કંપનીઓના તમામ રોકાણોને ગૃહ અને વિદેશ મંત્રાલયની મંજૂરી લેવી પડતી હતી. જોકે, આ નિયમોને કારણે ચીની કંપનીઓના મોટા રોકાણો, જેમ કે BYDનું 1 બિલિયન ડોલરનું ઇલેક્ટ્રિક વ્હીકલ પ્રોજેક્ટ, અટકી ગયા હતા.

નીતિ આયોગનો પ્રસ્તાવ હવે વાણિજ્ય મંત્રાલય, નાણા મંત્રાલય અને વડાપ્રધાન કાર્યાલયની સમીક્ષા હેઠળ છે. આ પ્રસ્તાવનો હેતુ ભારત-ચીન વચ્ચેના તણાવને ઘટાડવા અને આર્થિક સંબંધોને સુધારવાનો પણ છે. જોકે, આ નિર્ણય અંગે અંતિમ નિર્ણય રાજકીય નેતૃત્વ દ્વારા લેવામાં આવશે, જેમાં થોડા મહિનાઓ લાગી શકે છે.

બીજી તરફ, અમેરિકન રાષ્ટ્રપતિ ડોનાલ્ડ ટ્રમ્પે ભારત પર રશિયાઈ તેલની ખરીદીને લઈને 25%નું વધારાનું ટેરિફ લગાવ્યું છે, જેનાથી ભારતીય અર્થતંત્ર પર દબાણ વધ્યું છે. આ પરિસ્થિતિમાં ચીની રોકાણોને પ્રોત્સાહન આપવું ભારત માટે આર્થિક રીતે ફાયદાકારક બની શકે છે.

આ પ્રસ્તાવથી ભારતના સોલર પેનલ, બેટરી મેન્યુફેક્ચરિંગ જેવા બિન-સંવેદનશીલ ક્ષેત્રોમાં રોકાણ વધવાની શક્યતા છે, જે ભારતના ઉત્પાદન ક્ષેત્રને મજબૂત કરી શકે છે. જોકે, નિષ્ણાતોનું માનવું છે કે આવા નિર્ણયો લેતી વખતે રાષ્ટ્રીય સુરક્ષાને પ્રાથમિકતા આપવી જરૂરી છે.

આ પણ વાંચો- ચેકના પૈસા મળી જશે થોડા જ કલાકોમાં, નહીં લાગે 3 દિવસ, RBIએ સિસ્ટમમાં કર્યા મોટા ફેરફારો, 4 ઓક્ટાબરથી થશે લાગૂ