ચીનમાં SCO સમિટ: જયશંકરે પાકિસ્તાનને આતંકવાદ પર ઝાટક્યું, ચીનને આપી ચેતવણી

ચીનના તિયાનજિનમાં યોજાયેલા શાંઘાઈ કોઓપરેશન ઓર્ગેનાઈઝેશન (SCO)ના વિદેશ મંત્રીઓના સમિટમાં ભારતના વિદેશ મંત્રી એસ. જયશંકરે આતંકવાદના મુદ્દે પાકિસ્તાનને કડક ફટકાર લગાવી અને ચીનને પણ સ્પષ્ટ ચેતવણી આપી. ચીનના રાષ્ટ્રપતિ શી જિનપિંગની હાજરીમાં જયશંકરે પાકિસ્તાનની આતંકવાદને પ્રોત્સાહન આપવાની નીતિ પર સવાલ ઉઠાવ્યા અને ભારતની ઝીરો ટોલરન્સ નીતિનો પુનરોચ્ચાર કર્યો.

વિદેશમંત્રી એસ જયશંકરે 22 એપ્રિલ, 2025ના પહલગામ આતંકી હુમલાનો ઉલ્લેખ કરીને કહ્યું કે આ હુમલો જમ્મુ-કાશ્મીરની પર્યટન અર્થવ્યવસ્થાને નુકસાન પહોંચાડવા અને ધાર્મિક વિભાજન ઊભું કરવાના ઈરાદે કરવામાં આવ્યો હતો. તેમણે ભારતના 'ઓપરેશન સિંદૂર'ને સંપૂર્ણપણે યોગ્ય ગણાવ્યું, જે આ હુમલાના જવાબમાં પાકિસ્તાનના આતંકી ઠેકાણાઓ પર કરવામાં આવેલી કાર્યવાહી હતી. તેમણે કહ્યું, "ભારતે આતંકવાદનો સામનો કરવા માટે કડક પગલાં લીધાં છે અને આગળ પણ લેતું રહેશે."

ચીનની BRI પર પરોક્ષ ટીકા

જયશંકરે ચીનની બેલ્ટ એન્ડ રોડ ઈનિશિયેટિવ (BRI)ની પરોક્ષ ટીકા કરતાં કહ્યું કે SCOનો સહકાર "પરસ્પર સન્માન, સંપ્રભુ સમાનતા અને સભ્ય દેશોની પ્રાદેશિક અખંડિતતા" પર આધારિત હોવો જોઈએ. આ નિવેદન ચીનની BRI પરિયોજનાને લઈને ભારતની ચિંતાઓને દર્શાવે છે, જે પાકિસ્તાન-અધિકૃત કાશ્મીરમાંથી પસાર થાય છે.

જયશંકરની આ કડક ટીકા બાદ પાકિસ્તાનના વિદેશ મંત્રી ઈશાક ડારનો સૂર નરમ પડ્યો. તેમણે કહ્યું કે પાકિસ્તાન શાંતિ અને સ્થિરતા પર આધારિત સંબંધો ઈચ્છે છે. જયશંકરે એસસીઓને તેના મૂળ ઉદ્દેશ્યો આતંકવાદ, અલગાવવાદ અને ઉગ્રવાદ સામે લડવા પર અડગ રહેવા અને "કોઈ સમજૂતી વિના" કાર્યવાહી કરવા હાકલ કરી.

શી જિનપિંગ સાથે મુલાકાત

જયશંકરે ચીનના રાષ્ટ્રપતિ શી જિનપિંગ સાથે પણ મુલાકાત કરી અને ભારત-ચીન સંબંધોની તાજેતરની પ્રગતિ વિશે ચર્ચા કરી. તેમણે રાષ્ટ્રપતિ દ્રૌપદી મુર્મુ અને વડાપ્રધાન નરેન્દ્ર મોદીની શુભેચ્છાઓ પણ આપી.

આંતરરાષ્ટ્રીય સમર્થન

જયશંકરે યુએન સિક્યુરિટી કાઉન્સિલના નિવેદનનો ઉલ્લેખ કર્યો, જેણે પહલગામ હુમલાની કડક નિંદા કરી હતી અને આતંકવાદીઓ, તેમના આયોજકો, ફાઈનાન્સર્સ અને સ્પોન્સર્સને જવાબદાર ઠેરવવાની જરૂરિયાત પર ભાર મૂક્યો હતો. તેમણે કહ્યું, "અમે આ દિશામાં કામ કર્યું છે અને આગળ પણ કરતા રહીશું."

SCOનું મહત્વ

SCO જેમાં ભારત, ચીન, રશિયા, પાકિસ્તાન, ઈરાન અને અન્ય દેશોનો સમાવેશ થાય છે, તે એક મહત્વનું આંતરરાષ્ટ્રીય મંચ છે. જયશંકરે આર્થિક સહકાર, વેપાર અને કનેક્ટિવિટી વધારવા માટે પરિવહન સુવિધાઓ અને ઈન્ટરનેશનલ નોર્થ-સાઉથ ટ્રાન્સપોર્ટ કોરિડોર (INSTC)ને પ્રોત્સાહન આપવાની જરૂરિયાત પર ભાર મૂક્યો.

આ પણ વાંચો- ભારતે હાઈપરસોનિક મિસાઈલનું સફળ કર્યું પરીક્ષણ: પ્રોજેક્ટ વિષ્ણુએ રચ્યો ઈતિહાસ!