શંકરાચાર્ય અવિમુક્તેશ્વરાનંદ મુસીબતમાં: માઘ મેળામાં તંત્ર સાથે વિવાદ વકર્યો, 48 કલાકમાં બીજી નોટિસ, પ્રતિબંધની ચેતવણી

Magh Mela 2026: ઉત્તર પ્રદેશના પ્રયાગરાજમાં સંગમ તટ પર ચાલી રહેલા પવિત્ર માઘ મેળામાં અત્યારે ભક્તિ કરતા વિવાદો વધારે ચર્ચામાં છે. મેળા પ્રશાસન (તંત્ર) અને જ્યોતિષ પીઠના સ્વામી અવિમુક્તેશ્વરાનંદ સરસ્વતી વચ્ચે ચાલી રહેલી ખેંચતાણ હવે આરપારની લડાઈ પર આવી ગઈ છે. તંત્ર દ્વારા સ્વામીજીને માત્ર 48 કલાકની અંદર બીજી કડક નોટિસ ફટકારવામાં આવી છે. એટલું જ નહીં, જો 24 કલાકમાં સંતોષકારક જવાબ નહીં મળે તો તેમને મેળામાં પ્રવેશવા પર પ્રતિબંધ (Ban) મુકવાની ચીમકી પણ આપવામાં આવી છે.

શું છે સમગ્ર વિવાદ? તંત્રએ કેમ આપી નોટિસ?

આ આખા વિવાદની શરૂઆત મૌની અમાવસ્યાના શાહી સ્નાન દરમિયાન થઈ હતી. તંત્રનો આરોપ છે કે જ્યારે સંગમ તટ પર લાખો શ્રદ્ધાળુઓની ભીડ ઉમટી હતી, ત્યારે સ્વામી અવિમુક્તેશ્વરાનંદે નિયમોને નેવે મુક્યા હતા.

પ્રતિબંધિત વિસ્તારમાં બગ્ગી: નોટિસ મુજબ, જે વિસ્તારમાં વાહનો લઈ જવાની મનાઈ હતી, ત્યાં સ્વામીજી પોતાની બગ્ગી લઈને પહોંચી ગયા હતા.

વ્યવસ્થા ખોરવાઈ: આ મનમાનીને કારણે મેળાની વ્યવસ્થા ખોરવાઈ ગઈ હતી અને પોલીસને લાખો લોકોની ભીડ સંભાળવામાં પરસેવો પડી ગયો હતો. તંત્રનું કહેવું છે કે આનાથી શ્રદ્ધાળુઓની સુરક્ષા જોખમમાં મુકાઈ હતી.

'શંકરાચાર્ય' પદના ઉપયોગ પર વાંધો

મામલો માત્ર નિયમો તોડવા પૂરતો સીમિત નથી રહ્યો. મેળા પ્રશાસને હવે સીધો સ્વામીજીના હોદ્દા પર નિશાન સાધ્યું છે. બીજી નોટિસમાં ગંભીર સવાલ ઉઠાવતા તંત્રએ કહ્યું છે કે સ્વામી અવિમુક્તેશ્વરાનંદ પોતાને 'શંકરાચાર્ય' ગણાવીને મેળામાં ઠેર-ઠેર મોટા બેનરો અને બોર્ડ લગાવી રહ્યા છે.

પ્રશાસનના દાવા મુજબ, સુપ્રીમ કોર્ટે તેમના દ્વારા 'શંકરાચાર્ય' પદ કે નામનો ઉપયોગ કરવા પર રોક (Stay) લગાવી છે. આમ છતાં તેઓ આ પદનો પ્રચાર કરી રહ્યા છે, જે સીધેસીધું સુપ્રીમ કોર્ટના આદેશનું ઉલ્લંઘન છે અને કોર્ટની અવમાનના (Contempt of Court) સમાન છે. આ મુદ્દાને આગળ ધરીને તંત્ર હવે કડક કાર્યવાહીના મૂડમાં છે.

સ્વામીજીના સમર્થકોમાં રોષ: 'સરકાર બદલો લઈ રહી છે'

બીજી બાજુ, સ્વામીજીના આશ્રમ અને તેમના સમર્થકોમાં આ કાર્યવાહીને લઈને ભારે ગુસ્સો છે. સ્વામી અવિમુક્તેશ્વરાનંદના મીડિયા પ્રભારી શૈલેન્દ્ર યોગીરાજ સરકારે વહીવટી તંત્ર પર ગંભીર આક્ષેપો કર્યા છે. તેમનું કહેવું છે કે સરકાર "બદલાની ભાવના" થી કામ કરી રહી છે અને સ્વામીજીને હેરાન કરવામાં આવી રહ્યા છે.

તેમણે એક ચોંકાવનારો દાવો પણ કર્યો કે, તંત્રએ ચોરીછૂપીથી જૂની તારીખની નોટિસ તેમના ટેન્ટની પાછળના ભાગે ચોંટાડી દીધી હતી, જે નિયમો વિરુદ્ધ છે. સમર્થકોનું કહેવું છે કે આ બધું જાણીજોઈને કરવામાં આવી રહ્યું છે.

હવે આગળ શું થશે?

હાલ તો આ મામલો ગરમાયો છે. પ્રાપ્ત માહિતી મુજબ, સ્વામીજીના પક્ષે નોટિસનો જવાબ તૈયાર કરી લીધો છે અને ટૂંક સમયમાં તે તંત્રને સોંપવામાં આવશે. હવે જોવાનું એ રહે છે કે તંત્ર આ જવાબથી સંતુષ્ટ થાય છે કે કેમ? જો તંત્રને જવાબ યોગ્ય નહીં લાગે, તો સ્વામી અવિમુક્તેશ્વરાનંદ માટે મુશ્કેલીઓ વધી શકે છે. તેમને મળેલી સરકારી સુવિધાઓ પાછી ખેંચી લેવામાં આવી શકે છે, તેમના શિબિર (કેમ્પ) ની જમીન રદ થઈ શકે છે અને તેમને મેળામાંથી બહાર પણ કરવામાં આવી શકે છે. આવનારા 24 કલાક આ મામલે ખૂબ જ મહત્વના સાબિત થશે.

આ પણ વાંચો- ગ્લોબલ ઇન્વેસ્ટર્સનું નવું સરનામું બનશે ભારત? અશ્વિની વૈષ્ણવે WEF માં આપ્યો 'Autumn Davos' નો સંકેત