સોનપ્રયાગ-કેદારનાથ રોપવે પ્રોજેક્ટ: અદાણી ગ્રૂપને મળ્યો કોન્ટ્રાક્ટ, 36 મિનિટમાં પહોંચાશે મંદિર

Sonprayag-Kedarnath Ropeway: ઉત્તરાખંડના પવિત્ર કેદારનાથ ધામની યાત્રાને વધુ સરળ અને ઝડપી બનાવવા માટે એક મહત્વપૂર્ણ પગલું ભરાયું છે. અદાણી ગ્રૂપની અગ્રણી કંપની અદાણી એન્ટરપ્રાઇઝ લિમિટેડને સોનપ્રયાગથી કેદારનાથ ધામ સુધીના 13 કિલોમીટર લાંબા રોપવે પ્રોજેક્ટનું કામ સોંપવામાં આવ્યું છે. આ પ્રોજેક્ટ દ્વારા દર વર્ષે લાખો તીર્થયાત્રીઓને સુવિધા મળશે અને મંદિર સુધીની યાત્રા માત્ર 36 મિનિટમાં પૂર્ણ થશે, જે હાલમાં 8થી 9 કલાકનો સમય લે છે.

આ રોપવે પ્રોજેક્ટને કેન્દ્રીય મંત્રીમંડળે માર્ચ 2025માં મંજૂરી આપી હતી. આની અંદાજિત કિંમત 4,081 કરોડ રૂપિયા છે. હાલમાં સોનપ્રયાગથી કેદારનાથ મંદિર સુધી પહોંચવા માટે 16 કિલોમીટરની કઠિન ચડતી ચડવી પડે છે, અથવા ખચ્ચર, પાલખી કે હેલિકોપ્ટરનો ઉપયોગ કરવો પડે છે. નવો રોપવે આ યાત્રાને ઝડપી, સલામત અને પર્યાવરણને અનુકૂળ બનાવશે. આ રોપવે દ્વારા દર કલાકે એક દિશામાં 1,800 યાત્રીઓનું પરિવહન થઈ શકશે.

પ્રોજેક્ટની વિગતો અને સમયરેખા

અદાણી ગ્રૂપે જણાવ્યું કે, આ પ્રોજેક્ટનું કામ નેશનલ હાઇવે લોજિસ્ટિક્સ મેનેજમેન્ટ લિમિટેડ (NHLML) દ્વારા સોંપવામાં આવ્યું છે. આ પ્રોજેક્ટ પર્વતમાલા પરિયોજનાના ભાગરૂપે પબ્લિક-પ્રાઇવેટ પાર્ટનરશિપ (PPP) મોડલ હેઠળ વિકસાવવામાં આવશે. આ રોપવેનું નિર્માણ કામ આગામી 6 વર્ષમાં પૂર્ણ થવાની અપેક્ષા છે. નિર્માણ પૂર્ણ થયા બાદ અદાણી ગ્રૂપ આ રોપવેનું સંચાલન 29 વર્ષ સુધી કરશે.

અદાણી ગ્રૂપનો દૃષ્ટિકોણ

અદાણી ગ્રૂપના ચેરમેન ગૌતમ અદાણીએ જણાવ્યું, “આ રોપવે માત્ર એક ઇન્ફ્રાસ્ટ્રક્ચર પ્રોજેક્ટ નથી, પરંતુ ભક્તિ અને આધુનિક ટેક્નોલોજીને જોડતો સેતુ છે. આ પ્રોજેક્ટથી યાત્રીઓની સુરક્ષા અને સુવિધા વધશે, સાથે જ ઉત્તરાખંડમાં રોજગાર અને ટૂરિઝમને પણ પ્રોત્સાહન મળશે.”

કેદારનાથ ધામ, જે રુદ્રપ્રયાગ જિલ્લામાં 3,583 મીટરની ઊંચાઈએ આવેલું છે, ભગવાન શિવના 12 જ્યોતિર્લિંગોમાંથી એક છે. દર વર્ષે અંદાજે 20 લાખ શ્રદ્ધાળુઓ અહીં દર્શન માટે આવે છે. આ રોપવે પ્રોજેક્ટથી યાત્રા વધુ સરળ અને આરામદાયક બનશે, જેનાથી ઉત્તરાખંડના ટૂરિઝમને પણ નવો રંગ મળશે.