Trump vs Carney: અમેરિકા-કેનેડા વચ્ચે જંગ જામ્યો, ટ્રમ્પે 'બોર્ડ ઓફ પીસ'માંથી કેનેડાની કરી હકાલપટ્ટી

Trump vs Carney: અમેરિકા અને કેનેડા, જે હંમેશા મિત્ર રાષ્ટ્રો ગણાય છે, તેમના સંબંધોમાં હાલ મોટી તિરાડ જોવા મળી રહી છે. અમેરિકન પ્રમુખ ડોનાલ્ડ ટ્રમ્પ અને કેનેડાના વડાપ્રધાન માર્ક કાર્ની વચ્ચે શાબ્દિક યુદ્ધ હવે ચરમસીમાએ પહોંચ્યું છે. આ તણાવના પરિણામે, ડોનાલ્ડ ટ્રમ્પે એક મોટી જાહેરાત કરતા તેમના નવા રચાયેલા 'બોર્ડ ઓફ પીસ'માંથી કેનેડાને આપવામાં આવેલું આમંત્રણ પાછું ખેંચી લીધું છે. આ નિર્ણયે આંતરરાષ્ટ્રીય રાજકારણમાં ગરમાવો લાવી દીધો છે. ટ્રમ્પનો આ ગુસ્સો માર્ક કાર્ની દ્વારા વર્લ્ડ ઇકોનોમિક ફોરમ (દાવોસ)માં આપવામાં આવેલા એક ભાષણ બાદ જોવા મળ્યો છે.

ટ્રમ્પનો સોશિયલ મીડિયા પર ખુલ્લો પત્ર

સ્વિટ્ઝર્લેન્ડથી અમેરિકા પરત ફરતી વખતે ટ્રમ્પે સોશિયલ મીડિયાના માધ્યમથી પોતાની નારાજગી વ્યક્ત કરી હતી. તેમણે જાહેરમાં કેનેડાના પીએમને ઉદ્દેશીને લખ્યું હતું કે, "પ્રિય વડાપ્રધાન કાર્ની: મહેરબાની કરીને આ પત્રને એ વાતનો પાકો પુરાવો ગણશો કે 'બોર્ડ ઓફ પીસ' કેનેડાને તેમાં સામેલ થવા માટે આપેલું આમંત્રણ પાછું ખેંચી રહ્યું છે. આ બોર્ડ અત્યાર સુધીના સૌથી પ્રતિષ્ઠિત નેતાઓનું ગ્રુપ હશે. આ બાબતે ધ્યાન આપવા બદલ આભાર!"

ટ્રમ્પની આ પોસ્ટ પરથી સ્પષ્ટ થાય છે કે તેઓ કાર્નીના તાજેતરના વલણથી જરા પણ ખુશ નથી.

આ સમગ્ર બબાલની શરૂઆત આ અઠવાડિયે વર્લ્ડ ઇકોનોમિક ફોરમ (દાવોસ)માં થઈ હતી. ત્યાં માર્ક કાર્નીએ એક જોરદાર ભાષણ આપ્યું હતું. ભલે તેમણે સીધું ટ્રમ્પનું નામ નહોતું લીધું, પરંતુ તેમનો ઈશારો સ્પષ્ટ હતો. કાર્નીએ કહ્યું હતું કે દુનિયાની 'મધ્યમ શક્તિઓ'એ (Middle Powers) મહાસત્તાઓની દાદાગીરી અને દબાણની નીતિ સામે એક થવું જોઈએ.

કાર્નીએ અમેરિકાની એવી વિદેશ નીતિઓ પર પ્રહાર કર્યા હતા જેમાં ટેરિફ ને હથિયાર તરીકે વાપરવામાં આવે છે અને સપ્લાય ચેઈનને નબળાઈ તરીકે જોવામાં આવે છે. તેમણે સ્પષ્ટ ચેતવણી આપી હતી કે કોઈ દેશની જોહુકમી ચલાવી લેવામાં આવશે નહીં.

માત્ર 1 અઠવાડિયામાં બદલાયેલી બાજી

નોંધનીય છે કે આ ઘટનાક્રમમાં અચાનક મોટો બદલાવ આવ્યો છે. ગત સપ્તાહ સુધી સ્થિતિ સામાન્ય લાગતી હતી, જ્યારે કાર્નીએ ટ્રમ્પના 'બોર્ડ ઓફ પીસ'માં જોડાવાનો પ્રસ્તાવ સ્વીકારી લીધો હતો. તે સમયે કાર્ની ચીનની યાત્રા પર હતા, જ્યાં તેમણે ચીનના રાષ્ટ્રપતિ શી જિનપિંગ સાથે મુલાકાત કરી હતી.

કેનેડા અત્યારે ટ્રમ્પ દ્વારા લાદવામાં આવેલા ટેરિફથી બચવા માટે 'ઈસ્ટ-વેસ્ટ ટ્રેડ સ્ટ્રેટેજી' પર કામ કરી રહ્યું છે, જેના ભાગરૂપે તેઓ અમેરિકા પરની નિર્ભરતા ઘટાડીને ચીન સાથે વેપાર વધારવા માંગે છે. આ બાબત પણ ટ્રમ્પની નારાજગીનું એક કારણ હોઈ શકે છે.

ટ્રમ્પનો વળતો પ્રહાર: "કેનેડા અમેરિકાને લીધે જીવે છે"

ટ્રમ્પે માત્ર આમંત્રણ રદ કરીને સંતોષ ન માન્યો, પરંતુ તેમણે પોતાના દાવોસ ભાષણમાં પણ કાર્નીને આડે હાથ લીધા હતા. ટ્રમ્પે કહ્યું કે કેનેડાના વડાપ્રધાને અમેરિકાનો આભાર માનવો જોઈએ કારણ કે અમેરિકા કેનેડાની સુરક્ષા કરે છે. ટ્રમ્પે કડક શબ્દોમાં કહ્યું, "કેનેડા અમેરિકાના કારણે જ સુરક્ષિત અને જીવિત છે. માર્ક, બીજી વાર જ્યારે તમે નિવેદન આપો, ત્યારે આ વાત યાદ રાખજો."

બીજી તરફ, કેનેડા પરત ફર્યા બાદ પણ માર્ક કાર્ની પોતાના વલણ પર મક્કમ છે. તેમણે કહ્યું કે આ નાજુક સમયમાં કેનેડાએ નેતૃત્વ લેવું પડશે અને તેઓ કોઈના દબાણમાં આવશે નહીં. હવે જોવું રહ્યું કે આ બે પડોશી દેશો વચ્ચેનો વેપાર અને રાજદ્વારી સંબંધો ભવિષ્યમાં કઈ દિશામાં આગળ વધે છે.

આ પણ વાંચો- Layoffs: એમેઝોનમાં નોકરી પર સંકટ! આવતા અઠવાડિયે હજારો કર્મચારીઓની છટણી નક્કી, જાણો શું છે કારણ?