ટ્રમ્પનો મોટો નિર્ણય: કેનેડા સાથે વેપાર વાટાઘાટો બંધ, ઓન્ટારિયોની જાહેરાત બની કારણ

US-Canada trade talks: અમેરિકાના રાષ્ટ્રપતિ ડોનાલ્ડ ટ્રમ્પે કેનેડા સાથેની તમામ વેપાર વાટાઘાટો બંધ કરવાનો મોટો નિર્ણય જાહેર કર્યો છે. આ નિર્ણયનું કારણ કેનેડાના ઓન્ટારિયો પ્રાંત દ્વારા પ્રાયોજિત એક ટીવી જાહેરાત બની છે, જેમાં અમેરિકાના ટેરિફની ટીકા કરવા માટે ભૂતપૂર્વ રાષ્ટ્રપતિ રોનાલ્ડ રીગનના શબ્દોનો ઉપયોગ કરવામાં આવ્યો હતો. આ જાહેરાતથી નારાજ થયેલા ટ્રમ્પે રાત્રે સોશિયલ મીડિયા પર પોસ્ટ કરીને આ નિર્ણયની જાહેરાત કરી, જેનાથી અમેરિકા અને કેનેડા વચ્ચે તણાવ વધ્યો છે.

ઓન્ટારિયોની જાહેરાતે ઉભો કર્યો વિવાદ

ઓન્ટારિયો પ્રાંત દ્વારા પ્રાયોજિત આ ટીવી જાહેરાતમાં રોનાલ્ડ રીગનના શબ્દોનો ઉપયોગ કરીને અમેરિકાના ટેરિફની ટીકા કરવામાં આવી હતી. ટ્રમ્પે આ જાહેરાતને "ધોકાધડીથી તૈયાર કરેલી" ગણાવી અને રોનાલ્ડ રીગન ફાઉન્ડેશનના નિવેદનનો હવાલો આપ્યો, જેમાં આ જાહેરાતને ખોટી ગણાવવામાં આવી હતી. ટ્રમ્પે તેમની પોસ્ટમાં જણાવ્યું, "આ જાહેરાતનો ખર્ચ 75,000 અમેરિકન ડોલર હતો અને તેનો હેતુ અમેરિકન સુપ્રીમ કોર્ટ તેમજ અન્ય અદાલતોના નિર્ણયોમાં દખલ કરવાનો હતો." તેમણે ઉમેર્યું કે, "ટેરિફ અમેરિકાની રાષ્ટ્રીય સુરક્ષા અને અર્થતંત્ર માટે અગત્યના છે, અને કેનેડાના આ ખરાબ વર્તનને કારણે વેપાર વાટાઘાટો બંધ કરવામાં આવે છે."

કેનેડાનો જવાબ: જાહેરાત હટાવવાનો નિર્ણય

આ વિવાદ બાદ ઓન્ટારિયોના પ્રીમિયર ડગ ફોર્ડે જાહેરાત હટાવવાનો નિર્ણય જાહેર કર્યો. ફોર્ડે કહ્યું કે, કેનેડાના વડાપ્રધાન માર્ક કાર્ની સાથે ચર્ચા બાદ તેમણે સોમવારથી આ જાહેરાત હટાવવાનો નિર્ણય લીધો છે, જેથી વેપાર વાટાઘાટો ફરી શરૂ થઈ શકે. તેમણે ઉમેર્યું કે, "અમે અમારું લક્ષ્ય હાંસલ કરી લીધું છે અને અમેરિકન દર્શકો સુધી અમારો સંદેશ પહોંચાડ્યો છે."

કેનેડાની નવી યોજના

કેનેડાના વડાપ્રધાન માર્ક કાર્નીએ ટ્રમ્પના ટેરિફને કારણે ઉદ્ભવેલા જોખમોનો સામનો કરવા માટે નવી યોજના જાહેર કરી છે. તેમણે કહ્યું કે, કેનેડા હવે અમેરિકા સિવાયના અન્ય દેશોમાં પોતાના નિકાસને બમણી કરવાની યોજના બનાવી રહ્યું છે. આ યોજના ટ્રમ્પના ટેરિફના નિર્ણયની સામે કેનેડાની આર્થિક વ્યૂહરચનાનો એક ભાગ છે.