ઈરાન મુદ્દે ટ્રમ્પનું 'યુ-ટર્ન'? પહેલા કહ્યું 'મદદ આવશે', હવે સૂર બદલાયા, જાણો શું છે હકીકત

Donald Trump Iran Protests: ઈરાનમાં સરકાર વિરોધી પ્રદર્શનોએ જોર પકડ્યું છે, ત્યારે અમેરિકાના રાષ્ટ્રપતિ ડોનાલ્ડ ટ્રમ્પના નિવેદનોમાં અચાનક મોટો બદલાવ જોવા મળ્યો છે. થોડા સમય પહેલા જે ટ્રમ્પ પ્રદર્શનકારીઓને "મદદ આવી રહી છે" તેવું કહીને હિંમત આપી રહ્યા હતા, તેઓ હવે અચાનક નરમ પડ્યા હોય તેવું લાગી રહ્યું છે. તહેરાનમાં સ્થિતિ તંગ છે અને સરકાર દ્વારા કડક કાર્યવાહીના સંકેતો છે, તેવા સમયે ટ્રમ્પના બદલાયેલા સૂરે સૌને ચોંકાવી દીધા છે.

ટ્રમ્પનો નવો દાવો: 'હત્યાઓ અટકી રહી છે'

વ્હાઇટ હાઉસમાં પત્રકારો સાથે વાતચીત દરમિયાન ટ્રમ્પે એક આશ્ચર્યજનક દાવો કર્યો હતો. તેમણે કહ્યું હતું કે, "અમને વિશ્વસનીય સૂત્રો દ્વારા જાણવા મળ્યું છે કે ઈરાનમાં હવે હત્યાઓનો સિલસિલો અટકી રહ્યો છે અને ત્યાં ફાંસી આપવાની કોઈ યોજના નથી."

ટ્રમ્પે એ પણ ઉમેર્યું કે, "મને આ માહિતી બહુ જ વિશ્વસનીય લોકો પાસેથી મળી છે." જોકે, જ્યારે પત્રકારોએ પૂછ્યું કે આ માહિતી કોણે આપી, ત્યારે તેમણે કોઈ સ્પષ્ટતા કરી ન હતી. ટ્રમ્પે પોતાની વાત પૂરી કરતા કહ્યું હતું કે, "મને આશા છે કે આ વાત સાચી હોય, પણ કોણ જાણે હકીકત શું છે?" આમ, તેઓ પોતાની જ વાત પર સંપૂર્ણ વિશ્વાસ ધરાવતા હોય તેવું લાગતું ન હતું.

જ્યારે ટ્રમ્પને પૂછવામાં આવ્યું કે શું તેઓ ઈરાની સરકાર સામે કોઈ નક્કર કાર્યવાહી કરવાનું વિચારી રહ્યા છે? ત્યારે તેમણે સીધો જવાબ આપવાનું ટાળ્યું હતું. તેમણે માત્ર એટલું જ કહ્યું, "અમે જોઈશું કે આગળ શું પ્રક્રિયા થાય છે. પરંતુ જે લોકો ત્યાંની સ્થિતિ જાણે છે, તેમના તરફથી અમને ખૂબ સારા સમાચાર મળ્યા છે." આ જવાબ પરથી સ્પષ્ટ થાય છે કે હાલ અમેરિકા કોઈ તાત્કાલિક એક્શન લેવાના મૂડમાં નથી.

એક તરફ ટ્રમ્પનો દાવો, બીજી તરફ ગ્રાઉન્ડ રિયાલિટી અલગ

ટ્રમ્પ ભલે એમ કહેતા હોય કે ફાંસી અને હત્યાઓ અટકી છે, પરંતુ જમીની હકીકત કંઈક અલગ જ ચિત્ર રજૂ કરે છે. અમેરિકા સ્થિત હ્યુમન રાઇટ્સ એક્ટિવિસ્ટ્સ ન્યૂઝ એજન્સીના જણાવ્યા અનુસાર, ઈરાની સુરક્ષા દળો સાથેના ઘર્ષણમાં અત્યાર સુધીમાં ઓછામાં ઓછા 2,586 લોકો માર્યા ગયા છે. ઈરાની અધિકારીઓએ સ્પષ્ટ સંકેત આપ્યા છે કે પકડાયેલા પ્રદર્શનકારીઓ પર ઝડપી કેસ ચલાવવામાં આવશે અને તેમને ફાંસી પણ થઈ શકે છે.

આ તણાવપૂર્ણ સ્થિતિ વચ્ચે, કતારમાં આવેલા અમેરિકન સૈન્ય મથકના કેટલાક કર્મચારીઓને બુધવાર સાંજ સુધીમાં જગ્યા ખાલી કરી દેવાની સલાહ આપવામાં આવી હતી, જે ગંભીર પરિસ્થિતિનો ઈશારો કરે છે.

ઈરાનનો આરોપ: 'બધું અમેરિકા અને ઈઝરાયેલનું કારસ્તાન'

બીજી બાજુ, ઈરાન સરકારે ફરી એકવાર પોતાના બચાવમાં અમેરિકા અને ઈઝરાયેલ પર દોષનો ટોપલો ઢોળ્યો છે. ઈરાનની સ્થાનિક ન્યૂઝ એજન્સીના રિપોર્ટ મુજબ, ઈરાનના પેરામિલિટ્રી રિવોલ્યુશનરી ગાર્ડના કમાન્ડર મોહમ્મદ પાકપુરે કોઈ પણ પુરાવા આપ્યા વગર દાવો કર્યો છે કે આ પ્રદર્શનો પાછળ અમેરિકા અને ઈઝરાયેલનો હાથ છે. તેમણે ચીમકી ઉચ્ચારતા કહ્યું કે, "આ બંને દેશો જ અસલી હત્યારા છે અને તેમને યોગ્ય સમયે જવાબ આપવામાં આવશે."

આમ, ઈરાનની સ્થિતિ હાલ અત્યંત નાજુક છે. એક તરફ પ્રદર્શનકારીઓ પર અત્યાચારના રિપોર્ટ્સ છે, તો બીજી તરફ ટ્રમ્પના બદલાયેલા નિવેદનોએ આંતરરાષ્ટ્રીય રાજકારણમાં નવો વળાંક લાવી દીધો છે.

આ પણ વાંચો- Elon Musk ભડક્યા Google અને Appleની ‘દોસ્તી’ પર, કહી દીધી આ મોટી વાત