UPI Payment: પસંદગીના ટ્રાન્ઝેક્શન પર છૂટ આપવાની માંગની સરકાર કરી રહી છે સમીક્ષા

સરકારે UPI પર MDR ચાર્જિસનું નવું ફ્રેમવર્ક જાહેર કર્યા બાદ વેપારીઓમાં આ મુદ્દે ચર્ચા તેજ થઈ છે. વિવિધ વેપારી સંગઠનોએ UPI પેમેન્ટ પર MDR દૂર કરવાની માંગ સાથે નાણામંત્રીને પત્ર પણ લખ્યો છે.

શું છે નવું UPI MDR ફ્રેમવર્ક?

નવા UPI MDR ફ્રેમવર્ક હેઠળ પેટ્રોલ પંપ પર ₹2,000થી વધુના UPI પેમેન્ટ માટે પ્રતિ ટ્રાન્ઝેક્શન ₹5નો ફ્લેટ MDR નક્કી કરવામાં આવ્યો છે. જ્યારે ₹2,000થી ઓછા UPI ફ્યુઅલ પેમેન્ટ પર કોઈ MDR ચાર્જ લાગશે નહીં. આ નવા ફેરફારો 15 ઓક્ટોબર 2026થી અમલમાં આવશે.

સરકારે સ્પષ્ટ કર્યું છે કે સામાન્ય ગ્રાહકો માટે UPI પેમેન્ટ અગાઉની જેમ જ મફત રહેશે. એટલે કે UPIથી પેમેન્ટ કરનાર ગ્રાહકો પાસેથી કોઈ વધારાનો ચાર્જ વસૂલવામાં આવશે નહીં.

નવા ફ્રેમવર્ક હેઠળ ₹2,000 સુધીના P2P અને P2M UPI ટ્રાન્ઝેક્શન MDRના દાયરાની બહાર રહેશે. P2PM ફ્રેમવર્ક હેઠળ આવતા નાના વેપારીઓને પણ ઝીરો MDRનો લાભ મળતો રહેશે. તેમાં એવા નાના વેપારીઓનો સમાવેશ થાય છે, જેમને UPI QR મારફતે દર મહિને ₹1 લાખ સુધીનું પેમેન્ટ મળે છે.

જ્યારે પસંદગીની કેટેગરીમાં ₹2,000થી વધુના UPI પેમેન્ટ પર ₹5 પ્રતિ ટ્રાન્ઝેક્શનનો ફ્લેટ MDR લાગશે. આ કેટેગરીમાં રેલવે, ટેલિકોમ, ઇન્શ્યોરન્સ અને ફ્યુઅલનો સમાવેશ થાય છે. બીજી તરફ, અન્ય P2M UPI ટ્રાન્ઝેક્શનમાં ₹2,000થી વધુના પેમેન્ટ પર 0.4% MDR લાગુ થશે, જેની મહત્તમ મર્યાદા ₹300 પ્રતિ ટ્રાન્ઝેક્શન રાખવામાં આવી છે.