US Green Card: અમેરિકામાં ગ્રીન કાર્ડ માટે માત્ર લગ્ન કરવા પૂરતા નથી! હવે આ શરત પૂરી કરવી પડશે, નહીં તો અરજી થશે રિજેક્ટ

US Green Card: જો તમારું સપનું અમેરિકામાં સ્થાયી થવાનું છે અને તમે એવું માનો છો કે કોઈ અમેરિકન નાગરિક સાથે લગ્ન કરી લેવાથી તમને સરળતાથી ગ્રીન કાર્ડ (Green Card) મળી જશે, તો આ સમાચાર તમારા માટે આંખ ઉઘાડનારા છે. અત્યાર સુધી અમેરિકન નાગરિક સાથે લગ્ન કરવા એ ગ્રીન કાર્ડ મેળવવાનો સૌથી સરળ અને લોકપ્રિય રસ્તો માનવામાં આવતો હતો. પરંતુ હવે માત્ર મેરેજ સર્ટિફિકેટ (લગ્નનું પ્રમાણપત્ર) બતાવીને ગ્રીન કાર્ડ મેળવવું મુશ્કેલ બની ગયું છે.

લગ્ન સાચા હોવા જોઈએ, માત્ર કાગળ પર નહીં

અમેરિકન નાગરિકતા અને ઇમરન્સી સર્વિસ (USCIS) એ સ્પષ્ટ કર્યું છે કે ગ્રીન કાર્ડ મેળવવા માટે લગ્ન 'વાસ્તવિક' હોવા જોઈએ. એટલે કે, બંને પક્ષો (પતિ અને પત્ની) સાચા દિલથી અને સારા વિશ્વાસ સાથે જીવનભર સાથે રહેવા માંગતા હોવા જોઈએ. જો અધિકારીઓને એવી શંકા જશે કે આ લગ્ન માત્ર ઈમિગ્રેશનના લાભો કે ગ્રીન કાર્ડ મેળવવા માટે જ કરવામાં આવ્યા છે, તો તમારી મુશ્કેલીઓ વધી શકે છે. અમેરિકામાં ગ્રીન કાર્ડ એ કાયમી વસવાટ માટેની પરવાનગી છે, જે આગળ જતાં અમેરિકન નાગરિકતા તરફ દોરી જાય છે. જોકે, હવે આ પ્રક્રિયામાં ઘણી કડકાઈ આવી ગઈ છે.

સાથે રહેવું સૌથી મહત્વનું

જો પતિ-પત્ની અલગ-અલગ રહેતા હોય, તો તેમની ગ્રીન કાર્ડની અરજી પર ગંભીર સવાલો ઉભા થાય છે. આવા કિસ્સાઓમાં અધિકારીઓ ઊંડાણપૂર્વક તપાસ કરે છે કે ક્યાંક આ લગ્ન માત્ર દેખાડાના તો નથી ને?

અલગ રહેતા દંપતીઓ માટે જોખમ

જો કોઈ દંપતી રોજિંદા જીવનમાં એક જ છત નીચે નથી રહેતું, તો USCIS તેને શંકાની નજરે જુએ છે. આવા કેસોમાંછેતરપિંડીની ઝીણવટભરી તપાસ થઈ શકે છે. ઇન્ટરવ્યુ દરમિયાન ખૂબ જ કડક પ્રશ્નો પૂછવામાં આવી શકે છે. વધારાના પુરાવા માંગવામાં આવી શકે છે. અંતે, ગ્રીન કાર્ડની અરજી રદ (Reject) થવાનું જોખમ અનેકગણું વધી જાય છે. તેથી, જો તમે લગ્નના આધારે ગ્રીન કાર્ડ માટે અરજી કરી રહ્યા હોવ, તો કાયદાકીય સલાહ લેવી અને સાથે રહેવાના મજબૂત પુરાવા રજૂ કરવા ખૂબ જ જરૂરી છે.

ટ્રમ્પ પ્રશાસનની કડક નીતિઓ

આ ફેરફારો ટ્રમ્પ વહીવટીતંત્ર દ્વારા ઈમિગ્રેશન પર મૂકવામાં આવેલા કડક નિયંત્રણોનો જ એક ભાગ છે. સુરક્ષા અને ઈમિગ્રેશન કંટ્રોલને વધુ મજબૂત કરવા માટે કેટલાક મોટા નિર્ણયો લેવામાં આવ્યા છે ગ્રીન કાર્ડ અરજદારો માટે વર્ક પરમિટની માન્યતા જે પહેલા 5 વર્ષની હતી, તે ઘટાડીને હવે માત્ર 18 મહિના કરી દેવામાં આવી છે. ડાયવર્સિટી વિઝા લોટરી જેવી યોજનાઓ પર પણ રોક અને સમીક્ષાના આદેશો આપવામાં આવ્યા છે. ટૂંકમાં, અમેરિકામાં કાયમી વસવાટનું સપનું જોતા લોકોએ હવે વધુ સાવચેત રહેવાની અને તમામ નિયમોનું ચુસ્તપણે પાલન કરવાની જરૂર છે. લગ્ન બાદ પતિ-પત્નીનું સાથે રહેવું એ હવે માત્ર પ્રેમનો વિષય નથી, પણ ગ્રીન કાર્ડ મેળવવા માટેની અનિવાર્ય શરત બની ગયો છે.

આ પણ વાંચો- એકાઉન્ટ હોલ્ડરના મૃત્યુ બાદ પણ નોમિનીને પૈસા ન મળ્યા! HDFC બેંકનો કિસ્સો જાણીને ચોંકી જશો, જાણો ક્યાં કરવી ફરિયાદ