Share Market : સેન્સેક્સની ફ્લેટ ચાલ વચ્ચે નિફ્ટી 24100 પર, સોના-ચાંદી અને ક્રૂડ ઓઈલમાં મોટી હલચલ

Share Market : વૈશ્વિક બજારોમાંથી મળી રહેલા મિશ્ર સંકેતો વચ્ચે આજે ભારતીય શેરબજારમાં સેન્સેક્સની ચાલ ફ્લેટ જોવા મળી રહી છે, જ્યારે નિફ્ટી 24100 ના સ્તરની આસપાસ કારોબાર કરી રહ્યો છે. આ અગાઉ ગિફ્ટ નિફ્ટીએ બજાર માટે તેજી સાથે ખુલવાના મજબૂત સંકેતો આપ્યા હતા. ગિફ્ટ નિફ્ટી 96.50 પોઈન્ટ્સની લીડ સાથે 24068.50 ના સ્તર પર ટ્રેડ થઈ રહ્યો હતો. બજારની નજર આજે ખાસ કરીને RVNL, એન્થમ બાયો, HFCL અને બોશ જેવી કંપનીઓના શેર્સ પર ટકેલી છે.

ગ્લોબલ અપડેટની વાત કરીએ તો અમેરિકી સેન્ટ્રલ બેંક ફેડરલ રિઝર્વે વ્યાજ દરોની રેન્જને 3.5 ટકાથી 3.7 ટકા પર યથાવત રાખી છે. નવા ચેરમેન કેવિન વોર્શે ભવિષ્યના વ્યાજ દરો અંગે કોઈ ચોક્કસ અંદાજ આપવાનું ટાળ્યું હતું, પરંતુ સેન્ટ્રલ બેંકના ડોટ પ્લોટ સંકેતો દર્શાવે છે કે અધિકારીઓને 2026 માં વ્યાજ દરો વધવાની આશંકા છે. આ કારણોસર ગઈકાલે રાત્રે યુએસ માર્કેટમાં ઘટાડો જોવા મળ્યો હતો, જ્યાં ડાઉ જોન્સ 0.98 ટકા, S&P 500 1.21 ટકા અને નાસ્ડેક 1.34 ટકા તૂટીને બંધ થયા હતા.

એશિયા-પેસિફિક ક્ષેત્રના મોટાભાગના બજારોમાં આજે સવારે નબળાઈ જોવા મળી રહી છે. હોંગકોંગનો હેંગસેંગ 1.06 ટકા અને ઓસ્ટ્રેલિયાનો S&P ASX 200 ઇન્ડેક્સ 0.35 ટકા નીચે ટ્રેડ થઈ રહ્યા હતા. જોકે, આ નબળાઈ વચ્ચે પણ જાપાનના શેરબજારે નવો ઈતિહાસ રચ્યો છે. જાપાનનો બેન્ચમાર્ક ઈન્ડેક્સ 1.94 ટકાની શાનદાર તેજી સાથે પહેલીવાર 71000 ની ઐતિહાસિક સપાટીને પાર કરી ગયો છે.

બીજી તરફ કોમોડિટી માર્કેટમાં પણ મોટા ફેરફારો જોવા મળી રહ્યા છે

અમેરિકા અને ઈરાન વચ્ચે થયેલા વચગાળાના શાંતિ કરારને લીધે કાચા તેલની કિંમતો સતત ઘટી રહી છે. આ કરારથી હોર્મુઝ સ્ટ્રેટ ફરી ખુલશે અને ઈરાન પરના પ્રતિબંધો હટશે.

ઈન્ટરકોન્ટિનેન્ટલ એક્સચેન્જ પર જૂન ફ્યુચર કોન્ટ્રેક્ટ 1.48 ટકાના ઘટાડા સાથે 78.37 ડોલર પ્રતિ બેરલ પર આવી ગયો છે.

તેલના ભાવ ઘટવાને કારણે મોંઘવારીની ચિંતા ઓછી થતાં સોના અને ચાંદીના બજારને મોટો સપોર્ટ મળ્યો છે.