Closing Bell: એપ્રિલ સિરીઝની શાનદાર શરૂઆત: શેરબજારમાં તોફાની તેજી, સેન્સેક્સ 1187 અને નિફ્ટી 348 પોઈન્ટ ઉછળીને બંધ

Closing Bell: 1 એપ્રિલના રોજ એપ્રિલ સિરીઝની ખૂબ જ શાનદાર અને સકારાત્મક શરૂઆત થઈ છે. સારા ગ્લોબલ સંકેતો અને ખાસ કરીને અમેરિકા અને ઈરાન વચ્ચે ચાલી રહેલા યુદ્ધની સ્થિતિમાં નરમાશ આવવાની આશાએ ભારતીય શેરબજારમાં આજે જોરદાર ઉત્સાહ જોવા મળ્યો હતો. બજારમાં ચારેતરફ ખરીદીનો માહોલ રહેતા તમામ મુખ્ય ઈન્ડેક્સ લીલા નિશાનમાં બંધ થયા છે.

બજારની આજના દિવસની હાઇલાઇટ્સ

આજના ટ્રેડિંગ સેશનના અંતે શેરબજારના આંકડા રોકાણકારોને ખુશ કરનારા રહ્યા છે. સેન્સેક્સ 1,186.77 પોઈન્ટ (1.65 ટકા) ના મજબૂત ઉછાળા સાથે 73,134.32 ના સ્તર પર બંધ થયો. 348 પોઈન્ટ (1.56 ટકા) ના જબરદસ્ત જમ્પ સાથે 22,600 ની સપાટી પાર કરીને 22,679.40 પર બંધ થયો. બેન્ક નિફ્ટી બેન્કિંગ શેરોમાં પણ રોનક રહી અને ઇન્ડેક્સ 1173 પોઈન્ટ વધીને 51,449 પર બંધ થયો. મિડકેપ ઇન્ડેક્સ 1169 પોઈન્ટ ઉછળીને 53,819 પર બંધ થયો (2.2 ટકાનો વધારો). જ્યારે સ્મોલકેપ ઇન્ડેક્સમાં પણ 3.4 ટકાની શાનદાર તેજી જોવા મળી હતી.

શેરોની સ્થિતિ

બજારમાં આજે ખરીદીનો જબરદસ્ત ટ્રેન્ડ જોવા મળ્યો. કુલ 3675 શેરોમાં આજે વધારો નોંધાયો હતો, જ્યારે તેની સામે માત્ર 478 શેરોમાં જ ઘટાડો આવ્યો હતો. આ ઉપરાંત 90 શેરોના ભાવમાં કોઈ ફેરફાર થયો ન હતો.

નિફ્ટીના ટોપ ગેનર્સ

આજના વધનારા શેર્સ પર નજર કરીએ તો, આજે ઇન્ટરગ્લોબ એવિએશન, અદાણી પોર્ટ્સ, અદાણી એન્ટરપ્રાઈઝીસ, ટ્રેન્ટ અને ભારત ઈલેક્ટ્રોનિક્સના શેરોમાં સૌથી વધુ તેજી જોવા મળી હતી.