શેર બજારમાં ભૂકંપ! સેન્સેક્સ 2300 પોઈન્ટ તૂટ્યો, નિફ્ટી 23,800ની નીચે ગગડ્યો; જાણો માર્કેટ ક્રેશ થવાના 5 મોટા કારણો

Share Market Crash: આજે 9 માર્ચે ભારતીય શેર બજાર ખુલતાની સાથે જ પત્તાના મહેલની જેમ ધરાશાયી થઈ ગયું. ટ્રેડિંગ દરમિયાન સેન્સેક્સમાં લગભગ 2300 પોઈન્ટનો મોટો ઘટાડો નોંધાયો હતો, જ્યારે નિફ્ટી પણ તૂટીને 23,800 ના લેવલની નીચે જતો રહ્યો હતો. તમને જણાવી દઈએ કે, સેન્સેક્સ અને નિફ્ટીનું આ છેલ્લા 10 મહિનાનું સૌથી નીચું સ્તર છે. મિડલ ઈસ્ટ (પશ્ચિમ એશિયા) માં વધી રહેલા તણાવ અને ક્રૂડ ઓઈલના ભાવ 115 ડોલરની પાર પહોંચી જવાને કારણે આજે બજારમાં રોકાણકારો વચ્ચે હાહાકાર મચી ગયો છે.

સવારના 09:35 વાગ્યાની આસપાસના આંકડા જોઈએ તો, સેન્સેક્સ 2,270.48 પોઈન્ટ એટલે કે 2.86 ટકાના જંગી ઘટાડા સાથે 76,651.84 ના સ્તર પર કારોબાર કરી રહ્યો હતો. બીજી તરફ નિફ્ટી પણ 690.85 પોઈન્ટ એટલે કે 2.83 ટકા તૂટીને 23,759.60 પર પહોંચી ગયો હતો. બજારમાં આજે ચારેબાજુ વેચવાલી જોવા મળી હતી અને તમામ સેક્ટર લાલ નિશાનમાં ટ્રેડ થઈ રહ્યા હતા.

શેર બજારમાં કડાકો બોલવા પાછળના 5 મુખ્ય કારણો:

1. ક્રૂડ ઓઇલના ભાવમાં ભડકો

શેર બજારમાં આજના આ મહાકડાકા પાછળનું સૌથી મોટું કારણ કાચા તેલ (Crude Oil) ની કિંમતોમાં આવેલો જંગી ઉછાળો છે. આંતરરાષ્ટ્રીય બજારમાં બ્રેન્ટ ક્રૂડનો ભાવ 115 ડોલર પ્રતિ બેરલની ઉપર નીકળી ગયો છે. જિયોજિત ઈન્વેસ્ટમેન્ટ્સના ચીફ ઈન્વેસ્ટમેન્ટ સ્ટ્રેટેજિસ્ટ વીકે વિજયકુમારના જણાવ્યા અનુસાર, ક્રૂડના ભાવમાં આ ઉછાળો ભારત જેવા તેલ આયાત કરતા દેશો માટે એક મોટો 'ક્રૂડ શોક' છે. જો મિડલ ઈસ્ટનું યુદ્ધ લાંબુ ચાલશે, તો તેની સીધી અને ગંભીર અસર દેશની અર્થવ્યવસ્થા પર પડશે.

2. મોંઘવારી વધવાનો મોટો ડર

તેલના ભાવ વધવાથી ટ્રાન્સપોર્ટેશન મોંઘુ થશે, જેની સીધી અસર ચીજવસ્તુઓના ભાવ પર પડશે અને મોંઘવારી વધશે. એક્સપર્ટ્સનું માનવું છે કે, કાચા તેલના વધતા ભાવને કારણે દુનિયાભરની સેન્ટ્રલ બેંકો વ્યાજદરમાં જે ઘટાડો કરવાની હતી તેમાં હવે વિલંબ કરી શકે છે. આ અનિશ્ચિતતાના કારણે વિદેશી રોકાણકારો (FII) નું સેન્ટિમેન્ટ પણ બગડ્યું છે, જેના કારણે બજારમાંથી પૈસા પાછા ખેંચાઈ રહ્યા છે.