Gift Nifty Indicator: ક્રૂડ ઓઈલના ભાવ ઘટતા શેરબજારમાં નવી ઉડાનના સંકેત, ગિફ્ટ નિફ્ટી 170 પોઈન્ટ ઉછળ્યો

Gift Nifty Indicator: સોમવારે ભારતીય શેરબજારમાં શાનદાર તેજી જોવા મળી શકે છે. કાચા તેલની કિંમતોમાં આવેલી નરમાશ, વોલ સ્ટ્રીટમાં જોવા મળેલી મજબૂતી અને વિદેશી રોકાણકારો દ્વારા સતત થઈ રહેલા રોકાણને કારણે બજારના સેન્ટિમેન્ટને મોટો ટેકો મળ્યો છે. બેન્ચમાર્ક ઈન્ડેક્સ સેન્સેક્સ અને નિફ્ટી 50 આજે ગ્રીન ઝોનમાં ખુલે તેવી પૂરી શક્યતા છે.

ગિફ્ટ નિફ્ટીમાં તેજીના સંકેત

સોમવારે સવારે ટ્રેડિંગની શરૂઆતમાં જ ગિફ્ટ નિફ્ટી 170 પોઈન્ટ એટલે કે 0.7 ટકાના ઉછાળા સાથે 24,618 ના સ્તર પર ટ્રેડ કરી રહ્યો હતો. આ આંકડા સ્પષ્ટ સંકેત આપે છે કે આજે નિફ્ટી શુક્રવારના ક્લોઝિંગ કરતા ઘણો ઉપર ખુલી શકે છે.

નોંધનીય છે કે, ભારતીય બજારોમાં સળંગ ત્રીજા સેશનમાં તેજીનો માહોલ રહ્યો હતો. શુક્રવારે સેન્સેક્સ 166.49 પોઈન્ટ (0.21 ટકા) વધીને 78,094.64 ના સ્તરે બંધ થયો હતો. જ્યારે નિફ્ટી 50 ઈન્ડેક્સ 66.45 પોઈન્ટ (0.27 ટકા) ના વધારા સાથે 24,383.60 ની સપાટીએ બંધ રહ્યો હતો.

ક્રૂડ ઓઈલના ભાવમાં મોટો કડાકો

શેરબજાર માટે સૌથી મોટા સારા સમાચાર ક્રૂડ ઓઈલ તરફથી આવ્યા છે. અમેરિકી રાષ્ટ્રપતિ ડોનાલ્ડ ટ્રમ્પે ઈરાન પર લશ્કરી હુમલાનો નિર્ણય રદ કરીને મંત્રણા કરવાનો માર્ગ અપનાવ્યો છે. આ કૂટનીતિક ઉકેલની આશાથી હોર્મુઝની સામુદ્રધુની ફરી ખુલવાની શક્યતા વધી છે, જેનાથી વૈશ્વિક ઉર્જા પુરવઠાની ચિંતા હળવી થઈ છે.

આ જાહેરાત બાદ બ્રેન્ટ ક્રૂડ ફ્યુચર્સ 7.3 ટકા તૂટીને 81.55 ડોલર પ્રતિ બેરલ પર આવી ગયું છે. અમેરિકન વેસ્ટ ટેક્સાસ ઈન્ટરમીડિએટ ક્રૂડ પણ 5.4 ટકા ઘટીને 80.10 ડોલર પ્રતિ બેરલ થઈ ગયું છે.