IT Stocks: શેરબજારમાં IT શેરોની ધૂમ, Infosys અને TCS 3% ઉછળ્યા, જાણો સેક્ટરમાં આવેલી આ શાનદાર તેજીનું કારણ

IT Stocks: બુધવારે ભારતીય શેરબજારમાં IT શેરોમાં જબરદસ્ત તેજી જોવા મળી છે. આ તેજીના કારણે આજે નિફ્ટી IT ઇન્ડેક્સ બજારમાં સૌથી વધુ કમાણી કરાવનાર સેક્ટર બની ગયો છે.

ગ્લોબલ માર્કેટમાં સેમિકન્ડક્ટર અને ચિપ બનાવતી કંપનીઓના શેરોમાં ભારે વેચવાલી ચાલી રહી છે. આ કારણોસર રોકાણકારો હવે AIના મોંઘા શેરોમાંથી નફો બુક કરીને, વ્યાજબી ભાવે મળતા ભારતીય સોફ્ટવેર શેરો તરફ વળ્યા છે, જેના લીધે IT શેરો લાઈમલાઈટમાં આવી ગયા છે.

નિફ્ટી IT ઇન્ડેક્સ અને શેરોની સ્થિતિ

શેરબજારના મુખ્ય ઇન્ડેક્સ નિફ્ટી 50 માં માત્ર 0.93 ટકાનો વધારો થયો છે, તેની સરખામણીમાં નિફ્ટી IT ઇન્ડેક્સ 2.47 ટકાના મોટા ઉછાળા સાથે ટ્રેડ કરી રહ્યો છે. ઇન્ફોસિસનો શેર 3.37 ટકા ઉછળીને સૌથી વધુ કમાણી કરાવનાર શેર બન્યો છે. આ ઉપરાંત TCS માં 2.65 ટકા, વિપ્રોમાં 1.78 ટકા અને HCL ટેક્નોલોજીસમાં 1.1 ટકાની શાનદાર તેજી આવી છે. કોફોર્જમાં 4.42 ટકા, KPIT ટેક્નોલોજીસમાં 4.07 ટકા અને પર્સિસ્ટન્ટ સિસ્ટમ્સમાં 2.75 ટકાનો ઉછાળો નોંધાયો છે.

ભારતીય IT કંપનીઓને કેમ થઈ રહ્યો છે ફાયદો?

એશિયન બજારો, ખાસ કરીને દક્ષિણ કોરિયાની ચિપ બનાવતી કંપનીઓના શેરોમાં ભારે કડાકો બોલ્યો છે. AI પાછળ થતો જંગી ખર્ચ, મોંઘા વેલ્યુએશન અને ગ્લોબલ ટેક કંપનીઓ વચ્ચેની વધતી હરીફાઈના કારણે રોકાણકારો હવે ચિપ શેરોથી અંતર જાળવી રહ્યા છે. આ પરિસ્થિતિનો સીધો ફાયદો સોફ્ટવેર એક્સપોર્ટ કરતી ભારતીય IT કંપનીઓને મળી રહ્યો છે.

જિયોજિત ઇન્વેસ્ટમેન્ટ્સના ચીફ ઇન્વેસ્ટમેન્ટ સ્ટ્રેટેજિસ્ટ વી.કે. વિજયકુમારનું માનવું છે કે દક્ષિણ કોરિયાના ચિપ શેરોમાં આવેલો આ મોટો ઘટાડો ભારતીય IT સેક્ટર માટે ખૂબ જ ફાયદાકારક સાબિત થઈ શકે છે.