January WPI : મોંઘવારીનો ડામ - જાન્યુઆરીમાં જથ્થાબંધ મોંઘવારી 10 મહિનાની ટોચે, આંકડો 0.83% થી વધીને 1.81% પર પહોંચ્યો

January WPI : સામાન્ય જનતા માટે મોઘવારીના મોરચે ચિંતાજનક સમાચાર આવ્યા છે. મોઘવારીની ગાડીએ ફરી રફ્તાર પકડી લીધી છે. જાન્યુઆરી મહિનામાં જથ્થાબંધ મોઘવારી દર 10 મહિનાની સર્વોચ્ચ સપાટીએ પહોંચી ગયો છે. ડિસેમ્બરમાં જે આંકડો માત્ર 0.83% હતો, તે જાન્યુઆરીમાં વધીને સીધો 1.81% પર પહોંચી ગયો છે.

સરકારી આંકડા મુજબ, આ વધારા પાછળ મુખ્યત્વે ખાણી-પીણીની વસ્તુઓ, શાકભાજી અને મેન્યુફેક્ચર્ડ પ્રોડક્ટ્સના ભાવમાં થયેલો વધારો જવાબદાર છે.

રોજિંદા વપરાશની વસ્તુઓ મોંઘી થઈ

જાન્યુઆરીના આંકડા પર નજર કરીએ તો, રોજબરોજની જરૂરિયાતની વસ્તુઓની મોઘવારી 0.21% થી વધીને 2.21% થઈ ગઈ છે. આ એક મોટો ઉછાળો છે. ખાસ કરીને ખાદ્ય પદાર્થોની મોઘવારીમાં વધારો થયો છે.

શાકભાજી: શાકભાજીના ભાવમાં સૌથી મોટો ફેરફાર જોવા મળ્યો છે. ડિસેમ્બરમાં શાકભાજીની જથ્થાબંધ મોઘવારી માઈનસમાં (-3.50%) હતી, જે જાન્યુઆરીમાં વધીને 6.78% થઈ ગઈ છે.

ઈંડા અને માંસ: આ કેટેગરીમાં પણ મોઘવારી 1.14% થી વધીને 3.66% પર પહોંચી છે.

ડુંગળી: ડુંગળીની વાત કરીએ તો ભલે આંકડો હજુ માઈનસમાં છે, પરંતુ તેમાં વધારો થયો છે. ડુંગળીની મોઘવારી -54.40% થી વધીને -33.42% થઈ છે.