Stock Market Today: ટ્રેડિંગ લેતા પહેલા જાણી લો આજના મોટા સમાચારો, બજાર પર દેખાશે સીધી અસર

Stock Market Today: આજે 9 જુલાઈએ ભારતીય શેરબજારમાં તેજી સાથે શરૂઆત થવાની પૂરી શક્યતા છે. વહેલી સવારે ગિફ્ટ નિફ્ટી 23,990ના સ્તરની આસપાસ ટ્રેડ કરી રહ્યો હતો, જે ભારતીય બજારો માટે શાનદાર ઓપનિંગના સંકેત આપે છે. જોકે, ગ્લોબલ માર્કેટમાં ઉથલપાથલ ચાલુ છે. ગુરુવારે ઈરાન પર અમેરિકાના નવા હુમલાઓ બાદ ક્રૂડ ઓઈલના ભાવમાં ભડકો થયો છે. આ હુમલાઓએ ઈરાન યુદ્ધ સમાપ્ત થવાની અને હોર્મુઝ સ્ટ્રેટ ફરી ખુલવાની તમામ આશાઓ પર પાણી ફેરવી દીધું છે.

ગઈકાલના બજારનો કડાકો

8 જુલાઈએ સતત બીજા દિવસે ભારતીય શેરબજારમાં મોટો કડાકો જોવા મળ્યો હતો. બપોરના સેશનમાં નિફ્ટી 24,000 ના સ્તરની નીચે સરકી ગયો હતો. અમેરિકી રાષ્ટ્રપતિ ડોનાલ્ડ ટ્રમ્પે ઈરાન સાથેના કામચલાઉ યુદ્ધવિરામને સમાપ્ત જાહેર કરતા અને કાચા તેલમાં 6% ના ઉછાળાને કારણે બજારમાં ભારે વેચવાલી જોવા મળી.

સેન્સેક્સ 1,677.12 પોઈન્ટ (2.15%) તૂટીને 76,503.60 પર બંધ થયો.નિફ્ટી 516.65 પોઈન્ટ (2.12%) ના ઘટાડા સાથે 23,882.05 પર બંધ રહ્યો. નોંધનીય છે કે, 30 માર્ચ 2026 પછી પહેલીવાર બંને ઈન્ડેક્સમાં 2-2 ટકાનો જંગી ઘટાડો નોંધાયો છે.

એશિયન અને અમેરિકન બજારોની સ્થિતિ

એશિયન બજારો: AI અને સેમિકન્ડક્ટર શેરોમાં રોકાણકારોનો રસ વધતા એશિયન બજારોમાં તેજી છે. જાપાનનો નિક્કેઈ 2.45%, કોસ્પી 1.94%, સ્ટ્રેટ ટાઈમ્સ 0.35% અને હેંગસેંગ 0.30% ના ઉછાળા સાથે ટ્રેડ થઈ રહ્યા છે. માત્ર તાઈવાનના બજારમાં 0.10% નો સામાન્ય ઘટાડો છે.

અમેરિકન બજારો: ઈરાન સાથેની યુદ્ધવિરામ સમજૂતી તૂટવાના ટ્રમ્પના નિવેદનથી અમેરિકન બજારો પર દબાણ આવ્યું હતું. S&P 500 માં 0.28% નો ઘટાડો (7,482.71 પર બંધ) અને ડાઉ જોન્સમાં 1.09% નો ઘટાડો (52,348.39 પર બંધ) નોંધાયો છે. જ્યારે ચિપ સ્ટોક બ્રોડકોમમાં તેજીના કારણે નેસ્ડેક 0.20% વધીને 25,870.65 પર પહોંચ્યો હતો.