LIC Share Price: એલઆઈસીના શાનદાર પરિણામોથી શેરમાં 5%નો મોટો ઉછાળો, જાણો Citi બ્રોકરેજે શું આપ્યો ટાર્ગેટ?

LIC Share Price: ભારતીય જીવન વીમા નિગમ (LIC) ના રોકાણકારો માટે ખૂબ જ સારા સમાચાર સામે આવ્યા છે. માર્ચ ક્વાર્ટરના શાનદાર પરિણામોની સીધી પોઝિટિવ અસર આજે કંપનીના શેરો પર જોવા મળી છે. 22 મેના રોજ શેર બજાર ખુલતાની સાથે જ રોકાણકારોની ભારે લેવાલીને કારણે LIC નો શેર 5 ટકા સુધી ઉછળી ગયો હતો. જોકે, થોડા સમય બાદ આ તેજી ધીમી પડી હતી, પરંતુ બ્રોકરેજ ફર્મ્સે આપેલા ઊંચા ટાર્ગેટ પ્રાઈસને કારણે બજારમાં આ શેર ચર્ચાનો વિષય બન્યો છે.

કંપનીના નફા અને આવકમાં જંગી વધારો

LIC ના લેટેસ્ટ રિપોર્ટ મુજબ, માર્ચ ક્વાર્ટરમાં કંપનીનો ચોખ્ખો નફો (Net Profit) 23 ટકાના જંગી વધારા સાથે 23,420 કરોડ રૂપિયા થઈ ગયો છે. ગયા વર્ષે સમાન ગાળામાં આ નફો 19,013 કરોડ રૂપિયા હતો.

આ ઉપરાંત કંપનીની આવકના આંકડા પણ આકર્ષક રહ્યા છે. કંપનીની નેટ પ્રીમિયમ આવક 11.5 ટકા વધીને 1.65 લાખ કરોડ રૂપિયા પર પહોંચી છે. વન-ટાઇમ પ્રીમિયમ કલેક્શનમાં 21.5 ટકાનો વધારો નોંધાયો છે.

એન્યુઅલાઈઝ્ડ પ્રીમિયમ ઈક્વિવેલેન્ટ સેલ્સ (APE) 22 ટકાના ઉછાળા સાથે 22,954 કરોડ રૂપિયા રહ્યું છે. કંપનીના CEO અને MD આર. દોરાઈસ્વામીએ આ અંગે જણાવ્યું હતું કે, ભવિષ્યમાં ગ્રુપ બિઝનેસમાં સારા ગ્રોથની પૂરી સંભાવનાઓ છે. જોકે, બજારમાં ચાલતી વધઘટની અસર તેના ગ્રોથ પર થોડી ઘણી પડી શકે છે.

નોન-પાર્ટિસિપેટિંગ પ્રોડક્ટ્સ પર કંપનીનું વિશેષ ફોકસ

નફામાં થયેલા આ વધારા પાછળનું મુખ્ય કારણ 'નોન-પાર્ટિસિપેટિંગ પ્રોડક્ટ્સ' પર કંપનીનું વધેલું ફોકસ છે. આ પ્રકારની વીમા પ્રોડક્ટ્સમાં કંપનીએ ગ્રાહકોને નફા આધારિત કોઈ બોનસ આપવાનું હોતું નથી, જેનાથી કંપનીનો સીધો નફો વધે છે. આ જ રણનીતિને કારણે માર્ચના અંતે કંપનીનું ન્યૂ બિઝનેસ માર્જિન વધીને 21.2 ટકા થઈ ગયું છે, જે એક વર્ષ પહેલા 17.6 ટકા જેટલું જ હતું.