Ola Electric નો મોટો દાવ: પેટ્રોલના વધતા ભાવ વચ્ચે ગિગ વર્કર્સ માટે લોન્ચ કરશે નવું 'કોમર્શિયલ EV', જાણો ફીચર્સ અને ડિટેલ્સ

પેટ્રોલ અને ડીઝલના સતત વધતા ભાવને કારણે આજકાલ ડિલિવરી પાર્ટનર્સ અને ગિગ વર્કર્સનો રોજિંદો ખર્ચ ખૂબ વધી ગયો છે. આ સમસ્યાને ધ્યાનમાં રાખીને, દેશની જાણીતી ઇલેક્ટ્રિક ટુ-વ્હીલર કંપની ઓલા ઇલેક્ટ્રિક એક મોટો દાવ રમવાની તૈયારીમાં છે. તાજેતરમાં જ કંપનીના ફાઉન્ડર અને ચેરમેન ભાવિશ અગ્રવાલે ગિગ વર્કર્સ તરફથી EV ની વધતી માંગ અંગે ચર્ચા કરી હતી. હવે એવા અહેવાલો સામે આવ્યા છે કે ઓલા ટૂંક સમયમાં માર્કેટમાં ખાસ 'કોમર્શિયલ ઇલેક્ટ્રિક સ્કૂટર' લોન્ચ કરવા જઈ રહી છે.

કયા કામ માટે તૈયાર કરાયું છે આ નવું EV?

મળતી માહિતી મુજબ, ઓલા ઇલેક્ટ્રિક દેશમાં ઝડપથી વધી રહેલા ક્વિક કોમર્સ અને ગિગ વર્કર મોબિલિટી માર્કેટમાં એન્ટ્રી કરવા જઈ રહી છે. આ નવા ઇલેક્ટ્રિક સ્કૂટરને ખાસ કરીને ફૂડ ડિલિવરી, કુરિયર સર્વિસ, ક્વિક કોમર્સ અને અર્બન-ફ્લીટ ઓપરેશન જેવા રોજિંદા અને ભારે કામકાજ માટે ડિઝાઇન કરવામાં આવ્યું છે.

નવા ઓલા ઇલેક્ટ્રિક સ્કૂટરની ખાસિયતો અને મંજૂરી

દેશમાં કોઈપણ વાહનને કોમર્શિયલ રીતે વેચવા માટે સરકારી મંજૂરી લેવી ફરજિયાત હોય છે. સૂત્રોના જણાવ્યા અનુસાર, ઓલાના આ નવા વાહનને ARAI (ઓટોમોટિવ રિસર્ચ એસોસિએશન ઓફ ઇન્ડિયા) તરફથી સેન્ટ્રલ મોટર વ્હીકલ્સ રૂલ્સ હેઠળ મંજૂરી મળી ગઈ છે.

સર્ટિફિકેટની વિગત: 20 ફેબ્રુઆરી 2026 ની તારીખના એક સર્ટિફિકેટમાં 'ઓલા ઇલેક્ટ્રિક ટેક્નોલોજીસ પ્રાઇવેટ લિમિટેડ' ના L1-કેટેગરીના બેટરી સંચાલિત સ્કૂટરનો ઉલ્લેખ કરવામાં આવ્યો છે.

બેટરી અને પ્લેટફોર્મ: આ નવું વાહન Ola S1 X Gen3 પ્લેટફોર્મ પર આધારિત હશે. ગ્રાહકોને તેમાં 2 kWh, 3 kWh અને 4 kWh ના અલગ-અલગ બેટરી ઓપ્શન મળશે.