શેરબજાર માટે શરૂ થયો ‘રાહુ કાળ'! ક્રૂડ ઓઇલના ઉછાળા વચ્ચે રોકાણકારો માટે નિલેશ શાહની મોટી ચેતવણી

Share Market News: મિડલ ઇસ્ટમાં ચાલી રહેલા તણાવ અને ઈરાન સંકટની સીધી અસર ભલે ભારતમાં ન દેખાતી હોય, પરંતુ તેના આર્થિક ઝટકા શેરબજાર અને અર્થવ્યવસ્થા પર સ્પષ્ટ જોવા મળી રહ્યા છે. કોટક મહિન્દ્રા AMCના મેનેજિંગ ડિરેક્ટર નિલેશ શાહનું માનવું છે કે શેરબજારને અનિશ્ચિતતા જરાય પસંદ નથી. તેમણે ક્રૂડ ઓઇલની વધતી કિંમતોને ભારતીય અર્થવ્યવસ્થાની કુંડળીનો ‘રાહુ કાળ' ગણાવ્યો છે.

ક્રૂડ ઓઇલ: અર્થવ્યવસ્થા માટે સૌથી મોટું રિસ્ક

નિલેશ શાહે જણાવ્યું છે કે હાલમાં માર્કેટ માટે સૌથી મોટું જોખમ ક્રૂડ ઓઇલ છે. તેલની ઊંચી કિંમતો એક એવા ‘રાહુ કાળ' સમાન છે, જેને નજરઅંદાજ કરવું અશક્ય છે. સતત મોંઘુ રહેતું તેલ માત્ર મોંઘવારી જ નથી વધારતું, પરંતુ રૂપિયાના મૂલ્ય, બોન્ડ યીલ્ડ અને ઇક્વિટી સેન્ટિમેન્ટ પર પણ ભારે દબાણ ઊભું કરે છે.

કેવી રીતે પડે છે સીધી અસર?

જો કાચા તેલના ભાવમાં 10% નો વધારો થાય, તો ભારતનો રિટેલ ફુગાવો (મોંઘવારી દર) સીધો 20-30 બેસિસ પોઇન્ટ વધી જાય છે. આ ઉપરાંત, તે GDP ના ગ્રોથને 10-20 બેસિસ પોઇન્ટ ઘટાડે છે અને કરંટ એકાઉન્ટ ડેફિસિટ (CAD) માં 10-15 બેસિસ પોઇન્ટનો વધારો કરે છે. આપણા દેશ પર કોઈ મિસાઈલ નથી પડી રહી, પરંતુ ખાડી દેશોમાં કામ કરતા 90 લાખથી વધુ ભારતીયોની ચિંતા કરવી જરૂરી છે, કારણ કે તેઓ જે પૈસા મોકલે છે તે આપણા વિદેશી હૂંડિયામણનો બહુ મોટો હિસ્સો છે.

શેરબજારનું વેલ્યુએશન અને લાંબા ગાળાની તકો

શું હાલના લેવલ પર રોકાણ કરવું યોગ્ય છે? આના જવાબમાં નિલેશ શાહ કહે છે કે હાલમાં લાર્જ-કેપ અને મિડ-કેપ શેરનું વેલ્યુએશન યોગ્ય સ્તરે છે. તે બહુ સસ્તા નથી તો બબલ ઝોનમાં પણ નથી. જોકે, સ્મોલ-કેપ શેર્સ હજુ પણ મોંઘા છે. જો તમે શોર્ટ-ટર્મમાં 30% થી વધુ રિટર્ન પાછળ દોડી રહ્યા છો, તો માર્કેટ તમને મોંઘું લાગશે. પરંતુ લાંબા ગાળાના રોકાણકારો માટે આ એક સારી તક છે. હાલના સમયમાં જે ક્વોલિટી શેર્સ સસ્તા થયા છે (પિટાઈ ગયા છે), તેમાં સમજી વિચારીને પૈસા લગાવવાનો આ સાચો સમય છે. આ ગભરાવવાનો નહિ, પણ ધીરજ રાખવાનો સમય છે.