Closing Bell: સેન્સેક્સ 608 પોઈન્ટ તૂટ્યો, નિફ્ટી 24013 પર બંધ, IT શેરોમાં જંગી વેચવાલી

Closing Bell: સપ્તાહના છેલ્લા ટ્રેડિંગ દિવસે ભારતીય શેરબજારમાં ભારે નિરાશા અને વેચવાલીનો માહોલ જોવા મળ્યો છે. ગ્લોબલ IT જાયન્ટ એક્સેન્ચરના નબળા ગ્રોથ આઉટલુક અને વેચાણના અંદાજોની સીધી નકારાત્મક અસર સ્થાનિક IT શેરો પર પડી હતી. જેના કારણે બજાર ખુલતાની સાથે જ શરૂ થયેલું દબાણ અંત સુધી ચાલુ રહ્યું અને સેન્સેક્સ તેમજ નિફ્ટી મોટા ઘટાડા સાથે બંધ થયા.

સેન્સેક્સ અને નિફ્ટીની સ્થિતિ

આજના ટ્રેડિંગ સેશનમાં નિફ્ટી 50 ઈન્ડેક્સ 155 પોઈન્ટ એટલે કે 0.64 ટકાના ઘટાડા સાથે 24013.10 ના સ્તરે બંધ થયો હતો. જ્યારે સેન્સેક્સ 608 પોઈન્ટ અથવા 0.78 ટકા ગગડીને 76802.90 ના સ્તર પર સમેટાયો હતો.

માર્કેટમાં સૌથી વધુ નુકસાન IT સેક્ટરને થયું છે. નિફ્ટી 50 માં ઈન્ફોસિસ, ટાટા કન્સલ્ટન્સી સર્વિસિસ અને ટેક મહિન્દ્રા જેવા દિગ્ગજ શેરો ટોપ લૂઝર્સ રહ્યા હતા. IT ઈન્ડેક્સમાં સૌથી વધુ વેચવાલી જોવા મળી હતી. આ ઉપરાંત ઓટો, રિયલ્ટી અને ઓઈલ એન્ડ ગેસ સેક્ટર પર પણ મોટું દબાણ જોવા મળ્યું હતું.

એક તરફ મોટા શેરોમાં કડાકો બોલ્યો હતો, તો બીજી તરફ નાના શેરોમાં રોકાણકારોનો રસ જળવાઈ રહ્યો હતો. બ્રોડર માર્કેટમાં મજબૂતી જોવા મળી હતી, જ્યાં નિફ્ટી મિડકેપ ઈન્ડેક્સ 0.22 ટકા અને નિફ્ટી સ્મોલકેપ ઈન્ડેક્સ 0.42 ટકાના ઉછાળા સાથે ગ્રીન ઝોનમાં બંધ થયા હતા. સેક્ટોરલ પર્ફોર્મન્સની વાત કરીએ તો, આજે ફાર્મા સેક્ટરે બજારમાં શાનદાર પ્રદર્શન કર્યું હતું અને તેમાં સૌથી વધુ ખરીદી જોવા મળી હતી.

જિયોના IPO ને મળી લીલી ઝંડી

બજારમાં ઘટાડા વચ્ચે રિલાયન્સ ઇન્ડસ્ટ્રીઝની 49મી વાર્ષિક સાધારણ સભા (AGM) ખાસ ચર્ચાના કેન્દ્રમાં રહી. ચેરમેન મુકેશ અંબાણીએ જાહેરાત કરી કે જિયો પ્લેટફોર્મ્સના ડ્રાફ્ટ રેડ હેરિંગ પ્રોસ્પેક્ટસ (DRHP) ને બોર્ડ તરફથી સત્તાવાર મંજૂરી મળી ગઈ છે. આ શુક્રવારે જ IPO ના દસ્તાવેજો સેબી (SEBI) માં દાખલ કરવામાં આવી રહ્યા છે. આ પ્રસ્તાવિત IPO માં 27 કરોડ નવા શેર બહાર પાડવામાં આવશે. જોકે, આ જાહેરાત વચ્ચે NSE પર રિલાયન્સ ઇન્ડસ્ટ્રીઝનો શેર 0.9 ટકાના ઘટાડા સાથે 1315.80 રૂપિયા પર બંધ થયો હતો.

આકાશ અંબાણીની AI અને સેટેલાઇટ અંગે મોટી જાહેરાત

રિલાયન્સ જિયો ઈન્ફોકોમના ચેરમેન આકાશ અંબાણીએ ભવિષ્યના રોડમેપ વિશે જણાવ્યું હતું કે કંપની ભારતમાં લો-અર્થ ઓર્બિટ સેટેલાઇટ સેવાઓ પૂરી પાડવા માટે સેટેલાઈટ ક્ષમતા લીઝ પર લેવાની દિશામાં ઝડપથી કામ કરી રહી છે. આ માટે જરૂરી ગ્રાઉન્ડ સ્ટેશન ઈન્ફ્રાસ્ટ્રક્ચર પણ ઊભું કરવામાં આવી રહ્યું છે.

તેમણે વધુમાં ઉમેર્યું કે જિયો ખાસ ભારતીય ભાષાઓ પર આધારિત સ્વદેશી આર્ટિફિશિયલ ઈન્ટેલિજન્સ ડેવલપ કરી રહ્યું છે, જેને સીધું જ જિયો નેટવર્ક સાથે ઇન્ટિગ્રેટ કરવામાં આવશે. કંપનીનું મુખ્ય લક્ષ્ય આ દાયકાના અંત સુધીમાં AI ટેક્નોલોજીને સામાન્ય લોકો માટે વધુ સસ્તી અને સરળતાથી ઉપલબ્ધ બનાવવાનું છે.

આ પણ વાંચો-RIL AGM 2026: Jio ના મેગા IPO, AIને પ્રોત્સાહન, સોવરેન સેટેલાઈટ કોન્સ્ટેલેશન સહિત અનેક મોટી જાહેરાતો