Stock Market: સેન્સેક્સ 150 પોઈન્ટ ઉછળ્યો, નિફ્ટી 24600ને પાર, PB Fintech અને Biocon પર ખાસ નજર

Stock Market : આજના શેરબજારમાં રોકાણકારો માટે મિશ્ર સંકેતો જોવા મળી રહ્યા છે. સેન્સેક્સની વીકલી એક્સપાયરીના દિવસે માર્કેટમાં શરૂઆતી ઉતાર-ચઢાવ વચ્ચે સેન્સેક્સ 150 પોઈન્ટ ઉછળ્યો છે, જ્યારે નિફ્ટી મજબૂતી બતાવતા 24600 ની સપાટી પાર કરી ગયો છે. આજે માર્કેટના ટ્રેડર્સ અને રોકાણકારોની નજર ખાસ કરીને PB Fintech, Biocon અને Navin Fluorine જેવી કંપનીઓના શેરો પર રહેશે.

FII ની વેચવાલી અને એશિયન બજારની નબળાઈ

ગ્લોબલ માર્કેટમાંથી આજે મિશ્ર સંકેતો મળી રહ્યા છે. ગિફ્ટ નિફ્ટી હાલમાં ફ્લેટ કારોબાર કરી રહ્યો છે. બજાર માટે સૌથી મોટો અપડેટ એ છે કે, સળંગ 5 દિવસની સતત ખરીદી કર્યા બાદ વિદેશી સંસ્થાકીય રોકાણકારોએ બજારમાં ફરી વેચવાલી નોંધાવી છે. FII દ્વારા કેશ અને વાયદા બજારમાં મળીને અંદાજે 1700 કરોડ રૂપિયાની વેચવાલી કરવામાં આવી છે. અમેરિકન બજારમાં ડાઓ ફ્યુચર્સમાં સામાન્ય વધારો છે, પરંતુ બીજી તરફ એશિયન બજારોમાં ભારે દબાણ જોવા મળી રહ્યું છે. જાપાનનો નિક્કેઈ ઈન્ડેક્સ 2% અને દક્ષિણ કોરિયાનો કોસ્પી ઈન્ડેક્સ લગભગ 4% જેટલો તૂટ્યો છે.

સોના-ચાંદી અને મેટલ માર્કેટમાં શાનદાર તેજી

અમેરિકામાં બોન્ડ યીલ્ડ અને ડોલર ઈન્ડેક્સમાં નરમાશ આવવાના કારણે કિંમતી ધાતુઓમાં મોટો ઉછાળો આવ્યો છે. સોનું અને ચાંદી લગભગ 5% ઉછળીને 2 મહિનાની સૌથી ઊંચી સપાટીએ પહોંચી ગયા છે. બેઝ મેટલ્સમાં પણ ભારે તેજી છે. કોપરના ભાવ રેકોર્ડ હાઈ પર પહોંચ્યા છે, જ્યારે એલ્યુમિનિયમના ભાવ પણ ઉછળીને 6 સપ્તાહની ટોચે આવી ગયા છે.

ક્રૂડ ઓઈલની સપ્લાય અને અમેરિકન માર્કેટ

વૈશ્વિક સ્તરે એક હકારાત્મક સમાચાર એ છે કે 'સ્ટ્રેટ ઓફ હોર્મુઝ' માર્ગ પરથી કાચા તેલની સપ્લાયમાં સુધારો થઈ શકે તેવી શક્યતા છે. આ અંગે ઈરાન અને ઓમાન વચ્ચે એક મહત્વનો એગ્રીમેન્ટ થયો છે, જેનો ફાઈનલ ડ્રાફ્ટ ટૂંક સમયમાં જાહેર થઈ શકે છે. આ જ કારણથી બ્રેન્ટ ક્રૂડ 80 ડોલરની નીચે ટ્રેડ કરી રહ્યું છે.