Stock Market Update: શેરબજારની નબળી શરૂઆત, સેન્સેક્સ 250 પોઈન્ટ ગગડ્યો, નિફ્ટી 25400ની નીચે

Stock Market Update: અઠવાડિયાના છેલ્લા ટ્રેડિંગ સેશનમાં એટલે કે શુક્રવારે (27 ફેબ્રુઆરી 2026), ભારતીય શેરબજારની શરૂઆત નિરાશાજનક રહી છે. વૈશ્વિક બજારોમાંથી મળેલા મિશ્ર સંકેતો વચ્ચે આજે ભારતીય માર્કેટ ઘટાડા સાથે ખુલ્યું હતું. આઈટી (IT) શેરોમાં આજે થોડો વધારો જોવા મળ્યો છે, પરંતુ અન્ય સેક્ટરોમાં ભારે વેચવાલીના કારણે બજાર દબાણ હેઠળ દેખાઈ રહ્યું છે.

માર્કેટ પર નેગેટિવ અસર પાડવામાં ખાસ કરીને ઇન્ડેક્સ હેવીવેઈટ શેરો જેવા કે રિલાયન્સ ઇન્ડસ્ટ્રીઝ (Reliance Industries) અને એચડીએફસી બેન્ક (HDFC Bank) ની નબળાઈનું મોટું યોગદાન છે. આ ઉપરાંત, અમેરિકા અને ઈરાન વચ્ચે વધી રહેલા ભૌગોલિક તણાવને કારણે રોકાણકારો સાવચેત બન્યા છે અને સમયાંતરે પોતાનો નફો બુક કરી રહ્યા છે.

સેન્સેક્સ અને નિફ્ટીની હાલની સ્થિતિ

30 શેરો વાળો BSE નો સેન્સેક્સ 82,246ના સ્તર પર લગભગ ફ્લેટ ખુલ્યો હતો. પરંતુ માર્કેટ ખુલતાની સાથે જ તેમાં વેચવાલી હાવી થઈ ગઈ. સવારે 9:24 વાગ્યે સેન્સેક્સ 237.94 પોઈન્ટ એટલે કે 0.29 ટકાના ઘટાડા સાથે 82,010.67 પર ટ્રેડ થઈ રહ્યો હતો.

તેવી જ રીતે, નેશનલ સ્ટોક એક્સચેન્જ (NSE) નો નિફ્ટી-50 (Nifty-50) પણ લાલ નિશાનમાં 25,459 પર ખુલ્યો હતો. 2:29 વાગ્યાની આસપાસ નિફ્ટી 111 પોઈન્ટ એટલે કે 0.44 ટકાના ઘટાડા સાથે 25,385 પર કારોબાર કરતો જોવા મળ્યો હતો.

ગ્લોબલ માર્કેટમાંથી કેવા છે સંકેત?

શુક્રવારે એશિયન બજારોમાં પણ મિશ્ર વલણ જોવા મળ્યું હતું. આ અગાઉ અમેરિકન શેરબજારમાં પણ ઘટાડો નોંધાયો હતો. અમેરિકાની જાણીતી કંપની એનવિડિયા (Nvidia) એ પોતાના ત્રિમાસિક પરિણામો ઘણા સારા આપ્યા છે, તેમ છતાં તેના શેરમાં ભારે કડાકો બોલ્યો હતો. જેની સીધી અસર આખા ટેકનોલોજી સેક્ટર પર પડી છે.