બજારમાંથી મોટું ફંડ ઉઘરાવશે આ સરકારી કંપની, FY27માં 5%નો FPO લાવવાની તૈયારી, જાણો રોકાણકારોને શું થશે ફાયદો?

Steel Authority of India FPO: સરકારી ક્ષેત્રની સૌથી મોટી સ્ટીલ ઉત્પાદક કંપની સ્ટીલ ઓથોરિટી ઓફ ઈન્ડિયા લિમિટેડ શેરબજારમાંથી મોટું ફંડ એકઠું કરવાની તૈયારી કરી રહી છે. મળતી માહિતી મુજબ, આ મહારત્ન કંપની ચાલુ નાણાકીય વર્ષ (FY27) માં 5 ટકાનો ફોલો-ઓન પબ્લિક ઓફર લાવવા માંગે છે.

આ મેગા પ્લાન માટે કંપનીએ નાણા મંત્રાલયના ડિપાર્ટમેન્ટ ઓફ ઇન્વેસ્ટમેન્ટ એન્ડ પબ્લિક એસેટ મેનેજમેન્ટનો સંપર્ક કર્યો છે અને મંજૂરી માંગી છે. કંપનીની યોજના આ નવા શેર બહાર પાડીને જે ફંડ મળે, તેનો સીધો ઉપયોગ પોતાના પ્લાન્ટ્સના આધુનિકીકરણ અને વિસ્તરણની જરૂરિયાતો પૂરી કરવા માટે કરવાનો છે.

FPO રસ્તો OFS થી કેવી રીતે અલગ છે?

સામાન્ય રીતે સરકાર પોતાની કંપનીઓમાં હિસ્સો વેચવા માટે OFSનો રસ્તો પસંદ કરતી હોય છે, પરંતુ SAIL આ વખતે FPO લાવવાની તૈયારીમાં છે. OFS દ્વારા જ્યારે સરકાર પોતાના શેર વેચે છે, ત્યારે તેમાંથી મળેલા તમામ પૈસા સીધા ભારત સરકારના ખાતામાં જાય છે, કંપનીને તેનો કોઈ સીધો લાભ મળતો નથી. FPO હેઠળ કંપની સામાન્ય જનતા માટે નવા ઇક્વિટી શેર બહાર પાડે છે. આનાથી જે પણ રકમ એકઠી થાય છે, તે સીધી કંપનીની બેલેન્સ શીટમાં જાય છે. કંપની આ પૈસાનો ઉપયોગ પોતાના બિઝનેસને મોટો કરવામાં કરી શકે છે. હાલમાં SAIL માં ભારત સરકારનો 65 ટકા હિસ્સો છે. જ્યારે નવા શેર બજારમાં આવશે ત્યારે સરકારની હિસ્સેદારીમાં થોડો ઘટાડો ચોક્કસ થશે, પરંતુ આ પ્રક્રિયાથી સરકારને કોઈ સીધી આવક નહીં થાય. પૂરેપૂરી રકમ કંપનીના ખાતામાં જ જશે.

શા માટે ફંડની જરૂર પડી?

ઇસ્પાત મંત્રાલય હેઠળ આવતી આ કંપની છેલ્લા કેટલાક વર્ષોથી પોતાની ઉત્પાદન ક્ષમતા વધારવા પર ભાર મૂકી રહી છે. SAIL હાલમાં દેશભરમાં 5 મોટા ઇન્ટિગ્રેટેડ સ્ટીલ પ્લાન્ટ (ભિલાઈ, બોકારો, રાઉરકેલા, દુર્ગાપુર અને બર્નપુર) અને 3 સ્પેશિયલ સ્ટીલ પ્લાન્ટ ચલાવે છે.

નવા શેર વેચીને મળનારું ફંડ કંપની માટે એક મોટી રાહત બનશે. કારણ કે, વિસ્તરણ માટે કંપનીને બેન્કો પાસેથી મોંઘી લોન લેવી નહીં પડે અથવા માત્ર પોતાના નફા પર આધાર રાખવો નહીં પડે.