Share Market: એપ્રિલ એક્સપાયરીના દિવસે બજારમાં વોલેટિલિટી, નિફ્ટી 24,000ની સપાટી પર, પણ PSU બેંકોમાં વેચવાલી

Share Market: ભારતીય શેરબજારમાં આજે એટલે કે 28 એપ્રિલે એપ્રિલ સીરીઝની મંથલી એક્સપાયરીના દિવસે ભારે ઉતાર-ચઢાવ જોવા મળી રહ્યો છે. વૈશ્વિક બજારોમાંથી મળી રહેલા મિશ્ર સંકેતો અને ગિફ્ટ નિફ્ટીની નબળાઈને પગલે ભારતીય બેન્ચમાર્ક ઇન્ડેક્સ લાલ નિશાનમાં ખુલ્યા છે. જોકે, નિફ્ટી 24,000 ના મનોવૈજ્ઞાનિક સ્તરને જાળવી રાખવામાં સફળ રહ્યો છે.

બજારની શરૂઆત અને વર્તમાન સ્થિતિ

શેરબજારમાં કામકાજની શરૂઆત નબળી રહી હતી. સેન્સેક્સ 225.70 પોઈન્ટ અથવા 0.29% ના ઘટાડા સાથે 77,077.93 પર ટ્રેડ કરી રહ્યો હતો. બીજી તરફ, નિફ્ટી 57.40 પોઈન્ટ અથવા 0.24% ઘટીને 24,035.30 ના સ્તરે જોવા મળ્યો હતો. બજારમાં અત્યાર સુધી લગભગ 1306 શેરમાં તેજી જોવા મળી છે, જ્યારે 890 શેર ઘટ્યા છે અને 182 શેરમાં કોઈ ફેરફાર થયો નથી.

સેક્ટરલ અપડેટ: બેંકિંગ અને ફાઇનાન્શિયલ શેરોમાં દબાણ

આજના કારોબારમાં સૌથી વધુ દબાણ પબ્લિક સેક્ટર (PSU) બેંકો અને ફાઇનાન્શિયલ શેરોમાં જોવા મળી રહ્યું છે.

વધનારા શેરો: કોલ ઈન્ડિયા, ગ્રાસિમ ઈન્ડસ્ટ્રીઝ, ડૉ. રેડ્ડીઝ લેબ્સ, અદાણી એન્ટરપ્રાઈઝ અને ONGC નિફ્ટીમાં ટોપ ગેનર્સ રહ્યા છે.

ઘટનારા શેરો: SBI, એક્સિસ બેંક, ઇન્ટરગ્લોબ એવિએશન (IndiGo), ટ્રન્ટ (Trent) અને ઈટરનલ જેવા શેરોમાં વેચવાલીનું દબાણ છે.