મધ્ય પૂર્વમાં યુદ્ધના ભણકારા! અમેરિકી યુદ્ધ જહાજ પર મિસાઇલ હુમલો, ક્રૂડમાં 5%નો ઉછાળો, કાલે નિફ્ટીમાં કડાકાના સંકેત

વૈશ્વિક રાજકારણ અને શેરબજાર માટે ચિંતાજનક સમાચાર સામે આવી રહ્યા છે. મધ્ય પૂર્વમાં વધતા તણાવ વચ્ચે ઈરાનની ન્યૂઝ એજન્સીએ દાવો કર્યો છે કે અમેરિકાના એક યુદ્ધ જહાજ પર મિસાઈલ હુમલો કરવામાં આવ્યો છે. આ સમાચારની સીધી અસર કાચા તેલના ભાવ અને શેરબજાર પર જોવા મળી રહી છે. 5 મે ના રોજ જ્યારે ભારતીય બજાર ખુલશે ત્યારે નિફ્ટીમાં મોટો ઘટાડો જોવા મળી શકે છે.

અમેરિકી યુદ્ધ જહાજ પર બે મિસાઇલ હુમલા

ઈરાનની ફાર્સ ન્યૂઝ એજન્સીના અહેવાલ મુજબ, 4 મે ના રોજ જાસ્ક ટાપુ પાસે અમેરિકાના એક યુદ્ધ જહાજ પર બે મિસાઈલો પડી હતી. ઈરાનની ચેતવણીઓને અવગણીને આગળ વધી રહેલા આ જહાજને હુમલા બાદ પાછા ફરવું પડ્યું હતું. આ ઘટના એવા સમયે બની છે જ્યારે અમેરિકી રાષ્ટ્રપતિ ડોનાલ્ડ ટ્રમ્પે હોર્મુઝ સ્ટ્રેટમાં ફસાયેલા જહાજોને સુરક્ષિત બહાર કાઢવા માટે 'પ્રોજેક્ટ ફ્રીડમ' નામના નૌકાદળ મિશનની જાહેરાત કરી હતી.

ક્રૂડ ઓઈલમાં ભડકો અને નિફ્ટી પર સંકટ

આ હુમલાના સમાચાર વાયુવેગે ફેલાતા જ આંતરરાષ્ટ્રીય બજારમાં બ્રેન્ટ ક્રૂડના ભાવમાં અંદાજે 5% નો ઉછાળો જોવા મળ્યો હતો અને તે 113.35 ડોલર પ્રતિ બેરલ પર પહોંચી ગયો હતો.

GIFT Nifty: 4 મે ના રોજ બપોરે ગિફ્ટ નિફ્ટી 0.6% ના ઘટાડા સાથે 24,010.5 ના સ્તરે ટ્રેડ થઈ રહ્યો હતો.

બજારની આગાહી: નિષ્ણાતો માની રહ્યા છે કે આવતીકાલે 5 મે ના રોજ સેન્સેક્સ અને નિફ્ટીમાં 'ગેપ-ડાઉન' ઓપનિંગ થઈ શકે છે અને નિફ્ટી 24,000 ની નીચે સરકી શકે છે.