LIC MFનું નવું ટેક્નોલોજી ફંડ લોન્ચ: માત્ર 200ની SIPથી AI અને ડેટા સેન્ટરમાં રોકાણ કરવાની શાનદાર તક

LIC MF Technology Fund: ટેક્નોલોજી સેક્ટર અત્યારે જે ઝડપે આગળ વધી રહ્યું છે તે જોતાં તેમાં રોકાણ કરવું ઘણા લોકો માટે આકર્ષક બની ગયું છે. એલઆઈસી મ્યુચ્યુઅલ ફંડે રોકાણકારો માટે એક નવી તક ઊભી કરી છે. તેમણે શુક્રવારે પોતાનો નવો ‘એલઆઈસી એમએફ ટેક્નોલોજી ફંડ' બજારમાં ઉતાર્યો છે. આ એક ઓપન એન્ડેડ થીમેટિક ઇક્વિટી સ્કીમ છે જે ખાસ કરીને ટેક્નોલોજી અને તેને લગતી કંપનીઓમાં રોકાણ કરશે.

આ સ્કીમનો ન્યુ ફંડ ઓફર (NFO) આજથી એટલે કે 20 ફેબ્રુઆરીથી સબસ્ક્રિપ્શન માટે ખુલી ગયો છે. તમે 6 માર્ચ સુધી આમાં પૈસા લગાવી શકશો. એનએફઓ પૂરો થયા પછી 19 માર્ચથી આ ફંડ નિયમિત ખરીદી અને વેચાણ માટે ફરીથી ઉપલબ્ધ થશે. સૌથી સારી વાત એ છે કે નાના રોકાણકારો પણ આ ફંડનો લાભ લઈ શકે છે.

ચાલો આ નવા ફંડની કેટલીક મહત્વની વિગતો જોઈએ:

ફંડનું નામ: એલઆઈસી એમએફ ટેક્નોલોજી ફંડ

લઘુત્તમ રોકાણ: એકસાથે રોકાણ કરવા માટે 1000 રૂપિયા જરૂરી છે. ત્યારપછી 1 રૂપિયાના ગુણાંકમાં રોકાણ વધારી શકાય.

SIPની સુવિધા: તમે રોજની 100 રૂપિયા, દર મહિને 200 રૂપિયા અથવા દર ત્રણ મહિને 1000 રૂપિયાની SIP શરૂ કરી શકો છો.

પ્લાન: રેગ્યુલર અને ડિરેક્ટ (Growth અને IDCW ઓપ્શન સાથે)

ફંડ મેનેજર: આ ફંડનું સંચાલન કરન દોશી અને જયપ્રકાશ તોશનીવાલ બંને સાથે મળીને કરશે.

બ્રેન્ચમાર્ક અને રિસ્ક: આ ફંડ BSE TECK TRI ને ટ્રેક કરશે અને તેમાં જોખમનું પ્રમાણ ઘણું વધારે (very high risk) રહેલું છે.

એક્ઝિટ લોડ: જો તમે 90 દિવસની અંદર 12 ટકા કરતા વધુ યુનિટ રિડીમ કરો છો તો 1 ટકા એક્ઝિટ લોડ ચૂકવવો પડશે.

આ ફંડ મુખ્યત્વે એવી કંપનીઓ પર ધ્યાન કેન્દ્રિત કરશે જે ભવિષ્યની ટેક્નોલોજી સાથે જોડાયેલી છે. તેમાં ઇન્ટરનેટ, ડિજિટલ પ્લેટફોર્મ, ડેટા સેન્ટર અને ઇ કોમર્સ સેક્ટરની કંપનીઓનો સમાવેશ થાય છે. સ્કીમના કુલ રોકાણનો 80થી 100 ટકા હિસ્સો આ સેક્ટરમાં જશે. બાકીના 20 ટકા પૈસા બજારની જરૂરિયાત મુજબ અન્ય જગ્યાએ રોકાણ કરવામાં આવશે.

અહીં ફંડ મેનેજર્સ પોર્ટફોલિયો બનાવવા માટે બોટમ-અપ એપ્રોચ અપનાવશે. એટલે કે ફક્ત મોટી કંપનીઓ જ નહીં પણ જે બિઝનેસ મોડલ મજબૂત છે, મેનેજમેન્ટ સારું છે અને જેમાં ગ્રોથની પૂરી સંભાવના છે તેવી કંપનીઓ પસંદ કરવામાં આવશે.

એલઆઈસી મ્યુચ્યુઅલ ફંડના ચીફ ઇન્વેસ્ટમેન્ટ ઓફિસર યોગેશ પાટીલે જણાવ્યું છે કે તેઓ લાંબા ગાળે સારો ગ્રોથ આપી શકે તેવી કંપનીઓ પસંદ કરવા પર ભાર મૂકી રહ્યા છે. મજબૂત કેશ ફ્લો ધરાવતા બિઝનેસ તેમની પ્રાથમિકતા રહેશે. બીજી તરફ એમડી અને સીઇઓ આર. કે. ઝાએ બજેટ 2026-27 નો સંદર્ભ આપતા કહ્યું કે સરકાર સેમિકન્ડક્ટર અને ડિજિટલ ઇન્ફ્રાસ્ટ્રક્ચર પર ઘણું ધ્યાન આપી રહી છે. ભારતમાં એઆઈનો ઉપયોગ વધી રહ્યો છે ત્યારે આવનારા વર્ષોમાં શેરબજારમાં રોકાણકારો માટે આ સેક્ટરમાં સારી તકો ઊભી થશે.

પરંપરાગત આઇટી ફંડ્સ કરતા આ ફંડ થોડો અલગ છે. તે માત્ર આઇટી કંપનીઓ પૂરતો મર્યાદિત નથી. તે સેમિકન્ડક્ટર અને ઇન્ટરનેટ બિઝનેસ જેવા નવા અને ઝડપથી વિકસતા ક્ષેત્રોમાં પણ વિસ્તરશે.

જે રોકાણકારો લાંબા ગાળા માટે મૂડી વધારવા માંગે છે અને ટેક્નોલોજી સેક્ટરની તેજીનો લાભ લેવા ઈચ્છે છે તેમના માટે આ એક સારો વિકલ્પ સાબિત થઈ શકે છે.

આ પણ વાંચો- બાંગ્લાદેશમાં સત્તા પરિવર્તન પછી મોટો નિર્ણય: તારિક રહેમાને ભારતીયો માટે વિઝા સેવા ફરી શરૂ કરી

(ડિસ્ક્લેમર: અહીં આપેલી માહિતી માત્ર NFOની જાણકારી માટે છે, આ કોઈ રોકાણની સલાહ નથી. મ્યુચ્યુઅલ ફંડમાં રોકાણ બજારના જોખમોને આધીન હોય છે. રોકાણનો અંતિમ નિર્ણય લેતા પહેલા તમારા આર્થિક સલાહકારની મદદ લેવી હિતાવહ છે.)