સિદ્ધિવિનાયક મંદિરમાં દર વર્ષે 18 કરોડની લૂંટ! રાજ ઠાકરેના ચોંકાવનારા દાવાથી મહારાષ્ટ્રના રાજકારણમાં ખળભળાટ

Siddhivinayak Temple theft: મહારાષ્ટ્રના રાજકારણમાં હાલમાં એક મોટો ભૂકંપ આવ્યો છે. મહારાષ્ટ્ર નવનિર્માણ સેના (MNS)ના રાષ્ટ્રીય અધ્યક્ષ રાજ ઠાકરેએ દેશના સૌથી પવિત્ર અને પ્રખ્યાત મંદિરોમાં ચાલતા ભ્રષ્ટાચાર અંગે અત્યંત ચોંકાવનારા દાવા કર્યા છે. MNSની વિદ્યાર્થી પાંખના એક કાર્યક્રમમાં બોલતા તેમણે સ્પષ્ટ કહ્યું કે આજના સમયમાં મંદિરો પણ સુરક્ષિત રહ્યા નથી. નિરાશ યુવાનો શાંતિ માટે મંદિરોમાં જાય છે, પરંતુ ત્યાં પણ ભ્રષ્ટાચારના મૂળિયાં ફેલાયેલા છે.

રાજ ઠાકરેના ભાષણના મુખ્ય અને ચોંકાવનારા મુદ્દાઓ:

સિદ્ધિવિનાયક મંદિરમાં ચોરી: મુંબઈના સુપ્રસિદ્ધ સિદ્ધિવિનાયક મંદિરમાં દર વર્ષે 18 કરોડ રૂપિયાની ચોરી થતી હોવાનો દાવો.

રામ મંદિરમાં ભ્રષ્ટાચાર: અયોધ્યાના ભવ્ય રામ મંદિરમાં પણ 1400 કરોડ રૂપિયાની ચોરી થઈ હોવાનો આક્ષેપ.

દાનપેટીમાંથી કેવી રીતે પકડાઈ ચોરી?

રાજ ઠાકરેએ મહારાષ્ટ્રના નેતા એકનાથ શિંદેને સિદ્ધિવિનાયક મંદિરના 8 ટ્રસ્ટીઓ દ્વારા લખાયેલા એક પત્રનો ખુલાસો કર્યો હતો. તેમણે જણાવ્યું કે, ટ્રસ્ટીઓની સતર્કતાના કારણે મંદિરની દાનપેટીમાંથી પૈસાની ચોરી કરતા કેટલાક કર્મચારીઓને રંગેહાથ પકડી લેવામાં આવ્યા હતા. આ ઘટના પહેલાં મંદિરમાં દર અઠવાડિયે દાનપેટીમાંથી 50 લાખ રૂપિયાથી પણ ઓછી આવક થતી હતી. પરંતુ ચોરો પકડાયા બાદ અચાનક જ આ સાપ્તાહિક દાનની રકમ ઉછળીને 1.5 કરોડ રૂપિયા થઈ ગઈ! આ આંકડાઓને આધારે રાજ ઠાકરેએ ગણતરી આપી છે કે મંદિરમાંથી વાર્ષિક 18 કરોડ રૂપિયા સગેવગે કરવામાં આવતા હતા.

સિદ્ધિવિનાયક મંદિર ટ્રસ્ટનો બચાવ શું છે?

આ આક્ષેપો બાદ સિદ્ધિવિનાયક મંદિર ટ્રસ્ટના અધ્યક્ષ અને શિવસેના નેતા સદા સરવણકરે પોતાનો પક્ષ રજૂ કર્યો છે. તેમણે સ્પષ્ટતા કરતા કહ્યું કે, મંદિરમાં ચોરી કરનારા 9 કર્મચારીઓની અગાઉથી જ ધરપકડ કરી લેવામાં આવી છે અને તેમની સામે કાયદેસરના ગુના પણ નોંધાયા છે. જોકે, સરવણકરે એવો દાવો કર્યો છે કે મંદિરમાં દાનની રકમમાં જે વધારો જોવા મળ્યો છે, તે ચોરી પકડાવાને કારણે નહીં, પરંતુ ટ્રસ્ટ દ્વારા કરવામાં આવેલા સારા કામો અને વિશેષ પ્રયાસોને આભારી છે.

વિપક્ષના પ્રહારો અને SIT તપાસ

છેલ્લા કેટલાક સમયથી મંદિરોમાં શ્રદ્ધાળુઓ દ્વારા અપાતા દાનની ચોરીના કિસ્સાઓ સતત સામે આવી રહ્યા છે. આ મુદ્દાને હથિયાર બનાવીને વિપક્ષ રાજ્ય અને કેન્દ્ર સરકાર પર આકરા પ્રહારો કરી રહ્યો છે. અયોધ્યાના રામ મંદિરમાં પણ ભ્રષ્ટાચારના આક્ષેપો બાદ મામલો ગરમાયો છે અને સુપ્રીમ કોર્ટના કડક આદેશ બાદ હવે SITની રચના કરવામાં આવી છે, જે આ સમગ્ર કૌભાંડની ઊંડાણપૂર્વક તપાસ કરી રહી છે.

રાજ ઠાકરેના આ ખુલાસાઓએ રાજકીય માહોલ ગરમાવી દીધો છે. શ્રદ્ધાળુઓની આસ્થા અને મંદિરોની સુરક્ષા પર ઉઠેલા આ સવાલો આવનારા દિવસોમાં મહારાષ્ટ્રથી લઈને દિલ્હી સુધી રાજકીય જંગનું મોટું કારણ બની શકે છે. હવે જોવાનું એ રહે છે કે SIT ની તપાસમાં શું નવા ખુલાસા થાય છે.

આ પણ વાંચો- Income Tax Return: 31 જુલાઈ સુધીમાં ITR ફાઈલ કરવાનું ચૂકી ગયા છો? ટેન્શન ના લો, જાણો હવે તમારી પાસે કયા છે ઓપ્શન