US statement: ટ્રાયલ સાચી રીતે ચાલે, જર્મની બાદ અમેરિકાએ પણ અરવિંદ કેજરીવાલની ધરપકડ પર કરી વાત

US statement: જર્મની બાદ અમેરિકાએ પણ દિલ્હીના કથિત લિકર કૌભાંડમાં CM અરવિંદ કેજરીવાલની ધરપકડ સામે સખત વાંધો વ્યક્ત કર્યો છે. US સ્ટેટ ડિપાર્ટમેન્ટે એક નિવેદનમાં કહ્યું કે તેઓ દિલ્હીના મુખ્યમંત્રી અને અગ્રણી વિપક્ષી નેતા અરવિંદ કેજરીવાલની ધરપકડ બાદ તેમની સાથે સંબંધિત અહેવાલો પર સતત નજર રાખી રહ્યા છે. અમેરિકાએ એમ પણ કહ્યું કે તે કેજરીવાલના કેસમાં નિષ્પક્ષ, પારદર્શક અને સમયસર કાનૂની પ્રક્રિયાની રાહ જોઈ રહ્યું છે. આ પહેલા જર્મનીએ પણ કેજરીવાલની ધરપકડ સામે વિરોધ નોંધાવ્યો હતો. જેના પર ભારતે જર્મન રાજદૂતને બોલાવીને તેને આંતરિક મામલો ગણાવ્યો હતો. હવે આ અંગે અમેરિકાનું નિવેદન આવ્યું છે.

દિલ્હીના મુખ્યમંત્રી અરવિંદ કેજરીવાલની ધરપકડ માત્ર દેશમાં જ નહીં વિદેશમાં પણ ચર્ચામાં છે. EDએ 21 માર્ચે લિકર કૌભાંડ કેસમાં તેની ધરપકડ કરી હતી. તે જ દિવસે કેજરીવાલ દ્વારા ધરપકડમાંથી રાહત માટે દિલ્હી હાઈકોર્ટમાં અપીલ દાખલ કરવામાં આવી હતી, જેને કોર્ટે ફગાવી દીધી હતી. ત્યારબાદ રાત્રે EDની ટીમ કેજરીવાલના ઘરે પહોંચે છે અને લગભગ બે કલાકની પૂછપરછ અને ઘરની તલાશી બાદ તેની ધરપકડ કરીને પોતાની સાથે લઈ જાય છે. કેજરીવાલની ધરપકડ સામે વિરોધ પક્ષોએ પણ સખત વાંધો વ્યક્ત કર્યો હતો. કોંગ્રેસ પાર્ટી અને ઈન્ડિયા એલાયન્સના અન્ય સહયોગીઓએ ચૂંટણી પહેલા તેને ષડયંત્ર ગણાવ્યું હતું.

અમેરિકાની આ પ્રતિક્રિયા જર્મનીના નિવેદનના થોડા દિવસો બાદ આવી છે. જ્યારે જર્મનીએ કહ્યું કે ભારતમાં આરોપોનો સામનો કરી રહેલા આમ આદમી પાર્ટીના નેતા કેજરીવાલ અન્ય ભારતીય નાગરિકોની જેમ ન્યાયી અને નિષ્પક્ષ ટ્રાયલના હકદાર છે. જર્મન સરકારના પ્રવક્તાએ ગયા શુક્રવારે કહ્યું હતું કે, "અમે માનીએ છીએ અને અપેક્ષા રાખીએ છીએ કે ભારતીય ન્યાયતંત્રની સ્વતંત્રતા અને મૂળભૂત લોકતાંત્રિક સિદ્ધાંતો સંબંધિત ધોરણો આ કેસમાં પણ લાગુ કરવામાં આવશે."

ભારતે ઉઠાવ્યો વાંધો

કેજરીવાલની ધરપકડ પર જર્મનીની ટિપ્પણી પર ભારત સરકારે આકરી પ્રતિક્રિયા આપી હતી. જર્મન રાજદૂતને બોલાવીને, વિદેશ મંત્રાલયે તેને "આંતરિક બાબતોમાં સ્પષ્ટ હસ્તક્ષેપ" ગણાવ્યું. વિદેશ મંત્રાલયે કહ્યું હતું કે, "અમે આવી ટિપ્પણીઓને અમારી ન્યાયિક પ્રક્રિયામાં હસ્તક્ષેપ અને અમારી ન્યાયતંત્રની સ્વતંત્રતાને ક્ષતિગ્રસ્ત ગણીએ છીએ."

જર્મની સામે ભારતના વિરોધ અંગે પૂછવામાં આવતા, US સ્ટેટ ડિપાર્ટમેન્ટે રોઇટર્સને કહ્યું, "તમારે જર્મની વિદેશ મંત્રાલયને ભારત સરકાર સાથેની તેમની ચર્ચાઓ વિશે વધુ માહિતી માટે પૂછવું જોઈએ." જો કે, ભારત સરકારે હજુ સુધી અમેરિકાની ટિપ્પણી પર કોઈ પ્રતિક્રિયા આપી નથી.

કેજરીવાલની સાત દિવસની ED કસ્ટડી, સમર્થકો કરી રહ્યા છે વિરોધ

એન્ફોર્સમેન્ટ ડિરેક્ટોરેટે ગયા અઠવાડિયે જ કેજરીવાલની ધરપકડ કરી હતી. 21 માર્ચની રાત્રે તેમની ધરપકડ બાદ તેમને 22ના રોજ કોર્ટમાં રજૂ કરવામાં આવ્યા હતા અને કોર્ટના આદેશ બાદ કેજરીવાલ આગામી ગુરુવાર સુધી EDની કસ્ટડીમાં રહેશે. કેજરીવાલની દિલ્હીમાં કથિત લિકર નીતિ કૌભાંડના સંબંધમાં ધરપકડ કરવામાં આવી છે. આ મુદ્દે EDની ટીમ દિલ્હીના ડેપ્યુટી CM મનીષ સિસોદિયા અને તેલંગાણાના પૂર્વ CM કે ચંદ્રશેખર રાવની પુત્રી કવિતાની ધરપકડ કરી ચૂકી છે. આમ આદમી પાર્ટીએ કેજરીવાલની ધરપકડને 2024ની લોકસભા ચૂંટણી પહેલા ભાજપનું કાવતરું ગણાવ્યું છે. બીજી તરફ, EDએ આ કેસમાં કહ્યું છે કે કેજરીવાલને પૂછપરછ માટે 9 વખત સમન્સ મોકલવામાં આવ્યા હતા પરંતુ તેઓ હાજર થયા ન હતા. 10મી સમન્સ સાથે, EDએ તેની ધરપકડ કરી અને તેને લઈ ગયો.

આ પણ વાંચો-Loksabha Election 2024: ખાસ ડ્રોનથી ખુણા પર રહેશે બાજ નજર, ગડબડી કરનારની હવે ખેર નહીં

બીજી તરફ ધરપકડ બાદ પણ કેજરીવાલે CM પદ પરથી રાજીનામું આપ્યું નથી. તેમની ધરપકડથી દિલ્હીમાં ઉગ્ર વિરોધ થયો છે. આમ આદમી પાર્ટીના સમર્થકો ઉપરાંત મુખ્ય વિરોધ પક્ષો, બંગાળના મુખ્યમંત્રી મમતા બેનર્જીની તૃણમૂલ અને તમિલનાડુના શાસક દ્રવિડ મુનેત્ર કઝગમ અને કોંગ્રેસ પણ વિરોધ કરી રહ્યા છે.