Assembly Elections Schedule: 5 રાજ્યોની વિધાનસભા ચૂંટણીની તારીખો પર આવ્યું મોટું અપડેટ, જાણો યુપીથી પંજાબ સુધી ક્યારે વાગશે ચૂંટણીનું રણશિંગું

Assembly Elections Schedule: દેશના 5 રાજ્યોમાં યોજાનારી વિધાનસભા ચૂંટણીઓની રાહ જોઈ રહેલા લોકો અને રાજકીય પક્ષો માટે ખૂબ જ મોટા સમાચાર સામે આવ્યા છે. સૂત્રો પાસેથી મળેલી માહિતી મુજબ, ભારતીય ચૂંટણી પંચ આગામી વર્ષે એટલે કે જાન્યુઆરી મહિનાના પ્રથમ પખવાડિયામાં (પહેલા અઠવાડિયાની આસપાસ) 5 રાજ્યોના ચૂંટણી કાર્યક્રમની સત્તાવાર જાહેરાત કરી શકે છે. જે 5 રાજ્યોમાં વિધાનસભાની ચૂંટણી યોજાવાની છે તેમાં ઉત્તર પ્રદેશ, પંજાબ, ઉત્તરાખંડ, મણિપુર અને ગોવાનો સમાવેશ થાય છે.

ચૂંટણી પંચ દ્વારા તારીખોની આ જાહેરાત મુખ્ય ચૂંટણી કમિશનર અને અન્ય બે ચૂંટણી કમિશનરોની તમામ 5 ચૂંટણી રાજ્યોની મુલાકાત પૂર્ણ થયા બાદ કરવામાં આવશે.

ચૂંટણી પંચની સંપૂર્ણ બેંચ નવેમ્બરના છેલ્લા અઠવાડિયે અથવા ડિસેમ્બર મહિના દરમિયાન આ પાંચેય રાજ્યોની મુલાકાત શરૂ કરી શકે છે. જોકે, પૂર્ણ પંચના પ્રવાસની તારીખો તમામ રાજ્યોમાં નાયબ ચૂંટણી કમિશનર (DEC) સ્તરની ટીમોના પ્રવાસ પૂરા થયા પછી જ નક્કી કરવામાં આવશે. ચૂંટણી પંચની DEC સ્તરની ટીમો નવેમ્બરના અંત સુધીમાં તમામ પાંચેય રાજ્યોની મુલાકાત પૂર્ણ કરી લેશે.

કયા રાજ્યમાં કેટલી પહોંચી તૈયારી?

પંજાબ, ઉત્તરાખંડ અને મણિપુરમાં DEC સ્તરની ટીમોની મુલાકાત પહેલેથી જ પૂર્ણ થઈ ચૂકી છે. ઉત્તર પ્રદેશમાં એક મુલાકાત પૂરી થઈ ગઈ છે, જ્યારે હજુ બીજી બે મુલાકાતો થવાની નક્કી છે.ગોવામાં DEC ટીમની મુલાકાત હજુ થવાની બાકી છે.

આ મુલાકાતો દરમિયાન ચૂંટણી પંચની ટીમો જિલ્લા ચૂંટણી અધિકારીઓ અને પોલીસ અધિક્ષકો (SPs) સાથે બેઠક કરીને ચૂંટણીલક્ષી તૈયારીઓની સમીક્ષા કરે છે.

રાજકીય પક્ષો અને ઉચ્ચ અધિકારીઓ સાથે થશે ચર્ચા

DEC સ્તરની ટીમો પોતાનો પ્રવાસ પૂરો કર્યા બાદ પોતાનો રિપોર્ટ ત્રણેય ચૂંટણી કમિશનરોને સોંપશે. ત્યારબાદ મુખ્ય ચૂંટણી કમિશનર અને બંને ચૂંટણી કમિશનરો પોતે આ પાંચેય રાજ્યોની મુલાકાત લેશે. પૂર્ણ પંચની આ મુલાકાતમાં જિલ્લા કલેક્ટરો અને પોલીસ અધિક્ષકો ઉપરાંત રાજ્યોના મુખ્ય સચિવો, પોલીસ મહાનિર્દેશકો અને તમામ રાજકીય પક્ષોના પ્રતિનિધિઓ સાથે વ્યાપક સ્તરે ચર્ચા-વિચારણા કરવામાં આવશે.

કયા રાજ્યમાં કેટલા તબક્કામાં થઈ શકે છે મતદાન?

સૂત્રોના જણાવ્યા અનુસાર, ચૂંટણી પંચની અંદર હજુ સુધી એ અંતિમ નિર્ણય લેવાયો નથી કે કયા રાજ્યમાં કેટલા તબક્કામાં ચૂંટણી યોજવામાં આવશે. જોકે પ્રાથમિક અંદાજ મુજબ:

પંજાબ, ગોવા અને ઉત્તરાખંડમાં એક જ તબક્કામાં મતદાન થવાની પ્રબળ શક્યતા છે.જ્યારે રાજકીય રીતે અત્યંત સંવેદનશીલ અને દેશના સૌથી મોટા રાજ્ય ઉત્તર પ્રદેશમાં અગાઉની ચૂંટણીઓની જેમ જ એકથી વધુ તબક્કાઓમાં ચૂંટણી યોજાવાની આશા છે. મતદાનની અંતિમ વ્યવસ્થા અને સંપૂર્ણ શિડ્યુલ ચૂંટણી પંચ દ્વારા જ્યારે તારીખોની સત્તાવાર જાહેરાત કરવામાં આવશે તે સમયે જ બહાર પાડવામાં આવશે.

આ પણ વાંચો-હવે ઘરે બેઠા જ PF ખાતામાં નામ અને જન્મતારીખ સહિતની ભૂલો સુધારી શકાશે! જાણી લો આ 5 સરળ ઓનલાઈન સ્ટેપ્સ