ગુજરાત સરકારનું મોટું મંત્રીમંડળ: 26 મંત્રીઓ સાથે CM ભૂપેન્દ્ર પટેલની ટીમમાં મોટો ફેરબદલ, આજે શપથવિધિ

Big Cabinet of Gujarat Government: ગુજરાતના રાજકીય આકાશમાં આજે એક મોટો વળાંક આવવાની તૈયારી છે. મુખ્યમંત્રી ભૂપેન્દ્ર પટેલના નેતૃત્વ હેઠળની ભાજપ સરકારમાં મોટા પાયે ફેરબદલ કરવામાં આવી રહ્યું છે. આજે તારીખ 16 ઓક્ટોબર 2025ના રોજ સવારે 11:30 વાગ્યે ગાંધીનગર સ્થિત મહાત્મા મંદિર ખાતે નવા મંત્રીમંડળની શપથવિધિ યોજાઈ રહી છે.

મંચ પર 26 ખુરશીઓ: વિશાળ મંત્રીમંડળનો સંકેત

શપથવિધિના સ્થળ પર કરવામાં આવેલી વ્યવસ્થા એ જ સ્પષ્ટ સંદેશો આપી રહી છે કે આ વખતે મંત્રીમંડળ નોંધપાત્ર રીતે મોટું બનવાનું છે. મહાત્મા મંદિરના સ્ટેજ પર કુલ 26 ખુરશીઓ ગોઠવવામાં આવી છે, જે દર્શાવે છે કે મુખ્યમંત્રી સહિત 26 સભ્યોનું નવું મંત્રીમંડળ બનવાની તૈયારી છે. અગાઉના મંત્રીમંડળમાં મુખ્યમંત્રી સહિત માત્ર 17 મંત્રીઓ હતા, જે હવે લગભગ 9 નવા ચહેરાઓના સમાવેશ સાથે વધીને 26 થવાનું છે. ગુજરાત વિધાનસભામાં કુલ 182 સભ્યો છે અને બંધારણીય જોગવાઈ મુજબ મુખ્યમંત્રી સહિત મહત્તમ 27 મંત્રીઓ રાખી શકાય છે. આ રીતે આ વખતનું મંત્રીમંડળ બંધારણીય મર્યાદાની લગભગ નજીક જ પહોંચી રહ્યું છે.

તમામ મંત્રીઓએ આપ્યા રાજીનામા

મંત્રીમંડળના આ મોટા ફેરબદલ માટે સૌપ્રથમ તમામ મંત્રીઓએ તેમના હોદ્દા પરથી રાજીનામા સોંપ્યા હતા. આ કવાયત પછી જ નવા મંત્રીમંડળની રચના કરવામાં આવી રહી છે. આ પ્રક્રિયા સામાન્ય રીતે ત્યારે અપનાવવામાં આવે છે જ્યારે સરકારમાં મોટા પાયે ફેરફાર કરવાના હોય અને નવા તેમજ જૂના બંને પ્રકારના ચહેરાઓને સ્થાન આપવાનું હોય.

રાજ્યપાલ લેવડાવશે શપથ, BJP હાઈકમાન્ડની હાજરી

આજે બપોરે યોજાનારી આ શપથવિધિમાં ગુજરાતના રાજ્યપાલ આચાર્ય દેવવ્રત નવા મંત્રીઓને હોદ્દા અને ગુપ્તતાના શપથ લેવડાવશે. આ મહત્વપૂર્ણ કાર્યક્રમમાં ભાજપના રાષ્ટ્રીય પ્રમુખ જે.પી. નડ્ડા અને ગુજરાત ભાજપ ના પ્રદેશ પ્રમુખ જગદીશ વિશ્વકર્મા પણ હાજર રહેવાના છે. આ ઉપરાંત ભાજપના તમામ ધારાસભ્યો પણ આ સમારોહમાં ઉપસ્થિત રહેશે. પાર્ટી હાઈકમાન્ડની હાજરી એ સ્પષ્ટ દર્શાવે છે કે આ ફેરબદલ માત્ર રાજ્ય સ્તરનો નિર્ણય નથી, પરંતુ દિલ્હીમાં બેઠેલા ટોચનું નેતૃત્વના માર્ગદર્શન હેઠળ લેવાયેલો સ્ટ્રેટેજીનો ભાગ છે.