'મારો ફોન ટેપ થઈ રહ્યો છે...': રાહુલ ગાંધીનો PM મોદી પર ગંભીર આરોપ, ફરી ફેંક્યો ડિબેટનો પડકાર, જજ તરીકે અદાણી-ભાગવતનું નામ સૂચવ્યું

કોંગ્રેસ સાંસદ અને લોકસભામાં વિપક્ષના નેતા રાહુલ ગાંધીએ વડાપ્રધાન નરેન્દ્ર મોદી પર તેમનો ફોન ટેપ કરાવવાનો ગંભીર આરોપ લગાવ્યો છે. શુક્રવારે ઈન્સ્ટાગ્રામ પર યોજાયેલા 'આસ્ક મી' સેશન દરમિયાન રાહુલ ગાંધીએ PM મોદીને ફરી એકવાર આમને-સામને જાહેર ડિબેટ કરવાનો ખુલ્લો પડકાર ફેંક્યો છે. તેમણે દાવો કર્યો છે કે જો બંને નેતાઓ વચ્ચે સીધી ચર્ચા થશે, તો નરેન્દ્ર મોદી વડાપ્રધાન પદ પર નહીં રહી શકે.

'મારા ફોનમાં તમામ પુરાવા છે, જેને PM ટેપ કરાવી રહ્યા છે'

રાહુલે દાવો કર્યો કે વન-ઓન-વન ચર્ચાથી એ સાબિત થઈ જશે કે વિદેશી તાકાતોના ઈશારે કોણ કામ કરી રહ્યું છે, દેશ વિરોધી કોણ છે અને ક્યારથી દેશ વિરોધી પ્રવૃત્તિઓમાં સામેલ છે. તેમણે કહ્યું કે આવી બીજી ઘણી જાણકારીઓ પણ છે જે તેમને ખબર છે અને તેમના ફોનમાં છે.

-- -. https://t.co/lhcxKdv6ph

— Congress (@INCIndia) November 13, 2026

સંસદમાં માઈક બંધ કરવાનો આરોપ

ઈન્સ્ટાગ્રામ પર એક યુઝરે રાહુલ ગાંધીને સવાલ પૂછ્યો હતો કે જ્યારે ભાજપ સંસદમાં ચર્ચા કરવા તૈયાર છે, ત્યારે તેઓ જાહેર ડિબેટ પર કેમ ભાર મૂકી રહ્યા છે? આ સવાલના જવાબમાં રાહુલ ગાંધીએ કહ્યું કે લોકસભામાં તેમને બોલવા દેવામાં આવતા નથી અને તેમનું માઈક બંધ કરી દેવામાં આવે છે. તેથી જ તેઓ સંસદની બહાર સીધી ચર્ચાની માંગ કરી રહ્યા છે.

'અદાણી કે ભાગવતને જજ બનાવો, મને કોઈ વાંધો નથી'

રાહુલ ગાંધીએ સ્પષ્ટ કર્યું કે તેઓ લાંબા ભાષણોવાળી ચર્ચા નથી ઈચ્છતા, પરંતુ એક એવી સીધી વાતચીત ઈચ્છે છે જેમાં બંને નેતાઓ એકબીજા પર સીધા સવાલ-જવાબ કરી શકે. તેમણે કહ્યું કે PM મોદી એક તરફ બેસે અને તેઓ બીજી તરફ, અને બંને વચ્ચે સીધી ચર્ચા થાય.

સૌથી ચોંકાવનારી વાત એ છે કે રાહુલે કહ્યું કે જો આ ડિબેટ માટે ઉદ્યોગપતિ ગૌતમ અદાણી અથવા RSS પ્રમુખ મોહન ભાગવતને જજ બનાવવામાં આવે, તો પણ તેમને કોઈ વાંધો રહેશે નહીં. આ નિવેદનથી રાજકીય ગલિયારામાં ભારે ચર્ચા શરૂ થઈ ગઈ છે.

નોંધનીય છે કે રાહુલ ગાંધી આ પહેલાં પણ અનેકવાર વડાપ્રધાન મોદીને ખુલ્લી ચર્ચાનો પડકાર આપી ચૂક્યા છે, પરંતુ PM મોદી તરફથી હજુ સુધી આ પડકારનો કોઈ સીધો જવાબ આવ્યો નથી.

આ પણ વાંચો-NVIDIAના CEO જેન્સન હુઆંગના રાજીનામા બાદ ટ્રમ્પે CEO માટે આગળ કર્યું ટિમ કુકનું નામ, જાણો સ્કેન્ડલની આખી કહાની